തിരുവനന്തപുരം: കാർഷിക മേഖലയിലെ സമഗ്ര സംഭാവനയ്‌ക്കുള്ള ഉമ്മൻചാണ്ടി സ്മാരക കർഷക അവാർഡ് പത്മശ്രീ ചെറുവയൽ രാമന്. അഞ്ച് ലക്ഷം രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്കാരം. കൃഷിമന്ത്രി ടി. സിദ്ദിഖ് വാർത്താസമ്മേളനത്തിലാണ് പുരസ്കാരം പ്രഖ്യാപിച്ചത്. പരമ്പരാഗത കൃഷിരീതികളെയും തനത് നെൽവിത്തുകളെയും സംരക്ഷിക്കുന്നതടക്കമുള്ള കാർഷിക മേഖലയിലെ ദീർഘകാല സംഭാവനകൾ പരിഗണിച്ചാണ് ചെറുവയൽ രാമനെ പുരസ്കാരത്തിനായി തെരഞ്ഞെടുത്തത്.
2025ലെ സംസ്ഥാന കാർഷിക അവാർഡുകളാണ് ഇത്തവണ 38 വിഭാഗങ്ങളിലായി പ്രഖ്യാപിച്ചത്. ഇതിൽ പുതുതായി ഉൾപ്പെടുത്തിയ മൂന്ന് പുരസ്കാരങ്ങളും ശ്രദ്ധേയമാണ്. അർബൻ റൂഫ് ടോപ് ഫാർമർ വിഭാഗത്തിൽ അനിത എം. കാസിമിനും ഉദ്യാന ശ്രേഷ്ഠ വിഭാഗത്തിൽ ഡോളി വർഗീസിനും പുരസ്കാരം ലഭിച്ചു. ഉമ്മൻചാണ്ടി സ്മാരക കർഷക അവാർഡും ഉൾപ്പെടെയാണ് പുതിയ മൂന്ന് അവാർഡ് വിഭാഗങ്ങൾ.
സംസ്ഥാനതല പുരസ്കാരങ്ങൾ ആഗസ്റ്റ് 17ന് എറണാകുളം കളമശ്ശേരി ആശിഷ് കൺവെൻഷൻ സെന്ററിൽ നടക്കുന്ന സംസ്ഥാനതല കർഷക ദിനാഘോഷ പരിപാടിയിൽ മുഖ്യമന്ത്രി വി.ഡി. സതീശൻ വിതരണം ചെയ്യും.
തദ്ദേശ സ്ഥാപനങ്ങളുടെ മികച്ച കാർഷിക പ്രവർത്തനങ്ങൾക്കുള്ള സി. അച്യുതമേനോൻ സ്മാരക അവാർഡ് കൊടുവള്ളി ബ്ലോക്ക് പഞ്ചായത്തും ഉളിക്കൽ ഗ്രാമപഞ്ചായത്തും പങ്കിട്ടു. അഞ്ച് ലക്ഷം രൂപയാണ് പുരസ്കാരത്തുക. വി.വി. രാഘവൻ സ്മാരക അവാർഡിന് കുറ്റൂർ കൃഷിഭവൻ അർഹമായി. ഈ പുരസ്കാരത്തിനും അഞ്ച് ലക്ഷം രൂപയാണ് അവാർഡ് തുക.
പത്മശ്രീ കെ. വിശ്വനാഥൻ (മിത്രാനികേതൻ) മെമ്മോറിയൽ നെൽക്കതിർ അവാർഡ് നെന്മേനി നെൽ ഉത്പാദക പാടശേഖര സമിതിക്ക് ലഭിച്ചു. മികച്ച ജൈവ കർഷകനായി ഷാജഹാൻ വി.വൈ.യെ തെരഞ്ഞെടുത്തു. മികച്ച യുവകർഷകനായി ഹാഷിഖ് കെ., ഹൈടെക് കർഷകനായി പുഷ്പഹാസ് പി., കർഷകജ്യോതിയായി കിഷോർ വി., മികച്ച തേനീച്ച കർഷകനായി അനീഷ് കെ.പി., കർഷകതിലകമായി സാവിത്രി കെ. എന്നിവരും പുരസ്കാരത്തിന് അർഹരായി.
മികച്ച കൃഷിക്കൂട്ടം വിഭാഗത്തിൽ അഗ്രോസർവീസ് സെന്റർ, നീലേശ്വരത്തിനും പോരുവഴി കാർഷിക കർമ്മസേനയ്‌ക്കും പുരസ്കാരം ലഭിച്ചു. ആദിത്യൻ കെ.എ.യെ കർഷക വിദ്യാർത്ഥിയായും സിദ്ധാർത്ഥ സെൻട്രൽ സ്കൂൾ, നെടുമ്പനയെ മികച്ച വിദ്യാഭ്യാസ സ്ഥാപനമായും തെരഞ്ഞെടുത്തു. കാർമൽ ജ്യോതി സ്പെഷ്യൽ സ്കൂൾ മികച്ച സ്പെഷ്യൽ സ്കൂൾ പുരസ്കാരത്തിനും അർഹമായി. കൃഷി ഓഫീസറായി മുഹമ്മദ് മുനീറിനെയും തെരഞ്ഞെടുത്തു.
അതേസമയം, 2026 വനിതാ കർഷക വർഷമായി ആചരിക്കുന്നതിന്റെ ഭാഗമായി വനിതാ കർഷകർക്കായി ‘കൃഷിസഖി’ എന്ന പേരിൽ പ്രത്യേക പദ്ധതി ആരംഭിച്ചതായും കൃഷിമന്ത്രി അറിയിച്ചു. വനിതകളുടെ കാർഷിക പങ്കാളിത്തം കൂടുതൽ ശക്തിപ്പെടുത്തുകയെന്ന ലക്ഷ്യത്തോടെയാണ് പദ്ധതി നടപ്പാക്കുന്നത്. ഇതിനായി ഇത്തവണത്തെ ബജറ്റിൽ 3.5 കോടി രൂപ വകയിരുത്തിയിട്ടുണ്ടെന്നും മന്ത്രി വ്യക്തമാക്കി.
കർഷകരുടെ സംഭാവനകളെ അംഗീകരിക്കുന്നതിനൊപ്പം വിവിധ മേഖലകളിലെ കാർഷിക പ്രവർത്തനങ്ങൾക്ക് കൂടുതൽ പ്രോത്സാഹനം നൽകുക എന്ന ലക്ഷ്യത്തോടെയാണ് 38 വിഭാഗങ്ങളിലായി ഇത്തവണ പുരസ്കാരങ്ങൾ പ്രഖ്യാപിച്ചിരിക്കുന്നത്. കാർഷിക പാരമ്പര്യവും പുതുതലമുറയുടെ കാർഷിക സംരംഭങ്ങളും വനിതകളുടെ പങ്കാളിത്തവും ഒരുപോലെ പരിഗണിച്ചാണ് പുരസ്കാര ജേതാക്കളെ തെരഞ്ഞെടുത്തിരിക്കുന്നത്.
