പത്മശ്രീ ഗുരുവായൂര്‍ ദൊരൈ അന്തരിച്ചു; വിടവാങ്ങിയത് കര്‍ണാടക സംഗീതത്തിലെ മൃദംഗ ചക്രവര്‍ത്തി

ചെന്നൈ: പ്രശസ്ത മൃദംഗവിദ്വാനും പത്മശ്രീ പുരസ്‌കാര ജേതാവുമായ ഗുരുവായൂര്‍ ദൊരൈ (91) അന്തരിച്ചു. ചെന്നൈയിലായിരുന്നു അന്ത്യം. കര്‍ണാടക സംഗീതരംഗത്ത് മൃദംഗവാദനത്തിലൂടെ എട്ടു പതിറ്റാണ്ടിലേറെക്കാലം സവിശേഷ സാന്നിധ്യമായി നിലകൊണ്ട കലാകാരനായിരുന്നു അദ്ദേഹം. ഗുരുവായൂര്‍ സ്വദേശിയായ ദൊരൈ എട്ടാം വയസ്സില്‍ ചെമ്പൈ വൈദ്യനാഥ ഭാഗവതരുടെ കച്ചേരിക്ക് പക്കമേളമൊരുക്കിയാണ് മൃദംഗവാദനത്തില്‍ അരങ്ങേറ്റം കുറിച്ചത്. പിന്നീട് കര്‍ണാടക സംഗീതത്തിലെ പ്രമുഖരായ നിരവധി കലാകാരന്മാര്‍ക്കൊപ്പം വേദികള്‍ പങ്കിട്ട അദ്ദേഹം മൃദംഗവാദനത്തില്‍ തന്റേതായ ശൈലി രൂപപ്പെടുത്തി.

ജി.എസ്. കൃഷ്ണ അയ്യരുടെയും മീനാക്ഷിയുടെയും മകനായി 1935 ജൂലൈ രണ്ടിനാണ് ഗുരുവായൂരില്‍ ജനിച്ചത്. അഞ്ചാം വയസ്സില്‍ പോളിയോ ബാധിച്ചതോടെ പഠനം തടസ്സപ്പെട്ടു. തുടര്‍ന്ന് പിതാവാണ് മൃദംഗപഠനത്തിലേക്ക് അദ്ദേഹത്തെ നയിച്ചത്. പാലക്കാട്ട് സുബ്ബയ്യരുടെയും ഇ.പി. നാരായണ പിഷാരടിയുടെയും കീഴിലായിരുന്നു ആദ്യകാല പരിശീലനം. 1949ല്‍ പ്രശസ്ത മൃദംഗവിദ്വാന്‍ പളനി സുബ്രഹ്‌മണ്യം പിള്ളയുമായുള്ള കൂടിക്കാഴ്ച ദൊരൈയുടെ ജീവിതത്തിലെ നിര്‍ണായക വഴിത്തിരിവായി. തുടര്‍ന്ന് ചെന്നൈയിലേക്ക് താമസം മാറിയ അദ്ദേഹം പളനി സുബ്രഹ്‌മണ്യം പിള്ളയുടെ വസതിയില്‍ ഒന്‍പതു വര്‍ഷത്തോളം ഗുരുകുല സമ്പ്രദായത്തില്‍ മൃദംഗം അഭ്യസിച്ചു.

പിന്നീട് പുതുക്കോട്ട ശൈലിയില്‍ പ്രഗത്ഭനായി മാറി. എം.എസ്. സുബ്ബുലക്ഷ്മി, മുസിരി സുബ്രഹ്‌മണ്യ അയ്യര്‍, ചെമ്പൈ വൈദ്യനാഥ ഭാഗവതര്‍, സെമ്മങ്കുടി ശ്രീനിവാസ അയ്യര്‍, എം.ഡി. രാമനാഥന്‍, എം. ബാലമുരളീകൃഷ്ണ, ടി.ആര്‍. മഹാലിംഗം തുടങ്ങി കര്‍ണാടക സംഗീതത്തിലെ അതികായന്മാരുടെ കച്ചേരികള്‍ക്ക് അദ്ദേഹം മൃദംഗം വായിച്ചു. എം.എസ്. സുബ്ബുലക്ഷ്മിക്കൊപ്പം ന്യൂയോര്‍ക്കിലെ പ്രശസ്തമായ കാര്‍ണഗി ഹാളിലും മൃദംഗവാദനം നടത്തി. നാഗസ്വരം, വീണ, പുല്ലാങ്കുഴല്‍ തുടങ്ങിയ വാദ്യകച്ചേരികള്‍ക്കും പുതുതലമുറയിലെ പ്രമുഖ കലാകാരന്മാര്‍ക്കും അദ്ദേഹം വാദ്യസഹകരണം നല്‍കി. മലയാള സിനിമയിലും അദ്ദേഹത്തിന്റെ മൃദംഗവാദനം ശ്രദ്ധേയമായി.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

നിറംകുടം എന്ന ചിത്രത്തിലെ ‘നക്ഷത്രദീപങ്ങള്‍ തിളങ്ങി’ എന്ന പ്രശസ്ത ഗാനത്തില്‍ മൃദംഗം വായിച്ചത് ഗുരുവായൂര്‍ ദൊരൈയായിരുന്നു. സംഗീതരംഗത്തെ സമഗ്ര സംഭാവനകള്‍ പരിഗണിച്ച് 2025ല്‍ രാജ്യം പത്മശ്രീ നല്‍കി ആദരിച്ചു. സംഗീത നാടക അക്കാദമി അവാര്‍ഡ്, സംഗീത നാടക അക്കാദമി ടാഗോര്‍ രത്‌ന പുരസ്‌കാരം, തമിഴ്നാട് സര്‍ക്കാരിന്റെ കലൈമാമണി പുരസ്‌കാരം, സംഗീത കലാശിഖാമണി തുടങ്ങിയ അംഗീകാരങ്ങളും അദ്ദേഹത്തെ തേടിയെത്തി. മൃദംഗവാദനത്തിലെ സവിശേഷമായ ശൈലിയും സംഗീതരംഗത്തെ ദീര്‍ഘകാല സംഭാവനകളും കൊണ്ട് തലമുറകളെ സ്വാധീനിച്ച കലാകാരന്റെ വിയോഗം കര്‍ണാടക സംഗീതലോകത്തിന് വലിയ നഷ്ടമാണ്.