ന്യൂഡല്‍ഹി: മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ ഡല്‍ഹിയില്‍ നടന്ന പ്രതിഷേധത്തെ രൂക്ഷമായി വിമര്‍ശിച്ച് ബിജെപി ദേശീയ വക്താവും എംപിയുമായ സാംബിത് പത്ര. ദേശീയ തലസ്ഥാനത്ത് അശാന്തി സൃഷ്ടിക്കാനുള്ള പ്രതിപക്ഷത്തിന്റെ ശ്രമമാണ് പ്രതിഷേധമെന്നും ഇത് രാജ്യത്തെ ജനങ്ങളുടെ പൊതുവികാരത്തെ പ്രതിഫലിപ്പിക്കുന്നില്ലെന്നും അദ്ദേഹം ആരോപിച്ചു. ജന്തര്‍ മന്തറില്‍ നടക്കുന്ന സംഭവങ്ങള്‍ ഇന്ത്യയുടെ യഥാര്‍ഥ ചിത്രമല്ലെന്ന് സാംബിത് പത്ര പറഞ്ഞു. ചില ടെലിവിഷന്‍ ചാനലുകളിലും സമൂഹമാധ്യമങ്ങളിലും പ്രചരിക്കുന്ന ദൃശ്യങ്ങള്‍ രാജ്യത്തെ പൊതുസാഹചര്യത്തിന്റെ പ്രതിനിധാനമല്ലെന്നും മികച്ച ഭരണത്തിന് കീഴില്‍ ഇന്ത്യ സമാധാനപരമായി മുന്നോട്ടുപോകുകയാണെന്നും അദ്ദേഹം അവകാശപ്പെട്ടു.
ഡല്‍ഹിയെ സ്തംഭിപ്പിക്കാനും തീവെപ്പിനും അക്രമത്തിനും പ്രേരിപ്പിക്കാനും പ്രതിഷേധക്കാര്‍ ശ്രമിച്ചെന്നും അദ്ദേഹം ആരോപിച്ചു. എന്നാല്‍ ആള്‍ക്കൂട്ട അരാജകത്വത്തിന് മേല്‍ ജനാധിപത്യം വിജയിച്ചെന്നും അദ്ദേഹം പറഞ്ഞു. രാഷ്‌ട്രപതിയുമായുള്ള കൂടിക്കാഴ്ചയ്‌ക്കുശേഷം കോണ്‍ഗ്രസ് നേതാവ് രാഹുല്‍ ഗാന്ധി നടത്തിയ പരാമര്‍ശങ്ങളെയും ബിജെപി നേതാവ് വിമര്‍ശിച്ചു. രാഷ്‌ട്രപതിയെ തെരുവുപ്രക്ഷോഭങ്ങളിലേക്ക് വലിച്ചിഴയ്‌ക്കാനാണ് രാഹുല്‍ ഗാന്ധി ശ്രമിച്ചതെന്ന് അദ്ദേഹം ആരോപിച്ചു. പ്രതിഷേധത്തിന്റെ പശ്ചാത്തലത്തില്‍ ദേശീയ തലസ്ഥാനത്ത് സുരക്ഷാ ക്രമീകരണങ്ങള്‍ ശക്തമാക്കിയിട്ടുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ജന്തര്‍ മന്തറിലേക്കുള്ള വഴികളിലും പ്രധാന മേഖലകളിലും പൊലീസിനെ വിന്യസിച്ചു. പ്രതിഷേധത്തില്‍ പങ്കെടുക്കാന്‍ ആളുകളെ സംഘടിപ്പിക്കുന്നവരുടെയും ക്രമസമാധാന പ്രശ്‌നങ്ങള്‍ക്ക് കാരണമായേക്കാവുന്നവരുടെയും നീക്കങ്ങള്‍ നിരീക്ഷിക്കുന്നുണ്ടെന്നാണ് ബന്ധപ്പെട്ട വൃത്തങ്ങള്‍ അറിയിക്കുന്നത്. അനിഷ്ട സംഭവങ്ങള്‍ ഒഴിവാക്കാനും ക്രമസമാധാനം ഉറപ്പാക്കാനുമായി ഡല്‍ഹിയില്‍ പൊലീസ് നിരീക്ഷണം ശക്തമാക്കിയിട്ടുണ്ട്.