ലണ്ടൻ: ബ്രിട്ടനിലെ വ്യോമഗതാഗത നിയന്ത്രണ സംവിധാനത്തിലുണ്ടായ സാങ്കേതിക തകരാറിനെ തുടർന്ന് രാജ്യത്ത് വിമാന സർവീസുകൾ താളംതെറ്റി. ലണ്ടൻ ഹീത്രൂ, ഗാറ്റ്വിക്, മാഞ്ചസ്റ്റർ, സ്റ്റാൻസ്റ്റഡ് ഉൾപ്പെടെയുള്ള പ്രധാന വിമാനത്താവളങ്ങളിൽ വ്യാപക തടസമാണ് നേരിട്ടത്. 600-ലേറെ വിമാന സർവീസുകൾ റദ്ദാക്കുകയും നിരവധി സർവീസുകൾ വൈകുകയും ചെയ്തു.
ഫ്ലൈറ്റ് ട്രാക്കിങ് വെബ്സൈറ്റായ ഫ്ലൈറ്റ് റഡാർ24ന്റെ കണക്കുകൾ പ്രകാരം 625 സർവീസുകളാണ് റദ്ദാക്കിയത്. തടസം തുടരുന്നതിനാൽ എണ്ണം ഇനിയും ഉയർന്നേക്കുമെന്നാണ് വിലയിരുത്തൽ.
എന്താണ് വിമാന സർവീസുകൾ താറുമാറാകാൻ കാരണം?
ബ്രിട്ടനിലെ വ്യോമഗതാഗത നിയന്ത്രണത്തിന് നേതൃത്വം നൽകുന്ന നാഷണൽ എയർ ട്രാഫിക് സർവീസസ് (NATS) ഉപയോഗിക്കുന്ന ഫ്ലൈറ്റ് പ്രോസസിങ് സംവിധാനത്തിലുണ്ടായ സാങ്കേതിക തകരാറാണ് പ്രതിസന്ധിക്ക് കാരണം.
വിമാനങ്ങളുടെ പുറപ്പെടലിനെ ബാധിക്കുന്ന സാങ്കേതിക പ്രശ്നം കണ്ടെത്തിയതായി ആദ്യം NATS അറിയിച്ചു. പിന്നീട് തകരാർ ഫ്ലൈറ്റ് പ്രോസസിങ് സംവിധാനത്തിലാണെന്ന് സ്ഥിരീകരിച്ചു. എൻജിനീയർമാർ അടിയന്തരമായി പ്രശ്നം പരിഹരിക്കാൻ ശ്രമിക്കുന്നതായും ബ്രിട്ടന്റെ വ്യോമപാത പൂർണമായി അടച്ചിട്ടില്ലെന്നും NATS വ്യക്തമാക്കി. വിമാനങ്ങൾ ഇപ്പോഴും സർവീസ് നടത്തുന്നുണ്ടെങ്കിലും സാങ്കേതിക തകരാർ മൂലം സാധാരണ വേഗത്തിൽ സർവീസുകൾ നിയന്ത്രിക്കാൻ കഴിയാത്ത സ്ഥിതിയാണുണ്ടായത്.
ഹീത്രൂ മുതൽ എഡിൻബറോ വരെ; നിരവധി വിമാനത്താവളങ്ങളിൽ പ്രതിസന്ധി
ഹീത്രൂ, ഗാറ്റ്വിക്, സ്റ്റാൻസ്റ്റഡ്, ലണ്ടൻ സിറ്റി വിമാനത്താവളങ്ങളെയാണ് തടസം ഏറ്റവും രൂക്ഷമായി ബാധിച്ചത്. മാഞ്ചസ്റ്റർ, ബർമിങ്ഹാം, ലൂട്ടൺ, എഡിൻബറോ, ഗ്ലാസ്ഗോ, അബർഡീൻ വിമാനത്താവളങ്ങളിലും സർവീസുകൾ തടസപ്പെട്ടു.
ഹീത്രൂവിൽ മാത്രം ഏകദേശം 100 സർവീസുകൾ റദ്ദാക്കിയതായും നൂറുകണക്കിന് വിമാനങ്ങൾ വൈകിയതായും റിപ്പോർട്ടുകളുണ്ട്. ഗാറ്റ്വിക്കിലും നിരവധി വിമാനങ്ങൾ വൈകി.
ബ്രിട്ടന് പുറത്തേക്കും പ്രതിസന്ധിയുടെ പ്രതിഫലനമുണ്ടായി. യൂറോപ്പിലെ വിവിധ വിമാനത്താവളങ്ങളിൽ ചില ഇൻബൗണ്ട് സർവീസുകൾ പിടിച്ചിടുകയും ചില വിമാനങ്ങൾ ബ്രസൽസ്, ആംസ്റ്റർഡാം, പാരിസ്, ഡസൽഡോർഫ് തുടങ്ങിയ വിമാനത്താവളങ്ങളിലേക്ക് തിരിച്ചുവിടുകയും ചെയ്തു.
എന്തുകൊണ്ട് ഒരു സാങ്കേതിക തകരാർ ഇത്ര വലിയ പ്രതിസന്ധിയുണ്ടാക്കി?
വിമാന ഗതാഗത നിയന്ത്രണ സംവിധാനം വിമാനക്കമ്പനികളുടെ സമയക്രമം, വിമാനത്താവളങ്ങളുടെ പ്രവർത്തനം, വിമാനങ്ങളുടെ റൂട്ട് പ്ലാനിങ് എന്നിവയുമായി നേരിട്ട് ബന്ധപ്പെട്ടാണ് പ്രവർത്തിക്കുന്നത്. സംവിധാനം തകരാറിലാകുമ്പോൾ സുരക്ഷ ഉറപ്പാക്കാൻ ഒരേസമയം നിയന്ത്രിക്കാവുന്ന വിമാനങ്ങളുടെ എണ്ണം കുറയ്ക്കേണ്ടിവരും.
ഇതോടെ വിമാനങ്ങൾ വൈകുകയും സർവീസുകൾ റദ്ദാക്കുകയും ചെയ്യും. വിമാനങ്ങളും ജീവനക്കാരും നിശ്ചയിച്ച സ്ഥലങ്ങളിൽ എത്താതെ വരുന്നതോടെ തുടർന്നുള്ള സർവീസുകളെയും ഇത് ബാധിക്കും. അതിനാൽ യഥാർഥ സാങ്കേതിക പ്രശ്നം പരിഹരിച്ച ശേഷവും പ്രതിസന്ധി മണിക്കൂറുകളോളം തുടരാൻ സാധ്യതയുണ്ട്.
ഇന്ത്യ-ബ്രിട്ടൻ സർവീസുകളെയും ബാധിച്ചു
ബ്രിട്ടനിലെ പ്രതിസന്ധി ഇന്ത്യ-യുകെ വിമാന സർവീസുകളെയും ബാധിച്ചു. പ്രത്യേകിച്ച് ഹീത്രൂവിൽ നിന്നുള്ള ദീർഘദൂര സർവീസുകളിലാണ് തടസം അനുഭവപ്പെട്ടത്.
ഇന്ത്യയിലേക്കും തിരിച്ചുമുള്ള നിരവധി സർവീസുകളുടെ പ്രധാന ഹബ്ബാണ് ഹീത്രൂ. എയർ ഇന്ത്യയും ബ്രിട്ടീഷ് എയർവേയ്സും ലണ്ടനിൽ നിന്ന് ഇന്ത്യയിലെ വിവിധ നഗരങ്ങളിലേക്ക് സർവീസുകൾ നടത്തുന്നുണ്ട്.
ഓരോ വിമാനത്തിന്റെയും സ്ഥിതി വ്യത്യസ്തമായതിനാൽ യാത്രക്കാർ വിമാനക്കമ്പനികളുടെ ലൈവ് ഫ്ലൈറ്റ് സ്റ്റാറ്റസ് പരിശോധിക്കണമെന്ന് അധികൃതർ നിർദേശിച്ചു. വിമാനം സ്ഥിരീകരിച്ച ശേഷമേ ഹീത്രൂ വിമാനത്താവളത്തിലേക്ക് എത്താവൂ എന്നും അധികൃതർ അറിയിച്ചു.
വിമാനക്കമ്പനികളുടെ പ്രതിഷേധം ശക്തം
അതേസമയം, NATSനെതിരെ വിമാനക്കമ്പനികൾ രൂക്ഷ വിമർശനവുമായി രംഗത്തെത്തി. റയാനെയറിന്റെ 65,000ലേറെ യാത്രക്കാരെ പ്രതിസന്ധി ബാധിച്ചതായി കമ്പനി അറിയിച്ചു. NATS ചീഫ് എക്സിക്യൂട്ടീവ് മാർട്ടിൻ റോൾഫിന്റെ രാജിയും റയാനെയർ ആവശ്യപ്പെട്ടു.
പ്രധാന ദേശീയ അടിസ്ഥാനസൗകര്യ സംവിധാനത്തിലെ ആവർത്തിച്ചുള്ള തകരാറുകൾ അംഗീകരിക്കാനാകില്ലെന്ന് വിസ് എയറും വിമർശിച്ചു. പ്രശ്നം തങ്ങളുടെ നിയന്ത്രണത്തിന് പുറത്താണെന്നും യാത്രക്കാരെ സഹായിക്കാൻ എല്ലാ നടപടികളും സ്വീകരിക്കുന്നുണ്ടെന്നും ബ്രിട്ടീഷ് എയർവേയ്സ് അറിയിച്ചു. യൂറോപ്പിലുടനീളമുള്ള സർവീസുകളെയും തകരാർ ബാധിച്ചതായി ഈസിജെറ്റും വ്യക്തമാക്കി.
