ലൊസാഞ്ചലസ്: 2026 ഫിഫ ലോകകപ്പില് സെമിഫൈനലിലേക്ക് മുന്നേറിയ സ്പെയിന് മറ്റൊരു ചരിത്രനേട്ടത്തിനും അരികിലെത്തി. ക്വാര്ട്ടര് ഫൈനലില് ബെല്ജിയത്തെ 2-1ന് കീഴടക്കിയതോടെ, തുടര്ച്ചയായ 36 അന്താരാഷ്ട്ര മത്സരങ്ങളില് തോല്വിയറിയാതെയുള്ള സ്പെയിന്റെ കുതിപ്പ് ലോക ഫുട്ബോളിലെ എക്കാലത്തെയും മികച്ച റെക്കോര്ഡുകളിലൊന്നിനൊപ്പമെത്തി.
2019 മുതല് 2022 വരെ ലയണല് മെസിയുടെ നേതൃത്വത്തില് അര്ജന്റീന നേടിയ 36 മത്സരങ്ങളുടെ അപരാജിത കുതിപ്പിനൊപ്പമാണ് ഇപ്പോള് ലൂയിസ് ഡി ലാ ഫുവെന്റെയുടെ ടീം എത്തിയത്. ഇനി സ്പെയിനിന് മുന്നിലുള്ളത് ഇറ്റലിയുടെ 37 മത്സരങ്ങളുടെ ലോക റെക്കോര്ഡ് മാത്രമാണ്. ലോകകപ്പ് സെമിയില് ഫ്രാന്സിനെ കീഴടക്കാന് കഴിഞ്ഞാല് ഇറ്റലിയുടെ ചരിത്ര നേട്ടത്തിനൊപ്പമെത്താനും സ്പെയിനിന് സാധിക്കും.
ലോസ് ആഞ്ചലസിലെ സോഫി സ്റ്റേഡിയത്തില് നടന്ന ക്വാര്ട്ടര് പോരാട്ടം ആവേശത്തിന്റെ കൊടുമുടിയിലായിരുന്നു. മത്സരത്തിന്റെ 30-ാം മിനിറ്റില് ഫാബിയന് റൂയിസിലൂടെ സ്പെയിന് ലീഡെടുത്തു. എന്നാല് ആദ്യപകുതി അവസാനിക്കും മുമ്പ് ചാള്സ് ഡി കെറ്റലാറെയുടെ ഹെഡറിലൂടെ ബെല്ജിയം സമനില പിടിച്ചു.
ഈ ഗോള്ക്ക് മറ്റൊരു പ്രത്യേകതയും ഉണ്ടായിരുന്നു. ടൂര്ണമെന്റില് ഇതുവരെ ഒരു ഗോള് പോലും വഴങ്ങാതെ മുന്നേറിയിരുന്ന സ്പെയിന്റെ പ്രതിരോധ മതില് അന്ന് തകര്ന്നു. ഗോള്കീപ്പര് ഉനായ് സിമോണിന്റെ ക്ലീന് ഷീറ്റ് പരമ്പരയ്ക്കും അതോടെ വിരാമമായി.
രണ്ടാം പകുതിയില് ഇരു ടീമുകളും വിജയഗോളിനായി ആക്രമണം ശക്തമാക്കിയെങ്കിലും മത്സരം സമനിലയിലേക്ക് നീങ്ങുമെന്നായിരുന്നു എല്ലാവരും കരുതിയത്. എന്നാല് പതിവുപോലെ അവസാന നിമിഷങ്ങളില് സ്പെയിന്റെ രക്ഷകനായി മാറിയത് മികേല് മെറിനോ ആയിരുന്നു.
86-ാം മിനിറ്റില് പകരക്കാരനായി കളത്തിലിറങ്ങിയ മെറിനോ, വെറും രണ്ട് മിനിറ്റിനകം വിജയഗോള് നേടി സ്പെയിനിനെ സെമിയിലേക്ക് നയിച്ചു. ഇതിന് മുമ്പ് പ്രീക്വാര്ട്ടറില് പോര്ച്ചുഗലിനെതിരെയും പകരക്കാരനായി ഇറങ്ങി വിജയഗോള് നേടിയ താരം, തുടര്ച്ചയായ രണ്ട് നോക്കൗട്ട് മത്സരങ്ങളില് ടീമിന്റെ ഹീറോയായി മാറുകയായിരുന്നു.
ഇപ്പോള് ലോകകപ്പ് കിരീടത്തിലേക്ക് കുതിക്കുന്ന സ്പെയിന്റെ അടുത്ത വെല്ലുവിളി മുന് ലോകചാമ്പ്യന്മാരായ ഫ്രാന്സാണ്. ടെക്സാസിലെ ആര്ലിങ്ടണില് നടക്കുന്ന സെമിഫൈനലില് വിജയിച്ചാല് ഫൈനല് ടിക്കറ്റിനൊപ്പം ലോക ഫുട്ബോളിലെ ഏറ്റവും ദൈര്ഘ്യമേറിയ അപരാജിത പരമ്പരയുടെ റെക്കോര്ഡും സ്പെയിന് പങ്കിടും.
