കോഴിക്കോട്: ദുർഗാഷ്ടമി ദിനമായ ഒക്ടോബർ 19ന് സംസ്ഥാനത്തെ എല്ലാ വിദ്യാലയങ്ങൾക്കും പൊതുഅവധി പ്രഖ്യാപിക്കണമെന്ന് ആവശ്യപ്പെട്ട് നാഷണൽ ടീച്ചേഴ്സ് യൂണിയൻ (എൻടിയു) വിദ്യാഭ്യാസമന്ത്രിക്ക് കത്ത് നൽകി. സംസ്ഥാന ജനറൽ സെക്രട്ടറി ടി. അനൂപ് കുമാറാണ് ആവശ്യം ഉന്നയിച്ച് വിദ്യാഭ്യാസവകുപ്പിന് കത്ത് നൽകിയത്.
ഒക്ടോബർ 18നാണ് ഇത്തവണ ഗ്രന്ഥംവെപ്പ്. ഗ്രന്ഥംവെപ്പിന് ശേഷം പൂജയ്ക്ക് വച്ചിരിക്കുന്ന പുസ്തകങ്ങളും ഗ്രന്ഥങ്ങളും പഠനോപകരണങ്ങളും ഉപയോഗിക്കുകയോ തൊടുകയോ ചെയ്യരുതെന്ന വിശ്വാസമാണ് പിന്തുടരുന്നതെന്ന് എൻടിയു ചൂണ്ടിക്കാട്ടുന്നു.
എന്നാൽ ഒക്ടോബർ 19ന് ദുർഗാഷ്ടമി ദിനം പ്രവർത്തിദിനമായി തുടർന്നാൽ വിദ്യാർത്ഥികൾക്കും അധ്യാപകർക്കും പുസ്തകങ്ങളും മറ്റ് പഠനോപകരണങ്ങളും ഉപയോഗിക്കേണ്ടിവരും. ഗ്രന്ഥംവെപ്പിന്റെ ഭാഗമായി പാലിച്ചുവരുന്ന വിശ്വാസങ്ങളും ആചാരങ്ങളും ഇതുവഴി ലംഘിക്കപ്പെടുന്ന സാഹചര്യമുണ്ടാകുമെന്നാണ് എൻടിയുവിന്റെ വാദം.