ചെന്നൈ: ഐപിഎല്‍ ചരിത്രത്തിലെ ഏറ്റവും വിജയകരമായ പരിശീലകരിലൊരാളായ സ്റ്റീഫന്‍ ഫ്‌ലെമിങ് ചെന്നൈ സൂപ്പര്‍ കിങ്സിന്റെ ഹെഡ് കോച്ച് സ്ഥാനം ഒഴിഞ്ഞു. 18 വര്‍ഷം നീണ്ട അപൂര്‍വ ബന്ധത്തിനാണ് ഇതോടെ വിരാമമായത്. പരസ്പര ധാരണയോടെയാണ് തീരുമാനമെടുത്തതെന്ന് ഫ്രാഞ്ചൈസി ഔദ്യോഗികമായി അറിയിച്ചു. 2008-ലെ ആദ്യ ഐപിഎല്‍ സീസണില്‍ താരമായാണ് ഫ്‌ലെമിങ് ചെന്നൈ സൂപ്പര്‍ കിങ്സിലെത്തിയത്.
’18 വര്‍ഷമെന്നത് കായികരംഗത്ത് ഒരു ജീവിതകാലം പോലെയാണ്. നിറഞ്ഞ നന്ദിയോടെയാണ് ഞാന്‍ പടിയിറങ്ങുന്നത്. ചെന്നൈ സൂപ്പര്‍ കിങ്സിനൊപ്പമുള്ള എന്റെ യാത്രയാണ് പരിശീലകജീവിതത്തിലെ ഏറ്റവും വലിയ ഭാഗ്യമായി ഞാന്‍ കാണുന്നത്. ഒരുമിച്ച് നേടിയ നേട്ടങ്ങളിലും മറക്കാനാകാത്ത വിജയങ്ങളിലും കഠിനമായ പരീക്ഷണഘട്ടങ്ങളെ അതിജീവിച്ചതിലും എനിക്ക് അതിയായ അഭിമാനമുണ്ട്. ഈ ഓര്‍മ്മകള്‍ ജീവിതകാലം മുഴുവന്‍ എന്നോടൊപ്പമുണ്ടാകും. ചെന്നൈ സൂപ്പര്‍ കിങ്സ് എപ്പോഴും എന്റെ ഹൃദയത്തോട് ചേര്‍ന്നുനില്‍ക്കും. വരും വര്‍ഷങ്ങളിലും ടീമിന്റെ ഓരോ വിജയത്തിനും ഞാന്‍ കൈയടിച്ചുകൊണ്ടിരിക്കും,’ സ്റ്റീഫന്‍ ഫ്‌ലെമിങ് പറഞ്ഞു.
2009 മുതല്‍ ഹെഡ് കോച്ചായി ചുമതലയേറ്റ അദ്ദേഹം എം.എസ്. ധോണിക്കൊപ്പം ഐപിഎല്‍ ചരിത്രത്തിലെ ഏറ്റവും വിജയകരമായ ക്യാപ്റ്റന്‍-കോച്ച് കൂട്ടുകെട്ടുകളിലൊന്ന് സൃഷ്ടിച്ചു. ഫ്‌ലെമിങിന്റെ പരിശീലനത്തില്‍ ചെന്നൈ സൂപ്പര്‍ കിങ്സ് 2010, 2011, 2018, 2021, 2023 വര്‍ഷങ്ങളില്‍ അഞ്ച് ഐപിഎല്‍ കിരീടങ്ങളും 2010, 2014 വര്‍ഷങ്ങളില്‍ രണ്ട് ചാമ്പ്യന്‍സ് ലീഗ് ടി20 കിരീടങ്ങളും സ്വന്തമാക്കി. കൂടാതെ റെക്കോര്‍ഡ് 12 തവണ പ്ലേ ഓഫിലും 10 തവണ ഫൈനലിലും സിഎസ്‌കെ ഇടംപിടിച്ചു.
2016-17 സീസണുകളിലെ രണ്ട് വര്‍ഷത്തെ വിലക്കിന് ശേഷവും 2018-ല്‍ തിരിച്ചെത്തി കിരീടം നേടിയത് ഫ്‌ലെമിങിന്റെ പരിശീലന മികവിന്റെ തെളിവായി വിലയിരുത്തപ്പെടുന്നു. എന്നാല്‍ കഴിഞ്ഞ മൂന്ന് സീസണുകളിലെ മോശം പ്രകടനമാണ് മാറ്റത്തിന് വഴിവെച്ചത്. 2024-ല്‍ അഞ്ചാം സ്ഥാനത്തും, 2025-ല്‍ അവസാന സ്ഥാനത്തും ഫിനിഷ് ചെയ്ത ചെന്നൈക്ക് 2026-ലും പ്ലേ ഓഫിലെത്താനായില്ല.
ഫ്‌ലെമിങിന്റെ കാലത്ത് ആദ്യമായാണ് സിഎസ്‌കെ തുടര്‍ച്ചയായി മൂന്ന് സീസണുകളില്‍ പ്ലേ ഓഫിന് പുറത്താകുന്നത്. ഐപിഎല്‍ ടീമിന് പുറമെ, ജൊഹന്നസ്ബര്‍ഗ് സൂപ്പര്‍ കിങ്സ്, ടെക്‌സാസ് സൂപ്പര്‍ കിങ്സ് ടീമുകളിലെ പരിശീലക സ്ഥാനങ്ങളും ഫ്‌ലെമിങ് ഒഴിഞ്ഞിട്ടുണ്ട്. ഇതോടെ രണ്ട് പതിറ്റാണ്ടോളം നീണ്ട സൂപ്പര്‍ കിങ്സ് ശൃംഖലയുമായുള്ള ബന്ധത്തിനും വിരാമമായി.
ഫ്‌ലെമിങിന് പകരക്കാരനെ ഇതുവരെ ചെന്നൈ സൂപ്പര്‍ കിങ്സ് പ്രഖ്യാപിച്ചിട്ടില്ല. ഐപിഎല്‍ 2027 സീസണിന് മുന്നോടിയായി പുതിയ ഹെഡ് കോച്ചിനെ കണ്ടെത്താനുള്ള നടപടികള്‍ ഫ്രാഞ്ചൈസി ആരംഭിച്ചെന്നാണ് റിപ്പോര്‍ട്ടുകള്‍. മുന്‍ ഇന്ത്യന്‍ താരം ഹേമംഗ് ബദാനിയുടെയും രാഹുല്‍ ദ്രാവിഡിന്റെയും പേരുകള്‍ ഈ സ്ഥാനത്തേക്ക് ഉയര്‍ന്നുകേള്‍ക്കുന്നുണ്ട്.
