തിരുവനന്തപുരം: വർക്കലയിൽ പുഴുങ്ങിയ താറാവ് മുട്ട പൊട്ടിച്ചപ്പോൾ ഉള്ളിൽ താറാവിൻ കുഞ്ഞിനെ കണ്ടെത്തിയ സംഭവം കൗതുകത്തിനും ആശങ്കയ്ക്കും ഇടയാക്കി. കവലയൂർ സ്വദേശി ലാൽ കുമാറാണ് കടയിൽ നിന്ന് വാങ്ങിയ താറാവ് മുട്ട പുഴുങ്ങിയശേഷം പൊട്ടിച്ചപ്പോൾ ഈ കാഴ്ച കണ്ടത്.
വർക്കല പുത്തൻചന്ത ജംഗ്ഷന് സമീപത്തെ പച്ചക്കറിക്കടയിൽ നിന്ന് ഇന്ന് രാവിലെ 11.30ഓടെയാണ് ലാൽ കുമാർ ആറ് താറാവ് മുട്ടകൾ വാങ്ങിയത്. വീട്ടിലെത്തിച്ച് പുഴുങ്ങിയ ശേഷം മുട്ടകൾ പൊട്ടിച്ചുനോക്കിയപ്പോൾ ഒന്നിൽ താറാവിൻ കുഞ്ഞിനെ കണ്ടെത്തുകയായിരുന്നു. ബാക്കിയുള്ള മുട്ടകൾക്കും അസാധാരണമായ രൂപവും രൂക്ഷമായ ദുർഗന്ധവും ഉണ്ടായിരുന്നതായി ലാൽ കുമാർ പറഞ്ഞു. വാങ്ങിയ ആറു മുട്ടകളും കേടായിരുന്നുവെന്നും ലാൽ കുമാർ ആരോപിച്ചു.
സംഭവത്തെ തുടർന്ന് ലാൽ കുമാർ വർക്കല നഗരസഭ ആരോഗ്യവിഭാഗത്തെയും ഭക്ഷ്യസുരക്ഷാ വകുപ്പിനെയും വിവരം അറിയിച്ചു. തുടർന്ന് ഭക്ഷ്യസുരക്ഷാ ഉദ്യോഗസ്ഥർ കടയിലെത്തി പരിശോധന നടത്തി. വിൽപ്പനയ്ക്കായി സൂക്ഷിച്ചിരുന്ന താറാവ് മുട്ടകളുടെ സാമ്പിളുകൾ ശേഖരിച്ച ഉദ്യോഗസ്ഥർ പരിശോധനയ്ക്കായി അയച്ചു. സാമ്പിളുകളുടെ പരിശോധനാഫലം ലഭിച്ചതിന് ശേഷമേ തുടർനടപടികൾ സ്വീകരിക്കാനാകൂവെന്ന് ഭക്ഷ്യസുരക്ഷാ വകുപ്പ് അറിയിച്ചു.
