ഈരാറ്റുപേട്ട: ഇടിമിന്നലേറ്റ് ആന ചരിഞ്ഞു. മേലമ്പാറയില്‍ രാജേഷ് പല്ലാട്ടിന്റെ ഉടമസ്ഥതയിലുള്ള പല്ലാട്ട് ബ്രഹ്‌മദത്തനാണ് ഇടിമിന്നലേറ്റ് ചരിഞ്ഞത്. വീട്ടുമുറ്റത്ത് തളച്ചിരുന്ന ആനയ്‌ക്കാണ് ഇന്ന് വൈകിട്ട് ഇടിമിന്നലേറ്റത്. സംഭവത്തില്‍ ആനയ്‌ക്ക് ജീവന്‍ നഷ്ടമായി. അരുണാചലില്‍ നിന്ന് കേരളത്തിലെത്തിച്ച ബ്രഹ്‌മദത്തന്‍ 25 വര്‍ഷമായി കേരളത്തിലുണ്ടായിരുന്നു. ഏകദേശം 45 വയസായിരുന്നു പ്രായം. സുന്ദരമായ ശരീരഘടനയും ശാന്തസ്വഭാവവും കൊണ്ട് ആനപ്രേമികളുടെ ഇഷ്ട ഗജവീരനായി മാറിയിരുന്നു.
കേരളത്തിലെ നിരവധി ക്ഷേത്രങ്ങളിലെ ഉത്സവങ്ങളില്‍ ബ്രഹ്‌മദത്തന്‍ നിറസാന്നിധ്യമായിരുന്നു. ഏറ്റുമാനൂര്‍, തിരുനക്കര, ശക്തികുളങ്ങര, തൊടുപുഴ ഉള്‍പ്പെടെയുള്ള പ്രമുഖ ക്ഷേത്രങ്ങളിലെ ഉത്സവങ്ങളില്‍ പ്രധാന തിടമ്പേറ്റിയിരുന്നത് ബ്രഹ്‌മദത്തനായിരുന്നു. തൃശൂര്‍ പൂരത്തിലും സ്ഥിരസാന്നിധ്യമായിരുന്നു. കോട്ടയം പുതുപ്പള്ളി സ്വദേശിയായ പോത്തന്‍ വര്‍ഗീസ് അച്ചായനാണ് ബ്രഹ്‌മദത്തനെ അരുണാചലില്‍ നിന്ന് കേരളത്തിലെത്തിച്ചത്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
നേരത്തെ ‘പുതുപ്പള്ളി ബ്രഹ്‌മദത്തന്‍’ എന്ന പേരിലാണ് ആന അറിയപ്പെട്ടിരുന്നത്. ഉത്സവപ്പറമ്പുകളില്‍ തലയെടുപ്പോടെ നിറഞ്ഞുനിന്നിരുന്ന ബ്രഹ്‌മദത്തന്റെ അപ്രതീക്ഷിത വിയോഗം ആനപ്രേമികള്‍ക്ക് വലിയ നഷ്ടമായി. വര്‍ഷങ്ങളോളം കേരളത്തിലെ ക്ഷേത്രോത്സവങ്ങളുടെ ഭാഗമായി നിന്ന ഗജവീരനാണ് ഇടിമിന്നലില്‍ വിടപറഞ്ഞത്.