ന്യൂഡല്ഹി: സമുദ്രമേഖലയിലെ നിരീക്ഷണശേഷി ശക്തിപ്പെടുത്താന് ഇന്ത്യന് നാവികസേനയ്ക്ക് രണ്ട് എംക്യു-9ബി സീ ഗാര്ഡിയന് ഡ്രോണുകള് ലീസിന് നല്കുന്നതിനായി ജനറല് ആറ്റോമിക്സ് എയറോനോട്ടിക്കല് സിസ്റ്റംസുമായി ഇന്ത്യ കരാറില് ഒപ്പുവച്ചു. 2026 ഓഗസ്റ്റ് 17ന് ന്യൂഡല്ഹിയിലെ കര്ത്തവ്യ ഭവന്-2ല് പ്രതിരോധ മന്ത്രാലയത്തിന്റെ നേതൃത്വത്തിലാണ് ഏകദേശം 1,943 കോടി മൂല്യമുള്ള കരാര് ഒപ്പുവച്ചത്.
കരാര് പ്രകാരം രണ്ട് ഹൈ ആള്ട്ടിറ്റിയൂഡ് ലോങ് എന്ഡ്യൂറന്സ് റിമോട്ട്ലി പൈലറ്റഡ് എയര്ക്രാഫ്റ്റ് സിസ്റ്റങ്ങള് 30 മാസത്തേക്ക് ഇന്ത്യന് നാവികസേനയ്ക്ക് ലീസിന് ലഭിക്കും. ആധുനിക സെന്സറുകളും പ്രത്യേക പേലോഡുകളും ഉള്പ്പെടെയുള്ള സംവിധാനങ്ങളാണ് സീ ഗാര്ഡിയനിലുള്ളത്. വിശാലമായ സമുദ്രമേഖലയില് തുടര്ച്ചയായ ഇന്റലിജന്സ്, സര്വെയലന്സ് ആന്ഡ് റിക്കണൈസന്സ് നിരീക്ഷണം നടത്താന് ഡ്രോണുകള് നാവികസേനയെ സഹായിക്കും.
ഇന്ത്യന് മഹാസമുദ്ര മേഖലയിലെ കപ്പല് ഗതാഗതം ഉള്പ്പെടെയുള്ള നീക്കങ്ങള് കൂടുതല് കാര്യക്ഷമമായി നിരീക്ഷിക്കാനും ആവശ്യമായ ഘട്ടങ്ങളില് വേഗത്തില് പ്രതികരിക്കാനും ഇതിലൂടെ സാധിക്കും. ദീര്ഘനേരം തുടര്ച്ചയായി പ്രവര്ത്തിക്കാന് കഴിയുന്ന സീ ഗാര്ഡിയന് പോലുള്ള ഹേയില് സംവിധാനങ്ങള് വലിയ സമുദ്രപരിധികളിലെ നിരീക്ഷണത്തിന് പ്രത്യേക പ്രാധാന്യമുള്ളതാണ്. നാവികസേനയുടെ നിലവിലുള്ള മാരിടൈം ഡൊമെയ്ന് അവയര്നെസ് ശേഷിക്ക് പുതിയ സംവിധാനങ്ങള് കൂടുതല് കരുത്തേകും.
നേരിട്ട് സ്വന്തമാക്കുന്നതിന് പകരം 30 മാസത്തേക്ക് ലീസിനാണ് രണ്ട് ഡ്രോണുകളും ലഭിക്കുന്നത്. ഇന്ത്യന് മഹാസമുദ്ര മേഖലയിലെ സുരക്ഷാ സാഹചര്യങ്ങള് നിരീക്ഷിക്കുന്നതിനും രാജ്യത്തിന്റെ സമുദ്ര താല്പര്യങ്ങള് സംരക്ഷിക്കുന്നതിനുമുള്ള ശേഷി വര്ധിപ്പിക്കുകയാണ് കരാറിന്റെ പ്രധാന ലക്ഷ്യം. രാജ്യത്തിന്റെ വ്യാപാര-വാണിജ്യ ബന്ധങ്ങള്ക്കും ദേശീയ സുരക്ഷയ്ക്കും നിര്ണായകമായ ഇന്ത്യന് മഹാസമുദ്ര മേഖലയിലെ നിരീക്ഷണ സംവിധാനങ്ങള് ശക്തിപ്പെടുത്തുന്നതിലെ പ്രധാന ചുവടുവയ്പ്പായാണ് പ്രതിരോധ മന്ത്രാലയം കരാറിനെ കാണുന്നത്.
