നാഷ്‌വിൽ: അമേരിക്കയിലെ ടെന്നസി സംസ്ഥാനത്ത് വധശിക്ഷയ്‌ക്ക് വിധിക്കപ്പെട്ട ക്രിസ്റ്റ പൈക്കിന്റെ (50) വധശിക്ഷ നടപ്പാക്കാനുള്ള ശ്രമം പരാജയപ്പെട്ടു. രണ്ട് ഡോസ് പെന്റോബാർബിറ്റൽ എന്ന മാരകമരുന്ന് നൽകിയിട്ടും ക്രിസ്റ്റ പൈക്ക് മരിച്ചില്ല. തുടർന്ന് ഇവരെ ആംബുലൻസിൽ ആശുപത്രിയിലേക്ക് മാറ്റി.
റിവർബെൻഡ് മാക്സിമം സെക്യൂരിറ്റി ഇൻസ്റ്റിറ്റ്യൂട്ടിൽ ബുധനാഴ്ച രാത്രിയായിരുന്നു വധശിക്ഷ നടപ്പാക്കാൻ ശ്രമിച്ചത്. മാധ്യമപ്രവർത്തകരെ സാക്ഷികളായി അനുവദിച്ചിരുന്നു. നടപടിക്കിടെ രണ്ട് ഡോസ് മരുന്ന് നൽകിയതായി അഭിഭാഷകർ കോടതിയിൽ സമർപ്പിച്ച രേഖകളിൽ പറയുന്നു.
മരുന്ന് നൽകിയ ശേഷവും ക്രിസ്റ്റ പൈക്ക് ബോധരഹിതയായില്ലെന്നാണ് മാധ്യമസാക്ഷികളുടെ റിപ്പോർട്ട്. വധശിക്ഷാ മുറിയിൽനിന്ന് ശ്വാസമെടുക്കുന്നതും കൂർക്കംവലിക്കുന്നതുമായ ശബ്ദങ്ങൾ കേട്ടിരുന്നതായും സാക്ഷികൾ പറഞ്ഞു. രണ്ടാമത്തെ ഡോസ് നൽകിയ ശേഷവും ഇവർ ജീവനോടെയുണ്ടായിരുന്നുവെന്നാണ് റിപ്പോർട്ടുകൾ.
ഇതോടെയാണ് ക്രിസ്റ്റ പൈക്കിന്റെ അഭിഭാഷകർ അടിയന്തരമായി കോടതിയെ സമീപിച്ചത്. വധശിക്ഷ നിർത്തിവെക്കണമെന്ന് ആവശ്യപ്പെട്ടായിരുന്നു ഹർജി. തുടർന്ന് വധശിക്ഷാ നടപടികൾ അവസാനിപ്പിക്കുകയും ക്രിസ്റ്റ പൈക്കിനെ ആശുപത്രിയിലേക്ക് മാറ്റുകയുമായിരുന്നു. ഇവരുടെ നിലവിലെ ആരോഗ്യനില സംബന്ധിച്ച് അധികൃതർ വിശദമായ വിവരങ്ങൾ പുറത്തുവിട്ടിട്ടില്ല.
ടെന്നസിയിൽ ശേഷിക്കുന്ന വധശിക്ഷകൾ നിർത്തിവെച്ചു
സംഭവത്തിന് പിന്നാലെ ടെന്നസി ഗവർണർ ബിൽ ലീ 2026ൽ ഇനി നിശ്ചയിച്ചിരുന്ന വധശിക്ഷകൾ നിർത്തിവെച്ചു. ക്രിസ്റ്റ പൈക്കിന്റെ വധശിക്ഷാ നടപടിയിൽ യഥാർഥത്തിൽ എന്താണ് സംഭവിച്ചതെന്ന് കണ്ടെത്താൻ സമഗ്രമായ മൂന്നാംകക്ഷി അന്വേഷണം നടത്താൻ ഉത്തരവിട്ടതായും ഗവർണർ അറിയിച്ചു.
അതേസമയം, ടെന്നസി ഡിപ്പാർട്ട്മെന്റ് ഓഫ് കറക്ഷൻസ് തങ്ങൾ സംസ്ഥാനത്തിന്റെ നിയമപരമായി അംഗീകരിച്ച വധശിക്ഷാ നടപടിക്രമത്തിലെ എല്ലാ ഘട്ടങ്ങളും പാലിച്ചെന്നാണ് വ്യക്തമാക്കിയത്. നടപടിക്രമത്തിൽ ആദ്യ ഡോസിന് ശേഷം തടവുകാരി മരിച്ചിട്ടില്ലെങ്കിൽ രണ്ടാമത്തെ ഡോസ് നൽകുന്നതിനുള്ള വ്യവസ്ഥയുണ്ടെന്നും അധികൃതർ വ്യക്തമാക്കി.
ക്രിസ്റ്റ പൈക്കിന്റെ അഭിഭാഷകർ, നടപടിക്കിടെ സിര കണ്ടെത്തുന്നതിലുണ്ടായ ബുദ്ധിമുട്ട്, മരുന്നിന്റെ നിലവാരം തുടങ്ങിയവ സംബന്ധിച്ച് ആരോപണങ്ങൾ ഉന്നയിച്ചിട്ടുണ്ട്. എന്നാൽ ഇവ അഭിഭാഷകരുടെ ആരോപണങ്ങളാണ്; സംഭവത്തിൽ പ്രഖ്യാപിച്ചിരിക്കുന്ന സ്വതന്ത്ര അന്വേഷണത്തിലൂടെയാകും നടപടിക്രമത്തിൽ വീഴ്ച സംഭവിച്ചോയെന്ന് വ്യക്തമാകുക.
1995ലെ കൊലപാതകക്കേസിൽ വധശിക്ഷ
1995ൽ 18 വയസ്സുള്ളപ്പോഴാണ് ക്രിസ്റ്റ പൈക്ക് സഹപാഠിയായ 19കാരി കോളീൻ സ്ലെമ്മറെ കൊലപ്പെടുത്തിയ കേസിൽ കുറ്റക്കാരിയാകുന്നത്. ടെന്നസിയിലെ നോക്സ്‌വില്ലിലുള്ള ജോബ് കോർപ്സ് പരിശീലനകേന്ദ്രവുമായി ബന്ധപ്പെട്ടാണ് കൊലപാതകം നടന്നത്. കേസിൽ ക്രിസ്റ്റ പൈക്കിന് വധശിക്ഷ ലഭിക്കുകയായിരുന്നു.
വധശിക്ഷ നടപ്പാക്കിയിരുന്നെങ്കിൽ 200 വർഷത്തിലേറെയായി ടെന്നസിയിൽ വധിക്കപ്പെടുന്ന ആദ്യ വനിത എന്ന നിലയിൽ ക്രിസ്റ്റ പൈക്ക് മാറുമായിരുന്നു. ടെന്നസി സംസ്ഥാനത്തെ വധശിക്ഷാ ചരിത്രത്തിൽ ഏറെ ശ്രദ്ധ നേടിയ കേസാണിത്.
വധശിക്ഷ നടപ്പാക്കുന്നതിന് മണിക്കൂറുകൾക്ക് മുമ്പ് യുഎസ് സുപ്രീം കോടതി കീഴ്‌ക്കോടതി ഏർപ്പെടുത്തിയിരുന്ന സ്റ്റേ നീക്കിയിരുന്നു. ഇതോടെയാണ് സംസ്ഥാനത്തിന് വധശിക്ഷാ നടപടിയുമായി മുന്നോട്ടുപോകാൻ വഴിയൊരുങ്ങിയത്. എന്നാൽ മണിക്കൂറുകൾക്കകം നടപടിക്രമം പരാജയപ്പെടുകയായിരുന്നു.
