ആംസ്റ്റല്‍വീല്‍ (നെതര്‍ലന്‍ഡ്‌സ്): ഹോക്കി ലോകകപ്പില്‍ ഇന്ത്യക്ക് വിജയത്തുടക്കം. പൂള്‍ ഡിയിലെ ആദ്യ മത്സരത്തില്‍ വെയ്ല്‍സിനെ 3-1ന് തോല്‍പ്പിച്ച ഇന്ത്യ ക്യാപ്റ്റന്‍ ഹര്‍മന്‍പ്രീതിന്റെ ഇരട്ടഗോളിന്റെയും സഞ്ജയിയുടെ ഒരു ഗോളിന്റെയും മികവിലാണ് ജയിച്ചത്. സാം വെല്‍ഷാണ് വെയ്ല്‍സിന്റെ ആശ്വാസഗോള്‍ നേടിയത്. മത്സരം തുടങ്ങി എട്ടാം മിനിറ്റില്‍ സഞ്ജയിയിലൂടെ ഇന്ത്യ മുന്നിലെത്തി. മൂന്ന് മിനിറ്റിനുശേഷം പെനാല്‍റ്റി കോര്‍ണര്‍ ഗോളാക്കി ഹര്‍മന്‍പ്രീത് ലീഡ് രണ്ടാക്കി. 43-ാം മിനിറ്റില്‍ പെനാല്‍റ്റി കോര്‍ണറില്‍ നിന്നുതന്നെ ഹര്‍മന്‍പ്രീത് തന്റെ രണ്ടാം ഗോളും നേടി ഇന്ത്യയെ 3-0ന് മുന്നിലെത്തിച്ചു.
55-ാം മിനിറ്റില്‍ വെയ്ല്‍സ് ഒരു ഗോള്‍ തിരിച്ചടിച്ചു. സര്‍ക്കിളിനുള്ളിലെ കൂട്ടപ്പൊരിച്ചിലിനൊടുവിലാണ് സാം വെല്‍ഷ് ലക്ഷ്യം കണ്ടത്. പിന്നീട് ഇന്ത്യ പ്രതിരോധം ഉറപ്പിച്ചതോടെ വെയ്ല്‍സിന് തിരിച്ചുവരാന്‍ കഴിഞ്ഞില്ല. വിജയത്തോടെ ഇന്ത്യ പൂള്‍ ഡിയില്‍ ഒന്നാമതെത്തി. തിങ്കളാഴ്ച ഇംഗ്ലണ്ടിനെതിരെയാണ് ഇന്ത്യയുടെ അടുത്ത മത്സരം. ഇംഗ്ലണ്ട്, വെയ്ല്‍സ്, പാകിസ്താന്‍ എന്നിവരാണ് ഇന്ത്യക്കൊപ്പമുള്ള പൂളിലെ മറ്റ് ടീമുകള്‍. അരനൂറ്റാണ്ടിന് ശേഷം ലോകകപ്പ് കിരീടം തിരിച്ചുപിടിക്കുകയാണ് ഇന്ത്യയുടെ ലക്ഷ്യം.
തുടര്‍ച്ചയായ രണ്ട് ഒളിമ്പിക്‌സുകളില്‍ മെഡല്‍ നേടിയതിന്റെ ആത്മവിശ്വാസവും ഏഷ്യാ കപ്പ് കിരീടനേട്ടവും ഇന്ത്യക്കൊപ്പമുണ്ട്. 1975ല്‍ ക്വലാലംപുരില്‍ നടന്ന ലോകകപ്പില്‍ പാകിസ്താനെ ഫൈനലില്‍ തോല്‍പ്പിച്ചാണ് ഇന്ത്യ ഏക ലോകകപ്പ് കിരീടം നേടിയത്. 1971ല്‍ വെങ്കലവും 1973ല്‍ വെള്ളിയും ഇന്ത്യ സ്വന്തമാക്കിയിരുന്നു. 2023ല്‍ ഭുവനേശ്വറില്‍ നടന്ന ലോകകപ്പില്‍ ഇന്ത്യ ഒമ്പതാം സ്ഥാനത്താണ് ഫിനിഷ് ചെയ്തത്.
