കുൽഗാം: ദക്ഷിണ കശ്മീരിലെ കുൽഗാമിൽ സുരക്ഷാസേനയുടെ സംയുക്ത നീക്കത്തിൽ അഞ്ച് ഭീകരവാദികൾ അറസ്റ്റിൽ. ഖ്രേവാൻ ഛാദറിൽ നടത്തിയ പരിശോധനയിൽ രണ്ട് പിസ്റ്റളുകളും വെടിയുണ്ടകളും ഗ്രനേഡുകളും ഉൾപ്പെടെയുള്ള ആയുധശേഖരം പിടിച്ചെടുത്തു. കുൽഗാം പൊലീസും രാഷ്‌ട്രീയ റൈഫിൾസും സിആർപിഎഫും സംയുക്തമായാണ് ഓപ്പറേഷൻ നടത്തിയത്. രഹസ്യാന്വേഷണ വിഭാഗത്തിൽനിന്ന് ലഭിച്ച വിവരങ്ങളുടെ അടിസ്ഥാനത്തിലായിരുന്നു നടപടി.
ഗുഫ്ബാൽ സ്വദേശി തജാമുൽ ഹുസൈൻ മിർ, ഖ്രേവാൻ സ്വദേശി റഹ്മത്ത് അലി നൈക്കൂ, ഖ്രേവാൻ സ്വദേശി തെഹ്‌രീം അഹമ്മദ് ഭട്ട്, ഖ്രേവാൻ ഛാദർ സ്വദേശി മൻസൂർ അഹമ്മദ് ഭട്ട്, മാൽത്തൽഹാമ സ്വദേശി കിഫായത്ത് അഹമ്മദ് ദർ എന്നിവരാണ് അറസ്റ്റിലായത്.
രണ്ട് പിസ്റ്റളുകൾ, മൂന്ന് മാഗസിനുകൾ, 9 എംഎം വിഭാഗത്തിലുള്ള 40 വെടിയുണ്ടകൾ, മൂന്ന് ഹാൻഡ് ഗ്രനേഡുകൾ എന്നിവയാണ് സുരക്ഷാസേന ഇവരിൽ നിന്നും പിടിച്ചെടുത്തത്. പിടിച്ചെടുത്ത ആയുധങ്ങളുടെ ഉറവിടം കണ്ടെത്താനുള്ള അന്വേഷണം തുടരുകയാണെന്ന് അധികൃതർ വ്യക്തമാക്കി.