ന്യൂഡൽഹി: പഞ്ചാബിൽ ലഹരിവിരുദ്ധ പ്രവർത്തകൻ പർവീന്ദർ സിംഗ് ജോട്ട വെടിയേറ്റു മരിച്ച സംഭവത്തിൽ സംസ്ഥാന സർക്കാരിനോട് റിപ്പോർട്ട് തേടുമെന്ന് കേന്ദ്ര ആഭ്യന്തരമന്ത്രി അമിത് ഷാ. ലഹരിവ്യാപനവും സംഘടിത കുറ്റകൃത്യങ്ങളും വർധിക്കുന്ന സാഹചര്യത്തിൽ ജനങ്ങളുടെ സുരക്ഷ ഉറപ്പാക്കുന്നതിൽ മുഖ്യമന്ത്രി ഭഗവന്ത് മാൻ നയിക്കുന്ന ആം ആദ്മി പാർട്ടി സർക്കാരിന് വീഴ്ച സംഭവിച്ചെന്ന് അദ്ദേഹം വിമർശിച്ചു.
ഈ ആഴ്ച ആദ്യം മാൻസ ജില്ലയിലാണ് പർവീന്ദർ സിംഗ് ജോട്ട വെടിയേറ്റ് മരിച്ചത്. സംഭവത്തിൽ പഞ്ചാബ് സർക്കാർ നടപടി സ്വീകരിക്കണമെന്നും ലഹരിമാഫിയക്കെതിരെ ശക്തമായ നടപടികൾ വേണമെന്നും അമിത് ഷാ ആവശ്യപ്പെട്ടു. സമൂഹമാധ്യമമായ എക്സിൽ പഞ്ചാബിയിൽ പങ്കുവെച്ച കുറിപ്പിലായിരുന്നു അദ്ദേഹത്തിന്റെ പ്രതികരണം.
പഞ്ചാബിൽ ലഹരിക്കച്ചവടം അനുദിനം വർധിക്കുകയാണെന്നും സംഘടിത കുറ്റകൃത്യങ്ങളുടെ ഭീഷണി ശക്തമാകുകയാണെന്നും അമിത് ഷാ പറഞ്ഞു. ലഹരിക്കെതിരെ ശബ്ദിക്കുന്നവരുടെ സുരക്ഷയെക്കുറിച്ചും ആശങ്ക ഉയരുന്നുണ്ട്. ലഹരിവ്യാപാര ശൃംഖലകൾക്കെതിരെ നിർണായക നടപടി സ്വീകരിക്കാൻ സംസ്ഥാന സർക്കാർ തയ്യാറാകണമെന്നും അദ്ദേഹം ആവശ്യപ്പെട്ടു.
ദിർബയിൽ ഒരാളെ നിർബന്ധിച്ച് ലഹരിവസ്തു ഉപയോഗിപ്പിച്ചതിനെത്തുടർന്ന് മരണം സംഭവിച്ചെന്ന റിപ്പോർട്ടും അമിത് ഷാ പരാമർശിച്ചു. ഈ സംഭവത്തിലും പഞ്ചാബ് സർക്കാരിനോട് കേന്ദ്ര ആഭ്യന്തര മന്ത്രാലയം വിശദീകരണം തേടുമെന്ന് അദ്ദേഹം വ്യക്തമാക്കി.
കുറ്റവാളികൾക്ക് രാഷ്‌ട്രീയ സംരക്ഷണം ലഭിച്ചിട്ടുണ്ടെന്ന ആരോപണങ്ങൾ ഉൾപ്പെടെ പരിശോധിച്ച് നിഷ്പക്ഷ അന്വേഷണം നടത്തണമെന്നും അമിത് ഷാ ആവശ്യപ്പെട്ടു. ബിജെപി പഞ്ചാബിൽ അധികാരത്തിലെത്തിയാൽ ലഹരിമുക്തവും ഗുണ്ടാസംഘങ്ങളുടെ ഭീഷണിയില്ലാത്തതുമായ സുരക്ഷിത സംസ്ഥാനം കെട്ടിപ്പടുക്കാൻ ശക്തമായ നടപടികൾ സ്വീകരിക്കുമെന്നും അദ്ദേഹം പറഞ്ഞു.
കൊലക്കേസിൽ നാല് പേർ അറസ്റ്റിൽ
കേന്ദ്രസർക്കാർ വിഷയത്തിൽ ഇടപെട്ടതോടെ പോലീസ് നടപടികൾ ശക്തമാക്കിയിട്ടുണ്ട്. മാൻസ സിറ്റി-2 പോലീസ് സ്റ്റേഷനിലെ സ്റ്റേഷൻ ഹൗസ് ഓഫീസർ ബിയാന്ത് കൗറിനെ അന്വേഷണത്തിന്റെ ഭാഗമായി സസ്‌പെൻഡ് ചെയ്തു. പർവീന്ദർ സിംഗ് ജോട്ടയ്‌ക്ക് നേരെ വെടിയുതിർത്ത അശ്വനി കുമാറിനെയും കൂട്ടാളി വിപിൻ കുമാറിനെയും പോലീസ് അറസ്റ്റ് ചെയ്തു. ഇരുവരെയും ഏഴ് ദിവസത്തെ പോലീസ് കസ്റ്റഡിയിൽ വിട്ടു. അശ്വനി കുമാറിന്റെ ഭാര്യ നീലം റാണിയെയും മറ്റൊരു കൂട്ടാളിയായ ലാഡിയെയും അറസ്റ്റ് ചെയ്തിട്ടുണ്ട്.