ആലപ്പുഴ: സിപിഎമ്മിനെതിരെ നടത്തിയ രൂക്ഷ വിമർശനങ്ങളുടെ പേരിൽ മുൻ മന്ത്രിയും പാർട്ടി വിട്ട് യുഡിഎഫ് പിന്തുണയോടെ എംഎൽഎയായ ജി സുധാകരനെതിരെ നിയമനടപടിക്ക് സിപിഎം. പാർട്ടി നേതാക്കളെ ‘പൊളിറ്റിക്കൽ ക്രിമിനൽസ്’, ‘കഞ്ചാവ് കടത്തുകാർ’ എന്ന് വിശേഷിപ്പിച്ച പ്രസംഗം പിൻവലിച്ച് പരസ്യമായി മാപ്പ് പറയണമെന്ന് ആവശ്യപ്പെട്ടാണ് വക്കീൽ നോട്ടീസ് അയച്ചിരിക്കുന്നത്. മാപ്പ് പറയാൻ തയ്യാറായില്ലെങ്കിൽ ₹1 കോടി നഷ്ടപരിഹാരം ആവശ്യപ്പെട്ട് കോടതിയെ സമീപിക്കുമെന്നും നോട്ടീസിൽ മുന്നറിയിപ്പുണ്ട്.
ആലപ്പുഴയിൽ നടന്ന പൊതുപരിപാടിയിലായിരുന്നു ജി സുധാകരന്റെ വിവാദ പരാമർശങ്ങൾ. ജില്ലയിലെ പാർട്ടിയെ നിയന്ത്രിക്കുന്നത് കഞ്ചാവ് കടത്തുകാരാണെന്നും നിരവധി നേതാക്കൾ രാഷ്‌ട്രീയ കുറ്റവാളികളായി മാറിയെന്നുമുള്ള അദ്ദേഹത്തിന്റെ ആരോപണങ്ങൾ സംസ്ഥാന രാഷ്‌ട്രീയത്തിൽ വലിയ ചർച്ചയ്‌ക്ക് വഴിവെച്ചിരുന്നു.
സിപിഎം ആലപ്പുഴ ജില്ലാ നേതൃത്വത്തിന്റെ നിർദേശപ്രകാരമാണ് പാർട്ടി നിയമനടപടി ആരംഭിച്ചിരിക്കുന്നത്. പാർട്ടിയുടെ മുതിർന്ന നേതാക്കളെയും സാധാരണ പ്രവർത്തകരെയും അപകീർത്തിപ്പെടുത്തുന്ന രീതിയിലുള്ള പ്രസ്താവനകൾ അംഗീകരിക്കാനാകില്ലെന്ന് നോട്ടീസ് അയച്ച സിപിഎം നേതാവ് വി.ജി. വിഷ്ണു വ്യക്തമാക്കി. സജി ചെറിയാൻ, എച്ച്. സലാം ഉൾപ്പെടെയുള്ള നേതാക്കളുടെ പ്രതിച്ഛായ തകർക്കുന്ന തരത്തിലുള്ള പരാമർശങ്ങളാണ് നടത്തിയതെന്നും അദ്ദേഹം ആരോപിച്ചു.
വിവാദ പ്രസ്താവന ഉടൻ പിൻവലിച്ച് മാപ്പ് പറയണമെന്ന് നോട്ടീസിൽ ആവശ്യപ്പെട്ടിട്ടുണ്ട്. അല്ലാത്തപക്ഷം ₹1 കോടി നഷ്ടപരിഹാരം ആവശ്യപ്പെട്ട് സിവിൽ നിയമനടപടികൾ സ്വീകരിക്കുമെന്നും സിപിഎം മുന്നറിയിപ്പ് നൽകിയിട്ടുണ്ട്.
ജി സുധാകരന്റെ ആരോപണങ്ങൾക്കും സിപിഎമ്മിന്റെ നിയമനീക്കത്തിനും പിന്നാലെ സംസ്ഥാന രാഷ്‌ട്രീയത്തിൽ പുതിയ വിവാദത്തിനാണ് തുടക്കമായിരിക്കുന്നത്.
