തിരുവനന്തപുരം: അമ്മയുടെ ഫോണിൽ നിന്ന് വാട്സാപ്പ് ഡിലീറ്റ് ചെയ്തെന്നാരോപിച്ച് ആറുവയസുകാരിയെ ക്രൂരമായി മർദിച്ചു. തിരുവനന്തപുരം നെയ്യാറ്റിൻകരയിലെ ഉദിയൻകുളങ്ങരയിലാണ് സംഭവം. ഉദിയൻകുളങ്ങര സ്വദേശികളായ വിഷ്ണു–ശോഭ ദമ്പതികളുടെ ഇളയ മകൾ വിഷ്ണു നന്ദ (6)യ്‌ക്കാണ് മർദനമേറ്റത്. സംഭവത്തിൽ കുട്ടിയുടെ അമ്മയെ പൊലീസ് കസ്റ്റഡിയിലെടുത്തു.
അമ്മയുടെ ഫോണിൽ നിന്ന് വാട്സാപ്പ് നീക്കം ചെയ്തതാണ് മർദനത്തിന് കാരണമായതെന്നാണ് പ്രാഥമിക നിഗമനം. മർദനത്തിൽ കുട്ടിയുടെ മുഖത്ത് ഗുരുതരമായി പരിക്കേറ്റു. തുടർന്ന് കുഞ്ഞിനെ നെയ്യാറ്റിൻകര ജനറൽ ആശുപത്രിയിൽ പ്രവേശിപ്പിച്ചു.
കട്ടിലിൽ നിന്ന് വീണെന്ന് പറഞ്ഞ് ആശുപത്രിയിലെത്തിച്ചു
കുട്ടി കട്ടിലിൽ നിന്ന് വീണാണ് മുഖത്ത് പരിക്കേറ്റതെന്നായിരുന്നു അമ്മയും അമ്മൂമ്മയും ആശുപത്രിയിൽ നൽകിയ വിശദീകരണം. എന്നാൽ കുട്ടിയുടെ മുഖത്തെ പരിക്കുകൾ പരിശോധിച്ച ഡോക്ടർക്ക് സംശയം തോന്നി. തുടർന്ന് നടത്തിയ പരിശോധനയിലും അന്വേഷണത്തിലുമാണ് കുട്ടിക്ക് മർദനമേറ്റ വിവരം പുറത്തറിയുന്നത്.
അമ്മ പൊലീസ് കസ്റ്റഡിയിൽ
സംഭവം പുറത്തറിഞ്ഞതിനു പിന്നാലെ കുട്ടിയുടെ അമ്മയെ പൊലീസ് കസ്റ്റഡിയിലെടുത്തു. അമ്മയുടെ ഫോണിൽ നിന്ന് വാട്സാപ്പ് ഡിലീറ്റ് ചെയ്തതുമായി ബന്ധപ്പെട്ട പ്രകോപനമാണ് മർദനത്തിലേക്ക് നയിച്ചതെന്നാണ് പ്രാഥമിക നിഗമനം.