ന്യൂഡല്ഹി: ലോക ബാഡ്മിന്റണ് ചാമ്പ്യന്ഷിപ്പില് ഇന്ത്യയ്ക്ക് ചരിത്രനേട്ടം. വനിതാ ഡബിള്സില് ഗായത്രി ഗോപീചന്ദ്-ട്രീസ ജോളി സഖ്യം സെമിഫൈനലില് കടന്നതോടെ ഇന്ത്യയ്ക്ക് മെഡല് ഉറപ്പായി. ലോക ചാമ്പ്യന്ഷിപ്പില് വനിതാ ഡബിള്സില് ഇന്ത്യയുടെ 15 വര്ഷത്തെ മെഡല് കാത്തിരിപ്പിനാണ് ഇതോടെ വിരാമമാകുന്നത്. സെമിഫൈനലില് ജയിച്ചാല് സ്വര്ണത്തിനായുള്ള പോരാട്ടത്തിലേക്ക് ഇന്ത്യന് സഖ്യത്തിന് മുന്നേറാം. ക്വാര്ട്ടര് ഫൈനലില് ചൈനയുടെ നാലാം സീഡ് സഖ്യമായ ജിയ യി ഫാന്-ഷാങ് ഷു ഷിയാന് കൂട്ടുകെട്ടിനെയാണ് ഗായത്രി-ട്രീസ സഖ്യം വീഴ്ത്തിയത്.
ആദ്യ ഗെയിം നഷ്ടമായ ശേഷമായിരുന്നു ഇന്ത്യന് താരങ്ങളുടെ തകര്പ്പന് തിരിച്ചുവരവ്. സ്കോര്: 16-21, 21-15, 21-13. ആദ്യ ഗെയിമില് ചൈനീസ് സഖ്യം ആധിപത്യം പുലര്ത്തിയെങ്കിലും രണ്ടും മൂന്നും ഗെയിമുകളില് ഇന്ത്യന് താരങ്ങള് കളിയുടെ നിയന്ത്രണം ഏറ്റെടുത്തു. നിര്ണായക ഘട്ടങ്ങളില് ഗായത്രിയുടെ ശക്തമായ സ്മാഷുകളും ട്രീസയുടെ മികച്ച നെറ്റ് പ്ലേയുമാണ് ഇന്ത്യക്ക് മുന്തൂക്കം നല്കിയത്. ടൂര്ണമെന്റില് ഇതുവരെ മികച്ച പ്രകടനം കാഴ്ചവെച്ചാണ് ഗായത്രി-ട്രീസ സഖ്യത്തിന്റെ മുന്നേറ്റം.
എന്നാല് ക്വാര്ട്ടറില് ശക്തരായ ചൈനീസ് താരങ്ങള് ഇന്ത്യന് സഖ്യത്തിന് കടുത്ത പരീക്ഷണമാണ് സമ്മാനിച്ചത്. ആദ്യ ഗെയിം കൈവിട്ടിട്ടും പതറാതെ തിരിച്ചെത്തിയ ഇന്ത്യന് താരങ്ങള് തുടര്ച്ചയായ രണ്ട് ഗെയിമുകള് സ്വന്തമാക്കി സെമിഫൈനല് ഉറപ്പിച്ചു. മെഡല് ഉറപ്പായിക്കഴിഞ്ഞെങ്കിലും ഇനി ലക്ഷ്യം ഫൈനലാണ്. സെമിഫൈനലിലെ വിജയം ഗായത്രി ഗോപീചന്ദിനും മലയാളി താരം ട്രീസ ജോളിക്കും ലോക ചാമ്പ്യന്ഷിപ്പിലെ മെഡലിന്റെ നിറം കൂടുതല് തിളക്കമുള്ളതാക്കാനുള്ള അവസരമാകും.
രാജ്യത്തിന്റെ 15 വര്ഷത്തെ കാത്തിരിപ്പിന് ഒടുവില് ലഭിക്കുന്ന മെഡല് വെങ്കലത്തില് ഒതുങ്ങുമോ, അതോ സുവര്ണനിറത്തിലേക്ക് ഉയരുമോ എന്നറിയാന് ഇനി സെമി പോരാട്ടത്തിലേക്ക് കണ്ണുനട്ടിരിക്കുകയാണ് ആരാധകര്.
