മധുര: ചരിത്രപ്രസിദ്ധമായ മഹാകുംഭാഭിഷേകത്തിന് പിന്നാലെ മധുര മീനാക്ഷി സുന്ദരേശ്വര ക്ഷേത്രത്തിൽ വൻ ഭക്തജനത്തിരക്ക്. വെള്ളിയാഴ്ച മാത്രം 40,000-ത്തിലധികം ഭക്തരാണ് നീണ്ട ക്യൂവിൽ നിന്ന് ദേവിയുടെ ദർശനം നടത്തിയത്.
17 വർഷത്തിന് ശേഷമാണ് മധുര മീനാക്ഷി സുന്ദരേശ്വര ക്ഷേത്രത്തിൽ മഹാകുംഭാഭിഷേകം നടന്നത്. സെപ്റ്റംബർ 17ന് നടന്ന മഹാകുംഭാഭിഷേക ചടങ്ങുകൾക്ക് മുന്നോടിയായി സെപ്റ്റംബർ 11 മുതൽ യാഗശാലാ പൂജകൾ ആരംഭിച്ചിരുന്നു. വൈഗൈ നദിയിൽനിന്നും ഗംഗയിൽനിന്നും എത്തിച്ച പുണ്യജലം ഉപയോഗിച്ചായിരുന്നു ചടങ്ങുകൾ.
മഹാകുംഭാഭിഷേകത്തിന്റെ പ്രധാന ചടങ്ങ് സെപ്റ്റംബർ 17ന് രാവിലെ 7.40നും 8.10നും ഇടയിലുള്ള ശുഭമുഹൂർത്തത്തിലായിരുന്നു. ക്ഷേത്രവിമാനങ്ങളിലും 14 രാജഗോപുരങ്ങളിലും ശൈവാചാര്യന്മാർ വേദമന്ത്രങ്ങളും പാസുരങ്ങളും ഉരുവിട്ട് പുണ്യജലം ഒഴിച്ച് കുംഭാഭിഷേകം നടത്തി.
തമിഴ്നാട്ടിന്റെ വിവിധ ഭാഗങ്ങളിൽനിന്നും രാജ്യത്തിന്റെ മറ്റു സംസ്ഥാനങ്ങളിൽനിന്നും വിദേശത്തുനിന്നും ഉൾപ്പെടെ വലിയ തോതിൽ ഭക്തരാണ് ചടങ്ങുകൾക്ക് മധുരയിലെത്തിയത്.
15 ദിവസത്തെ പ്രത്യേക പൂജകൾ
കുംഭാഭിഷേകത്തിന് പിന്നാലെ 15 ദിവസത്തെ പ്രത്യേക മണ്ഡല അഭിഷേക പൂജകളും ക്ഷേത്രത്തിൽ നടക്കുകയാണ്. ഇതോടെയാണ് ക്ഷേത്രത്തിൽ തുടർച്ചയായി വലിയ ഭക്തജനത്തിരക്ക് അനുഭവപ്പെടുന്നത്.
വെള്ളിയാഴ്ച മീനാക്ഷി അമ്മന്റെ ദർശനത്തിനായി മാത്രം 40,000-ത്തിലധികം ഭക്തർ എത്തിയതോടെ ക്ഷേത്ര പരിസരത്ത് നീണ്ട ക്യൂ രൂപപ്പെട്ടു. ഭക്തർക്ക് സുഗമമായും സുരക്ഷിതമായും ദർശനം നടത്തുന്നതിനായി ക്ഷേത്ര ഭരണകൂടവും മധുര സിറ്റി പോലീസും ചേർന്ന് പ്രത്യേക സുരക്ഷാ സംവിധാനങ്ങളും റൂട്ട് ക്രമീകരണങ്ങളും ഏർപ്പെടുത്തിയിട്ടുണ്ട്.