ന്യൂഡൽഹി: എസ്ഐആർ നടപടിക്കെതിരെ രാഹുലും ഇൻഡി മുന്നണി നേതാക്കളും സുപ്രീംകോടതിയിൽ സമർപ്പിച്ച ഹർജിയിൽ 14 പിഴവുകൾ കണ്ടെത്തി. രേഖകളിലെ അപാകതകൾ, രേഖകളുടെ അഭാവം, കോടതി ഫീസിലെ കുറവ് തുടങ്ങി വിവിധ വീഴ്ചകളാണ് സുപ്രീംകോടതി അധികൃതർ ചൂണ്ടിക്കാട്ടിയിരിക്കുന്നത്. പിഴവുകൾ പരിഹരിച്ച ശേഷമേ ഹർജി പരിഗണിക്കൂ. കോടതി ഫീസ് പോലും കൃത്യമായി ഒടുക്കിയിട്ടില്ലെന്നും അധികൃതർ വ്യക്തമാക്കിയിട്ടുണ്ട്
ലോക്സഭാ പ്രതിപക്ഷ നേതാവ് രാഹുൽ, കോൺഗ്രസ് അധ്യക്ഷൻ മല്ലികാർജുൻ ഖാർഗെ എന്നിവരടക്കമുള്ള പ്രതിപക്ഷ നേതാക്കളാണ് തിങ്കളാഴ്ച ഹർജി സമർപ്പിച്ചത്. SIR നടപടിയിൽ ക്രമക്കേടുകൾ നടന്നെന്നും അർഹരായ വോട്ടർമാരുടെ പേരുകൾ വോട്ടർപട്ടികയിൽ നിന്ന് നീക്കം ചെയ്തെന്നും ആരോപിച്ചാണ് ഹർജി. നടപടികൾ അടിയന്തരമായി നിർത്തിവയ്‌ക്കണമെന്നും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ നീക്കണമെന്നും പ്രതിപക്ഷം ആവശ്യപ്പെട്ടിട്ടുണ്ട്.
ഹർജിയിൽ കണ്ടെത്തിയ 14 പിഴവുകൾ
പ്രതിചേർത്ത ചിലരുടെ പേരുകളിലെ പൊരുത്തക്കേടുകളും സ്വകാര്യ വ്യക്തികളെ കേസിൽ കക്ഷികളാക്കിയതിന്റെ കാരണം വ്യക്തമാക്കാത്തതും സുപ്രീംകോടതി രജിസ്ട്രി ചൂണ്ടിക്കാട്ടിയിട്ടുണ്ട്. നേരത്തെയുള്ള സുപ്രീംകോടതി വിധിയുടെ പകർപ്പ് ഹർജിക്കൊപ്പം സമർപ്പിച്ചിട്ടില്ലെന്നും കണ്ടെത്തി.
രാഹുലും മല്ലികാർജുൻ ഖാർഗെയെയും ഒഴികെയുള്ള ഒൻപത് ഹർജിക്കാർ അഭിഭാഷക അധികാരപത്രമായ വക്കാലത്തുനാമ സമർപ്പിച്ചിട്ടില്ല. ഖാർഗെയുടെ തിരിച്ചറിയൽ രേഖയുടെ പകർപ്പ് അവ്യക്തമാണെന്നും കോടതി ഫീസിൽ 220 രൂപയുടെ കുറവുണ്ടെന്നും രേഖകളുടെ അച്ചടിയിലും അപാകതകളുണ്ടെന്നും രജിസ്ട്രി ചൂണ്ടിക്കാട്ടി.