അടൂർ: അടൂർ ബൈപ്പാസിലെ വ്യാപാര സ്ഥാപനങ്ങളിൽ വീണ്ടും നഗരസഭ ഹെൽത്ത് സ്ക്വാഡിന്റെ പരിശോധന. ഭക്ഷ്യവസ്തുക്കളുടെ ഗുണനിലവാരം പരിശോധിക്കുന്നതിനിടയിൽ വൻതോതിൽ പഴകിയ ഭക്ഷണസാധനങ്ങളും ഉപയോഗിച്ചിരുന്ന പഴകിയ എണ്ണയും പിടിച്ചെടുത്തു.
പരിശോധനയിൽ 45 ലിറ്റർ പഴകിയ എണ്ണ, വലിയ ഉരുളി ചിക്കൻ, പഴകിയ ചോറ്, പഴകിയ ന്യൂഡിൽസ്, പഴകിയ മുട്ട, കാലാവധി കഴിഞ്ഞ കുബ്ബൂസ്, പഴകിയ ചിക്കൻ എന്നിവയാണ് കണ്ടെത്തിയത്.
ബൈപ്പാസിലെ കെഎഫ്സി, ഫിൽ ഫിൽ, തബാബ്, പ്ലേറ്റ്സ് ബൈ നേഹ, പറക്കൻസ്, റെഡ് ടീ എന്നീ വ്യാപാര സ്ഥാപനങ്ങളിൽ നിന്നാണ് പഴകിയ ഭക്ഷണസാധനങ്ങൾ പിടിച്ചെടുത്തത്.
ഭക്ഷ്യസാധനങ്ങൾ ശരിയായ രീതിയിൽ സൂക്ഷിക്കുന്നുണ്ടോ, കാലാവധി കഴിഞ്ഞതോ ഉപയോഗശൂന്യമായതോ ആയ ഭക്ഷണം ഉപഭോക്താക്കൾക്ക് നൽകുന്നുണ്ടോ തുടങ്ങിയ കാര്യങ്ങൾ പരിശോധിക്കുന്നതിന്റെ ഭാഗമായാണ് നഗരസഭ ഹെൽത്ത് സ്ക്വാഡ് പരിശോധന നടത്തിയത്.
അടൂർ ബൈപ്പാസിലെ സ്ഥാപനങ്ങളിൽ കഴിഞ്ഞ ആഴ്ച നടത്തിയ പരിശോധനയിലും വലിയ തോതിൽ പഴകിയ ഭക്ഷണസാധനങ്ങൾ പിടിച്ചെടുത്തിരുന്നു. ഇതിന് പിന്നാലെയാണ് വീണ്ടും പരിശോധന ശക്തമാക്കിയത്.
പഴകിയ എണ്ണയും ഭക്ഷണസാധനങ്ങളും ഉപയോഗിക്കുന്നത് ഉപഭോക്താക്കളുടെ ആരോഗ്യത്തിന് ഗുരുതരമായ പ്രശ്നങ്ങൾ സൃഷ്ടിക്കാൻ സാധ്യതയുള്ളതിനാൽ പരിശോധനകൾ തുടരുമെന്നാണ് നഗരസഭയുടെ നിലപാട്.
തുടർച്ചയായ പരിശോധനകളിലും പഴകിയ ഭക്ഷണസാധനങ്ങൾ കണ്ടെത്തുന്നത് ഭക്ഷണശാലകളിലെ ഭക്ഷ്യസംഭരണത്തിലും ശുചിത്വത്തിലും കൂടുതൽ കർശനമായ പരിശോധന ആവശ്യമാണെന്നതിന്റെ സൂചനയാണ്. ഉപഭോക്താക്കളുടെ ആരോഗ്യസുരക്ഷ ഉറപ്പാക്കുന്നതിനായി നഗരസഭാ ആരോഗ്യവിഭാഗം പരിശോധനകൾ ശക്തമാക്കുകയാണ്.