തൃശൂർ: ദേശീയപാതയിലെ പുതുക്കാട് സിഗ്നലിന് സമീപം പിക്കപ്പ് വാൻ ബൈക്കിലിടിച്ചുണ്ടായ അപകടത്തിൽ യുവാവ് മരിച്ചു. പട്ടാമ്പി തിരുമിറ്റക്കോട് മേലേതിൽ വീട്ടിൽ റിജാസ് (22) ആണ് മരിച്ചത്. അപകടത്തിൽ ബൈക്കിൽ ഒപ്പമുണ്ടായിരുന്ന പാലക്കാട് സ്വദേശി ശ്രീഷ്മ (21)യ്ക്ക് ഗുരുതരമായി പരിക്കേറ്റു.
ഞായറാഴ്ച വൈകിട്ട് അഞ്ചുമണിയോടെയായിരുന്നു അപകടം. തൃശൂർ ഭാഗത്തേക്ക് സഞ്ചരിച്ചിരുന്ന ബൈക്ക് പുതുക്കാട് സിഗ്നലിൽ നിർത്താൻ ശ്രമിക്കുന്നതിനിടെയാണ് പിന്നിൽ നിന്ന് അമിതവേഗത്തിൽ എത്തിയ പിക്കപ്പ് വാൻ ഇടിച്ചുതെറിപ്പിച്ചത്.
അപകടത്തിന്റെ ആഘാതത്തിൽ നിയന്ത്രണം വിട്ട പിക്കപ്പ് വാൻ സിഗ്നലിൽ നിർത്തിയിട്ടിരുന്ന മൂന്ന് കാറുകളിലേക്കും ഇടിച്ചുകയറി. ഇതോടെ ദേശീയപാതയിൽ ഗതാഗതക്കുരുക്കും പരിഭ്രാന്തിയും ഉണ്ടായി.
ഗുരുതരമായി പരിക്കേറ്റ റിജാസിനെ ഉടൻ പുതുക്കാട് താലൂക്ക് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഗുരുതര പരിക്കേറ്റ ശ്രീഷ്മയെ പ്രാഥമിക ശുശ്രൂഷയ്ക്ക് ശേഷം മുളങ്കുന്നത്തുകാവ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ചികിത്സ തുടരുകയാണ്.
അപകടത്തിൽ പിക്കപ്പ് വാനും മൂന്ന് കാറുകൾക്കും കേടുപാടുകൾ സംഭവിച്ചു. സംഭവത്തെ തുടർന്ന് പോലീസ് സ്ഥലത്തെത്തി ഗതാഗതം നിയന്ത്രിക്കുകയും അപകടത്തിന്റെ കാരണം സംബന്ധിച്ച് അന്വേഷണം ആരംഭിക്കുകയും ചെയ്തു.
