ഓണയാത്ര പ്ലാൻ ചെയ്യുന്നവർ ശ്രദ്ധിക്കുക ; മൂന്ന് സ്പെഷ്യൽ ട്രെയിനുകളുടെ ബുക്കിങ് ഇന്ന് മുതൽ

തിരുവനന്തപുരം: ഓണത്തോടനുബന്ധിച്ചുള്ള യാത്രാ തിരക്ക് നിയന്ത്രിക്കാൻ ദക്ഷിണ റെയിൽവേ അനുവദിച്ച മൂന്ന് പ്രത്യേക ട്രെയിനുകളുടെ ടിക്കറ്റ് റിസർവേഷൻ ഇന്നുമുതൽ ആരംഭിച്ചു. കേരളത്തിലേക്കും കേരളത്തിൽ നിന്നുമുള്ള യാത്രക്കാർക്ക് ആശ്വാസമാകുന്ന രീതിയിലാണ് ചെന്നൈ–കൊല്ലം, തിരുവനന്തപുരം നോർത്ത്–മംഗളൂരു, ബെംഗളൂരു–എറണാകുളം റൂട്ടുകളിൽ പ്രത്യേക സർവീസുകൾ പ്രഖ്യാപിച്ചിരിക്കുന്നത്.

ഓണാവധിക്കാലത്ത് കേരളത്തിലേക്കുള്ള യാത്രക്കാരുടെ എണ്ണം വർധിക്കുമെന്ന വിലയിരുത്തലിനെ തുടർന്നാണ് പ്രത്യേക ട്രെയിനുകൾ അനുവദിച്ചത്. വിവിധ ദിവസങ്ങളിലായി ഓഗസ്റ്റിലും സെപ്റ്റംബറിലുമായി സർവീസുകൾ നടത്തും.

ചെന്നൈ – കൊല്ലം സ്പെഷ്യൽ

06117 നമ്പർ ട്രെയിൻ ഓഗസ്റ്റ് 13, 15, 20, 22, 27, 29, സെപ്റ്റംബർ 3, 5 തീയതികളിൽ രാത്രി 11.50-ന് ചെന്നൈ സെൻട്രലിൽ നിന്ന് പുറപ്പെട്ട് അടുത്ത ദിവസം വൈകിട്ട് 4.20-ന് കൊല്ലത്തെത്തും.

മടക്ക സർവീസായ 06118 ഓഗസ്റ്റ് 14, 16, 21, 23, 28, 30, സെപ്റ്റംബർ 4, 6 തീയതികളിൽ വൈകിട്ട് 6.45-ന് കൊല്ലത്ത് നിന്ന് പുറപ്പെട്ട് അടുത്ത ദിവസം രാവിലെ 11.35-ന് ചെന്നൈയിലെത്തും.

ട്രെയിനിൽ ഒരു ഫസ്റ്റ് എസി-കം-ടു ടിയർ കോച്ച്, രണ്ട് എസി ടു ടിയർ, 13 സ്ലീപ്പർ, രണ്ട് ജനറൽ കോച്ചുകൾ ഉൾപ്പെടും.

തിരുവനന്തപുരം നോർത്ത് – മംഗളൂരു സ്പെഷ്യൽ

തിരുവനന്തപുരം നോർത്തിൽ നിന്ന് ഓഗസ്റ്റ് 12, 19, 26, സെപ്റ്റംബർ 2 തീയതികളിൽ രാവിലെ 9 മണിക്ക് പുറപ്പെടുന്ന 06093 ട്രെയിൻ രാത്രി 9 മണിക്ക് മംഗളൂരുവിലെത്തും.

മടക്ക സർവീസായ 06094 ഓഗസ്റ്റ് 13, 20, 27, സെപ്റ്റംബർ 3 തീയതികളിൽ ഉച്ചയ്‌ക്ക് 3.15-ന് മംഗളൂരുവിൽ നിന്ന് പുറപ്പെട്ട് അടുത്ത ദിവസം രാവിലെ 5.30-ന് തിരുവനന്തപുരം സെൻട്രലിലെത്തും.

എറണാകുളം – ബെംഗളൂരു എസ്.എം.വി.ടി സ്പെഷ്യൽ

06147 ട്രെയിൻ ഓഗസ്റ്റ് 9, 16, 23, 30, സെപ്റ്റംബർ 6 തീയതികളിൽ രാത്രി 11.10-ന് എറണാകുളം ജംഗ്ഷനിൽ നിന്ന് പുറപ്പെട്ട് അടുത്ത ദിവസം ഉച്ചയ്‌ക്ക് 12.45-ന് ബെംഗളൂരു എസ്.എം.വി.ടി സ്റ്റേഷനിലെത്തും.

മടക്ക സർവീസായ 06148 ഓഗസ്റ്റ് 10, 17, 24, 31, സെപ്റ്റംബർ 7 തീയതികളിൽ വൈകിട്ട് 4 മണിക്ക് ബെംഗളൂരുവിൽ നിന്ന് പുറപ്പെട്ട് അടുത്ത ദിവസം രാവിലെ 5.45-ന് എറണാകുളത്തെത്തും.

പ്രധാന സ്റ്റോപ്പുകൾ

ഈ പ്രത്യേക ട്രെയിനുകൾ എറണാകുളം, ആലുവ, തൃശ്ശൂർ, പാലക്കാട്, സേലം, ഈറോഡ്, തിരുപ്പൂർ, കോഴിക്കോട്, കണ്ണൂർ, കാസർകോട്, കോട്ടയം, ചെങ്ങന്നൂർ, കായംകുളം തുടങ്ങി നിരവധി പ്രധാന സ്റ്റേഷനുകളിൽ നിർത്തും.

ഓണ അവധിക്കാലത്ത് യാത്ര ചെയ്യാൻ ആഗ്രഹിക്കുന്നവർക്ക് മുൻകൂട്ടി ടിക്കറ്റ് ബുക്ക് ചെയ്യണമെന്ന് റെയിൽവേ അധികൃതർ അറിയിച്ചു.