ന്യൂഡല്‍ഹി: റഷ്യ-യുക്രെയ്ന്‍ യുദ്ധത്തില്‍ വെടിനിര്‍ത്തലിനും സമാധാനത്തിനുമായി ഇന്ത്യ മുന്നോട്ടുവെച്ച നിര്‍ദേശത്തെ പ്രശംസിച്ച് യുക്രെയ്ന്‍. നിലവില്‍ ചര്‍ച്ചയിലുള്ള നാല് നിര്‍ദേശങ്ങളില്‍ ഇന്ത്യയുടേതാണ് ഏറ്റവും സമഗ്രമെന്ന് യുക്രെയ്ന്‍ വിദേശകാര്യ മന്ത്രി ആന്‍ഡ്രി സിബിഹ പറഞ്ഞു. സമാധാന ശ്രമങ്ങളില്‍ സജീവ പങ്കാളിത്തത്തിന് ഇന്ത്യ ആദ്യമായി സന്നദ്ധത അറിയിച്ചതായും അദ്ദേഹം വ്യക്തമാക്കി. ഇന്ത്യയ്‌ക്ക് പുറമെ അമേരിക്ക, തുര്‍ക്കി, ഈജിപ്ത് എന്നീ രാജ്യങ്ങളും വെടിനിര്‍ത്തലുമായി ബന്ധപ്പെട്ട നിര്‍ദേശങ്ങള്‍ മുന്നോട്ടുവച്ചിട്ടുണ്ട്.
ഊര്‍ജ മേഖലയിലെ എല്ലാ സ്ഥാപനങ്ങള്‍ക്കും, തുറമുഖ അടിസ്ഥാനസൗകര്യങ്ങള്‍ ഉള്‍പ്പെടെ, നേരെയുള്ള ആക്രമണങ്ങള്‍ അവസാനിപ്പിക്കുന്നതിനൊപ്പം കരിങ്കടലില്‍ വെടിനിര്‍ത്തല്‍ നടപ്പാക്കുന്നതാണ് ഇന്ത്യയുടെ നിര്‍ദേശത്തിന്റെ പ്രധാന ഭാഗമെന്ന് സിബിഹ വിശദീകരിച്ചു. കരിങ്കടലിലെ വെടിനിര്‍ത്തല്‍ കാര്‍ഷിക ഉല്‍പ്പന്നങ്ങളുടെ കയറ്റുമതി പുനഃസ്ഥാപിക്കുന്നതിനും ഭക്ഷ്യധാന്യ നീക്കം സുരക്ഷിതമാക്കുന്നതിനും സഹായിക്കുമെന്നാണ് യുക്രെയ്ന്‍ നിലപാട്. തുര്‍ക്കിയും ഈജിപ്തും സമാനമായി കരിങ്കടലില്‍ ധാന്യവിതരണം പുനഃസ്ഥാപിക്കുന്നതിനുള്ള വെടിനിര്‍ത്തല്‍ നിര്‍ദേശങ്ങള്‍ മുന്നോട്ടുവച്ചിട്ടുണ്ടെന്നും സിബിഹ പറഞ്ഞു.
നിലവില്‍ ഇന്ത്യ, തുര്‍ക്കി, ഈജിപ്ത്, അമേരിക്ക എന്നീ രാജ്യങ്ങളുടെ നാല് നിര്‍ദേശങ്ങളാണ് യുക്രെയ്ന്‍ പരിഗണിക്കുന്നത്. ഊര്‍ജ മേഖലയിലെ ആക്രമണം അവസാനിപ്പിക്കണമെന്നാണ് അമേരിക്കയുടെ നിര്‍ദേശമെന്നും കരിങ്കടലിലെ ഭക്ഷ്യധാന്യ ഗതാഗതം പുനഃസ്ഥാപിക്കുന്നതിലാണ് തുര്‍ക്കിയുടെയും ഈജിപ്തിന്റെയും നിര്‍ദേശങ്ങള്‍ പ്രധാനമായും ശ്രദ്ധ കേന്ദ്രീകരിക്കുന്നതെന്നും സിബിഹ വ്യക്തമാക്കി. യുദ്ധരേഖയില്‍ സമ്പൂര്‍ണ വെടിനിര്‍ത്തല്‍ ഉള്‍പ്പെടെയുള്ള വിവിധ സാധ്യതകള്‍ ചര്‍ച്ച ചെയ്യാന്‍ യുക്രെയ്ന്‍ തയ്യാറാണെന്നും സിബിഹ പറഞ്ഞു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
അതേസമയം, വെടിനിര്‍ത്തല്‍ കരാര്‍ നടപ്പാക്കുന്നതിന് റഷ്യയുടെ നിലപാടും നിര്‍ണായകമാകും. റഷ്യ-യുക്രെയ്ന്‍ സംഘര്‍ഷത്തിന് നയതന്ത്രത്തിലൂടെയും ചര്‍ച്ചകളിലൂടെയും പരിഹാരം കാണണമെന്ന നിലപാടാണ് ഇന്ത്യ തുടര്‍ച്ചയായി വ്യക്തമാക്കുന്നത്.