കൊച്ചി: തെലുങ്ക് സൂപ്പർ താരം നാനിയെ നായകനാക്കി ശ്രീകാന്ത് ഒഡേല സംവിധാനം ചെയ്യുന്ന പാൻ ഇന്ത്യൻ ചിത്രം ‘ദ പാരഡൈസ്’ സെപ്റ്റംബർ 24ന് ആഗോള റിലീസായി തിയേറ്ററുകളിലെത്തും. ദുൽഖർ സൽമാന്റെ വേഫെറർ ഫിലിംസ് ആണ് ചിത്രം കേരളത്തിൽ വമ്പൻ റിലീസായി പ്രേക്ഷകരിലേക്ക് എത്തിക്കുന്നത്. ശ്രീലക്ഷ്മി വെങ്കടേശ്വര സിനിമാസിന്റെ ബാനറിൽ ഒരുങ്ങുന്ന ചിത്രത്തിന്റെ നിർമ്മാണം സുധാകർ ചെറുകുറിയാണ്.
‘ദസറ’ എന്ന ബ്ലോക്ക്ബസ്റ്റർ ചിത്രത്തിന് ശേഷം നാനിയും ശ്രീകാന്ത് ഒഡേലയും വീണ്ടും ഒന്നിക്കുന്ന ചിത്രം കൂടിയാണ് ‘ദ പാരഡൈസ്’. ‘ദസറ’യുടെ നിർമ്മാതാവായ സുധാകർ ചെറുകുറി തന്നെയാണ് ഈ ചിത്രത്തിന്റെയും നിർമ്മാതാവ്. വലിയ കാൻവാസിൽ ആക്ഷന് പ്രാധാന്യം നൽകി ഒരുക്കിയിരിക്കുന്ന ചിത്രത്തിനൊപ്പം ശക്തമായ വൈകാരികതയും ഉണ്ടാകുമെന്ന് നാനി നേരത്തെ വ്യക്തമാക്കിയിരുന്നു. അമ്മയും മകനും തമ്മിലുള്ള ബന്ധത്തിന്റെ വൈകാരിക കഥയും ചിത്രത്തിന്റെ പ്രമേയത്തിന്റെ ഭാഗമാണ്.
നാനിയും സംഗീത സംവിധായകൻ അനിരുദ്ധ് രവിചന്ദറും വീണ്ടും ഒന്നിക്കുന്ന ചിത്രം കൂടിയാണിത്. ‘ജേഴ്സി’, ‘ഗാങ് ലീഡർ’ എന്നീ ചിത്രങ്ങൾക്ക് ശേഷം ഇരുവരും ഒരുമിക്കുന്ന ‘ദ പാരഡൈസ്’ വലിയ പ്രതീക്ഷയോടെയാണ് ആരാധകർ കാത്തിരിക്കുന്നത്. ചിത്രത്തിൽ നിന്നു നേരത്തെ പുറത്തിറങ്ങിയ ‘ആയാ ഷേർ’, ‘യേഷാ നഗുല’ എന്നീ ഗാനങ്ങൾ സമൂഹമാധ്യമങ്ങളിൽ ശ്രദ്ധ നേടിയിരുന്നു.
നാനിയുടെ കരിയറിലെ ഏറ്റവും വലിയ പ്രോജക്ടുകളിലൊന്നായി ഒരുക്കിയിരിക്കുന്ന ചിത്രത്തിൽ ജദാൽ എന്ന കഥാപാത്രത്തെയാണ് താരം അവതരിപ്പിക്കുന്നത്. നാനിയുടെ കരിയറിലെ തന്നെ ഏറ്റവും വലിയ മാസ്സ് അവതാരമായാണ് ജദാലിനെ ചിത്രത്തിൽ അവതരിപ്പിച്ചിരിക്കുന്നതെന്നാണ് അണിയറപ്രവർത്തകർ വ്യക്തമാക്കുന്നത്.
ചിത്രത്തിന്റെ ടീസറും നേരത്തെ പ്രേക്ഷകശ്രദ്ധ നേടിയിരുന്നു. ത്രസിപ്പിക്കുന്ന ആക്ഷൻ രംഗങ്ങൾ, മാസ്സ് ഡയലോഗുകൾ, ബ്രഹ്മാണ്ഡമായ ദൃശ്യങ്ങൾ എന്നിവയിലൂടെ ടീസർ വലിയ ചർച്ചയായി. ചിത്രത്തിലെ ആക്ഷനും വയലൻസിനും നൽകുന്ന പ്രാധാന്യവും ടീസറിൽനിന്ന് വ്യക്തമായിരുന്നു.
‘കിൽ’ എന്ന ചിത്രത്തിലൂടെ ശ്രദ്ധ നേടിയ ബോളിവുഡ് താരം രാഘവ് ജൂയൽ ആണ് ‘ദ പാരഡൈസ്’ൽ വില്ലൻ വേഷത്തിലെത്തുന്നത്. വിക്രം മാലിക് എന്ന കഥാപാത്രത്തെയാണ് രാഘവ് അവതരിപ്പിക്കുന്നത്. കഥാപാത്രത്തെ പരിചയപ്പെടുത്തിയ ഗ്ലിമ്പ്സ് വീഡിയോയും നേരത്തെ ശ്രദ്ധ നേടിയിരുന്നു.
നാനിക്കും രാഘവ് ജൂയലിനും പുറമെ കായദു ലോഹർ, സമ്പൂർണേഷ് ബാബു, മോഹൻ ബാബു, സോണാലി കുൽക്കർണി, ഈശ്വരി റാവു, രാജ രവീന്ദ്ര, തനികേല ഭരണി, എം.എസ്. ചൗധരി, രാം ജഗൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.
തെലുങ്കിന് പുറമെ കന്നഡ, മലയാളം, തമിഴ്, ഹിന്ദി, ബംഗാളി, ഇംഗ്ലീഷ്, സ്പാനിഷ് ഭാഷകളിലും ചിത്രം പ്രദർശനത്തിനെത്തും. ആകെ എട്ട് ഭാഷകളിലാണ് ‘ദ പാരഡൈസ്’ ആഗോളതലത്തിൽ റിലീസ് ചെയ്യുന്നത്.
രചന, സംവിധാനം: ശ്രീകാന്ത് ഒഡേല
നിർമ്മാതാവ്: സുധാകർ ചെറുകുറി
ബാനർ: എസ്.എൽ.വി. സിനിമാസ്
ഛായാഗ്രഹണം: സി.എച്ച്. സായ്
സംഗീതം: അനിരുദ്ധ് രവിചന്ദർ
എഡിറ്റിംഗ്: നവീൻ നൂലി
പ്രൊഡക്ഷൻ ഡിസൈൻ: അവിനാഷ് കൊല്ല
ഓഡിയോ: സരിഗമ മ്യൂസിക്
മാർക്കറ്റിംഗ്: ഫസ്റ്റ് ഷോ
പി.ആർ.ഒ: ശബരി
ആക്ഷൻ, മാസ്സ് അവതാരം, അമ്മ-മകൻ ബന്ധത്തിന്റെ വൈകാരികത, അനിരുദ്ധിന്റെ സംഗീതം, നാനി-രാഘവ് ജൂയൽ ഏറ്റുമുട്ടൽ തുടങ്ങി നിരവധി ഘടകങ്ങളുമായാണ് ‘ദ പാരഡൈസ്’ തിയേറ്ററുകളിലേക്ക് എത്തുന്നത്. സെപ്റ്റംബർ 24നാണ് ആഗോള റിലീസ്.