ന്യൂഡൽഹി: തിരഞ്ഞെടുപ്പ് കമ്മീഷനെതിരായ പ്രതിഷേധത്തിന്റെ പേരിൽ ഡൽഹിയിൽ അരങ്ങേറുന്നത് രാജ്യത്തിന്റെ പ്രതിച്ഛായയ്‌ക്ക് കളങ്കമുണ്ടാക്കാനുള്ള ആസൂത്രിത നീക്കമാണെന്ന് സി. സദാനന്ദൻ മാസ്റ്റർ എം. പി. ഇന്ത്യയുടെ തിരഞ്ഞെടുപ്പ് പ്രക്രിയയും ഡിജിറ്റൽ, സാമ്പത്തിക, കാർഷിക, വിദ്യാഭ്യാസ മേഖലകളിലെ പുരോഗതിയും ലോകം ശ്രദ്ധിക്കുന്ന സാഹചര്യത്തിലാണ് ഇത്തരം പ്രതിഷേധങ്ങളെന്ന് അദ്ദേഹം പറഞ്ഞു.
ഇന്ത്യയിലെ തിരഞ്ഞെടുപ്പ് സംവിധാനം ആധുനിക സാങ്കേതികവിദ്യ പ്രയോജനപ്പെടുത്തി കുറ്റമറ്റ രീതിയിലാണ് പ്രവർത്തിക്കുന്നത്. അമേരിക്ക ഉൾപ്പെടെയുള്ള രാജ്യങ്ങൾ ഇന്ത്യൻ ജനാധിപത്യ പ്രക്രിയയെ മാതൃകയാക്കുന്നുണ്ട്. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ വിവിധ മേഖലകളിൽ രാജ്യം കൈവരിക്കുന്ന പുരോഗതിയാണ് ചിലരിൽ അസഹിഷ്ണുത സൃഷ്ടിക്കുന്നതെന്നും അദ്ദേഹം ചൂണ്ടിക്കാട്ടി.
തിരഞ്ഞെടുപ്പിന്റെ പേരിൽ ആരംഭിക്കുന്ന പ്രതിഷേധങ്ങൾ മറ്റ് മേഖലകളിലേക്കും വ്യാപിപ്പിച്ച് യുക്തിരഹിതവും രാജ്യവിരുദ്ധവുമായ ആശയങ്ങൾ പ്രചരിപ്പിക്കാനാണ് ശ്രമിക്കുന്നത്. ഇത്തരം നീക്കങ്ങൾ നിയന്ത്രിക്കാൻ സർക്കാർ കർശനമായി ഇടപെടണമെന്നും ആവശ്യപ്പെട്ടു.
ലോകം ഉറ്റുനോക്കുന്ന രാജ്യതലസ്ഥാനത്ത് കലാപാന്തരീക്ഷം സൃഷ്ടിക്കുന്നത് ഇന്ത്യയുടെ അന്താരാഷ്‌ട്ര പ്രതിച്ഛായയെ ബാധിക്കും. രാജ്യത്തിന്റെ പുരോഗതിയെ തടസ്സപ്പെടുത്താനുള്ള ശ്രമങ്ങൾ അനുവദിക്കില്ലെന്നും സി. സദാനന്ദൻ മാസ്റ്റർ വ്യക്തമാക്കി