തിരുവനന്തപുരം: സ്വാതന്ത്ര്യദിന തലേന്ന് രാത്രി നടത്തത്തിൽ പങ്കെടുത്ത സ്ത്രീകളെ ലൈംഗികച്ചുവയോടെ അധിക്ഷേപിച്ചെന്ന പരാതിയിൽ ഓൾ കേരള മെൻസ് അസോസിയേഷൻ പ്രസിഡന്റ് വട്ടിയൂർക്കാവ് അജിത്തിനെ അറസ്റ്റ് ചെയ്തു. വനിതാ ശിശുവികസന വകുപ്പ് ഡയറക്ടർ നൽകിയ പരാതിയുടെ അടിസ്ഥാനത്തിൽ സൈബർ പോലീസ് രജിസ്റ്റർ ചെയ്ത കേസിലാണ് അറസ്റ്റ്.
വനിതാ ശിശുവികസന വകുപ്പ് ഓഗസ്റ്റ് 14ന് രാത്രി സ്ത്രീകൾക്കായി സംഘടിപ്പിച്ച ‘റീസർജ് – ഫ്രീഡം അറ്റ് മിഡ്‌നൈറ്റ്’ പരിപാടിയെയും അതിൽ പങ്കെടുത്ത സ്ത്രീകളെയും അജിത്ത് സോഷ്യൽ മീഡിയയിലൂടെ അധിക്ഷേപിച്ചെന്നാണ് ആരോപണം
പരിപാടിയിൽ പങ്കെടുത്ത സ്ത്രീകൾക്കെതിരെ ഫേസ്ബുക്ക് വീഡിയോയിലൂടെ ലൈംഗികച്ചുവയുള്ള അധിക്ഷേപ പരാമർശങ്ങൾ അജിത്ത് നടത്തിയെന്നാണ് പരാതി. സ്ത്രീത്വത്തെ അപമാനിക്കുന്ന രീതിയിലും അശ്ലീലച്ചുവയോടെയുമാണ് സോഷ്യൽ മീഡിയയിലൂടെ പ്രതികരിച്ചതെന്നും പരാതിയിൽ പറയുന്നു.
വനിതാ ശിശുവികസന വകുപ്പ് ഡയറക്ടറുടെ പരാതിയിൽ സൈബർ പോലീസ് കേസെടുത്ത് അന്വേഷണം നടത്തുകയായിരുന്നു. തുടർന്ന് അജിത്തിനെ അറസ്റ്റ് ചെയ്തു.
സംഭവത്തിൽ കൂടുതൽ അന്വേഷണം നടന്നുവരികയാണെന്ന് സൈബർ പോലീസ് അറിയിച്ചു.
