ന്യൂഡല്ഹി: ഇന്ത്യന് ക്രിക്കറ്റ് താരവും യുവജനങ്ങളുടെ പ്രിയതാരവുമായ സഞ്ജു സാംസണെ ഡല്ഹിയിലെ മോട്ടി നഗറിലെ ജന കൗശല് കേന്ദ്രത്തിന്റെ ബ്രാന്ഡ് അംബാസഡറായി നിയമിച്ചു. മദന് ലാല് ഖുറാന ഫൗണ്ടേഷന്റെ നേതൃത്വത്തിലുള്ള സംരംഭമാണിത്. ഡല്ഹി മുഖ്യമന്ത്രി രേഖ ഗുപ്തയാണ് സഞ്ജുവിനെ സന്ദര്ശിച്ച ശേഷം നിയമനം പ്രഖ്യാപിച്ചത്. സഞ്ജുവിനെ ഉള്പ്പെടുത്തി തയ്യാറാക്കിയ ജന കൗശല് കേന്ദ്രത്തിന്റെ ഔദ്യോഗിക പോസ്റ്ററും രേഖ ഗുപ്തയും സഞ്ജു സാംസണും ചേര്ന്ന് പ്രകാശനം ചെയ്തു. ”ഭാരതത്തിന്റെ സ്റ്റാര് ക്രിക്കറ്ററും യുവജനങ്ങളുടെ പ്രചോദനവുമായ സഞ്ജു സാംസണെ സന്ദര്ശിച്ച് ‘ടീം ഡല്ഹി’യില് ചേര്ന്നതില് അഭിനന്ദിച്ചു,” എന്നായിരുന്നു മുഖ്യമന്ത്രിയുടെ ഫേസ്ബുക്ക് കുറിപ്പ്.
സഞ്ജുവിന് ഡല്ഹിയുമായി പ്രത്യേക ബന്ധമുണ്ടെന്നും മുഖ്യമന്ത്രി പറഞ്ഞു. ബാല്യകാലത്തിന്റെ പ്രധാനഘട്ടം ഡല്ഹിയില് ചെലവഴിച്ച സഞ്ജു അവിടെവച്ചാണ് ക്രിക്കറ്റിലേക്കുള്ള തന്റെ യാത്ര ആരംഭിച്ചത്. ജന കൗശല് കേന്ദ്രത്തിന്റെ ബ്രാന്ഡ് അംബാസഡറെന്ന നിലയില് ഡല്ഹിയിലെ യുവാക്കളെ നൈപുണ്യ വികസനം, തൊഴില് അവസരങ്ങള്, സ്വയംപര്യാപ്തത എന്നിവയിലേക്ക് പ്രചോദിപ്പിക്കുകയാണ് ലക്ഷ്യമിടുന്നത്. രേഖ ഗുപ്തയുടെ മണ്ഡലമായ ഷാലിമാര് ബാഗില് ജന കൗശല് കേന്ദ്രത്തിന് കീഴില് സെന്റര് ഓഫ് എക്സലന്സ് ആരംഭിക്കുന്നതിനെക്കുറിച്ചും സര്ക്കാര് ചര്ച്ചകള് നടത്തിവരികയാണ്.
അടുത്ത ഒരു വര്ഷത്തിനിടെ ഒരു കോടി ആളുകള്ക്ക് ആര്ട്ടിഫിഷ്യല് ഇന്റലിജന്സ് മേഖലയില് നൈപുണ്യം നല്കുകയെന്ന പ്രധാനമന്ത്രി നരേന്ദ്ര മോദിയുടെ കാഴ്ചപ്പാട് യുവാക്കളിലേക്ക് എത്തിക്കുന്നതിനായി തയ്യാറാക്കുന്ന വീഡിയോ സന്ദേശത്തിലും സഞ്ജു സാംസണ് പങ്കെടുക്കുമെന്നാണ് പ്രതീക്ഷിക്കുന്നത്. എംഎല്എ ഹരീഷ് ഖുറാന, ട്രിനിറ്റി ഫൗണ്ടേഷന്റെ മുതിര്ന്ന അംഗങ്ങള്, ഐഎസിടി എജ്യുക്കേഷന്റെ പ്രതിനിധികള് തുടങ്ങിയവരും ചടങ്ങില് പങ്കെടുത്തു.