മാഞ്ചസ്റ്റര്: അര്ജന്റീനന് മധ്യനിര താരം എന്സോ ഫെര്ണാണ്ടസിനെ ചെല്സിയില് നിന്ന് സ്വന്തമാക്കി മാഞ്ചസ്റ്റര് സിറ്റി. 125 മില്യണ് പൗണ്ട് (ഏകദേശം 1,500 കോടി രൂപ) വരുന്ന ട്രാന്സ്ഫര് തുകയ്ക്കാണ് 25കാരനായ താരത്തെ സിറ്റി ടീമിലെത്തിച്ചത്. ഇതോടെ ബ്രിട്ടീഷ് ഫുട്ബോള് ചരിത്രത്തിലെ ഏറ്റവും ഉയര്ന്ന ട്രാന്സ്ഫര് തുകയെന്ന റെക്കോര്ഡിനൊപ്പമെത്തിയിരിക്കുകയാണ് ഇടപാട്. കഴിഞ്ഞ സമ്മറില് ലിവര്പൂള് അലക്സാണ്ടര് ഇസാക്കിനെ 125 മില്യണ് പൗണ്ടിന് സ്വന്തമാക്കിയതാണ് ബ്രിട്ടീഷ് റെക്കോര്ഡ്. അതേ തുകയ്ക്കാണ് ഫെര്ണാണ്ടസും ഇപ്പോള് ക്ലബ് മാറുന്നത്.
ഫെര്ണാണ്ടസിന്റെ വരവോടെ ഈ സമ്മര് ട്രാന്സ്ഫര് വിന്ഡോയില് മാഞ്ചസ്റ്റര് സിറ്റിയുടെ താരങ്ങള്ക്കായുള്ള മൊത്തം ചെലവ് 458 മില്യണ് പൗണ്ടായി. ഒരു പ്രീമിയര് ലീഗ് ക്ലബ് ഒരു ട്രാന്സ്ഫര് വിന്ഡോയില് ചെലവഴിക്കുന്ന ഏറ്റവും ഉയര്ന്ന തുകയാണിത്. അതേസമയം, താരങ്ങളെ വിറ്റതിലൂടെ സിറ്റിക്ക് ഏകദേശം 300 മില്യണ് പൗണ്ട് ലഭിച്ചിട്ടുമുണ്ട്. നോട്ടിങ്ഹാം ഫോറസ്റ്റില് നിന്ന് എലിയറ്റ് ആന്ഡേഴ്സണെ 116 മില്യണ് പൗണ്ടിന് സ്വന്തമാക്കിയതിന് പിന്നാലെ ഈ സമ്മറില് 100 മില്യണ് പൗണ്ടിന് മുകളില് സിറ്റി സ്വന്തമാക്കുന്ന രണ്ടാമത്തെ താരമാണ് ഫെര്ണാണ്ടസ്.
ലില്ലെയില് നിന്ന് 18കാരനായ അയൂബ് ബൗദ്ദിയെ 86 മില്യണ് പൗണ്ടിനും ബ്രസീലിയന് വിങ്ങര് അലന് ഏലിയാസിനെ 34 മില്യണ് പൗണ്ടിനും സിറ്റി ടീമിലെത്തിച്ചിട്ടുണ്ട്. ഇതിന് പുറമെ ജെറമി മംഗയും ഗോള്കീപ്പര് ജെറോണിമോ റുള്ളിയും ടീമിലെത്തി. എവര്ട്ടണ് വിങ്ങര് ഇലിമാന് എന്ഡിയായെയും പരമാവധി 65 മില്യണ് പൗണ്ട് വരുന്ന കരാറില് സ്വന്തമാക്കാന് സിറ്റി ഒരുങ്ങുന്നതായാണ് റിപ്പോര്ട്ടുകള്. 2023ല് ബെന്ഫിക്കയില് നിന്ന് 107 മില്യണ് പൗണ്ടിന് ചെല്സിയിലെത്തിയ താരമായിരുന്നു ഫെര്ണാണ്ടസ്. അന്ന് ബ്രിട്ടീഷ് ഫുട്ബോളിലെ റെക്കോര്ഡ് ട്രാന്സ്ഫറായിരുന്നു ഇത്.
എന്നാല് ചെല്സിയിലെ അവസാന നാളുകള് താരത്തിന് അത്ര സുഖകരമായിരുന്നില്ല. റയല് സോസിഡാഡിനെതിരായ സൗഹൃദ മത്സരത്തിലും ഫുള്ഹാമിനെതിരായ പ്രീമിയര് ലീഗ് മത്സരത്തിലും ചെല്സി ആരാധകരില് നിന്ന് ഫെര്ണാണ്ടസിന് കൂവലുകള് നേരിട്ടിരുന്നു. തുടര്ന്ന് ലൂട്ടണും ബ്രൈറ്റണും എതിരായ വിജയ മത്സരങ്ങളില് താരം ടീമില് ഉള്പ്പെട്ടിരുന്നില്ല. ക്ലബ് വിടാനുള്ള തീരുമാനം ബുദ്ധിമുട്ടേറിയതായിരുന്നുവെന്ന് ഫെര്ണാണ്ടസ് സോഷ്യല് മീഡിയയില് കുറിച്ചിരുന്നു. ചെല്സിയിലെ കാലയളവിന് നന്ദി പറഞ്ഞ താരം ക്ലബ് എന്നും തന്റെ ഹൃദയത്തിലുണ്ടാകുമെന്നും വ്യക്തമാക്കി.