‘സമാജ്വാദി പാര്‍ട്ടിയില്ലാതെ റായ്ബറേലിയില്‍ രാഹുല്‍ ഗാന്ധിക്ക് ഒറ്റയ്‌ക്ക് നിന്ന് ജയിക്കാനാകുമോ?’; വെല്ലുവിളിച്ച് രാജ്നാഥ് സിങ്

ലഖ്നൗ: ലോക്സഭാ പ്രതിപക്ഷ നേതാവ് രാഹുല്‍ ഗാന്ധിക്കെതിരെ രൂക്ഷ വിമര്‍ശനവുമായി കേന്ദ്ര പ്രതിരോധമന്ത്രി രാജ്നാഥ് സിങ്. സമാജ്വാദി പാര്‍ട്ടിയുടെ പിന്തുണയില്ലാതെ റായ്ബറേലിയില്‍ വിജയിക്കാന്‍ രാഹുല്‍ ഗാന്ധിക്ക് കഴിയുമോയെന്ന് അദ്ദേഹം ചോദിച്ചു. ജനങ്ങള്‍ തങ്ങളുടെ വാക്കുകള്‍ വിശ്വസിക്കുന്നുവെന്ന കോണ്‍ഗ്രസിന്റെ അവകാശവാദത്തിന്റെ പൊള്ളത്തരം ഉത്തര്‍പ്രദേശ് തന്നെ തെളിയിക്കുകയാണെന്നും രാജ്നാഥ് സിങ് പറഞ്ഞു. കോണ്‍ഗ്രസിന്റെ സംസ്ഥാന ഘടകത്തിലെ നേതാക്കള്‍ക്കിടയില്‍ പരസ്പര വിശ്വാസമില്ലെന്നും നേതാക്കള്‍ വാക്കുകളിലൂടെ മാത്രമല്ല, ശാരീരികമായും ഏറ്റുമുട്ടുന്ന സാഹചര്യമുണ്ടെന്നും അദ്ദേഹം വിമര്‍ശിച്ചു.

വോട്ടര്‍പട്ടികയിലെ പ്രത്യേക തീവ്ര പരിശോധനയായ എസ്ഐആറിനെതിരെ കോണ്‍ഗ്രസും സിജെപിയും നടത്തുന്ന പ്രതിഷേധങ്ങളെയും രാജ്നാഥ് സിങ് വിമര്‍ശിച്ചു. തിരഞ്ഞെടുപ്പ് പരിഷ്‌കാരമല്ല പ്രതിപക്ഷത്തിന്റെ ലക്ഷ്യമെന്നും രാജ്യത്ത് അരാജകത്വം സൃഷ്ടിച്ച് അധികാരം നേടാനാണ് ശ്രമമെന്നും അദ്ദേഹം ആരോപിച്ചു. രാഹുല്‍ ഗാന്ധിയെ ലക്ഷ്യമിട്ട് സംസാരിച്ച പ്രതിരോധമന്ത്രി, യുവാക്കളെ രാഷ്‌ട്രീയ സംഘര്‍ഷത്തിനുള്ള ഉപകരണങ്ങളായി ഉപയോഗിക്കുകയാണെന്നും ആരോപിച്ചു. ബംഗ്ലാദേശിലെ സംഭവങ്ങളില്‍നിന്ന് പ്രചോദനം ഉള്‍ക്കൊണ്ട് ഇന്ത്യയില്‍ അധികാരമാറ്റം ലക്ഷ്യമിടുന്നവരുണ്ടെന്നും അദ്ദേഹം പറഞ്ഞു.

രാഷ്‌ട്രീയ താല്‍പ്പര്യങ്ങള്‍ക്കായി രാജ്യത്തെ ഭരണഘടനാ സ്ഥാപനങ്ങളെ ബലികഴിക്കാന്‍ കഴിയില്ലെന്നും രാജ്നാഥ് സിങ് വ്യക്തമാക്കി. വെള്ളിയാഴ്ച നടത്തിയ പത്രസമ്മേളനത്തില്‍, വ്യാജ പ്രതിഷേധങ്ങളും ഭരണഘടനാ സ്ഥാപനങ്ങളെ അപമാനിക്കുന്ന നടപടികളും ഇന്ത്യയുടെ വികസനയാത്രയെ തടസ്സപ്പെടുത്തില്ലെന്ന് രാജ്നാഥ് സിങ് പറഞ്ഞു. രാഹുല്‍ ഗാന്ധി തടസ്സവാദ രാഷ്‌ട്രീയം ഉപേക്ഷിച്ച് ജനവിധിയെ മാനിക്കണമെന്നും സ്വന്തം രാഷ്‌ട്രീയ നിലപാടിനെക്കുറിച്ച് ആത്മപരിശോധന നടത്തണമെന്നും അദ്ദേഹം ആവശ്യപ്പെട്ടു. കോണ്‍ഗ്രസും സഖ്യകക്ഷികളും യുവാക്കളെ രാഷ്‌ട്രീയ സംഘര്‍ഷത്തിനുള്ള ഉപകരണങ്ങളാക്കുകയാണെന്നും പ്രതിരോധമന്ത്രി ആരോപിച്ചു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

എസ്ഐആറോ മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറുമായി ബന്ധപ്പെട്ട വിഷയങ്ങളോ മാത്രമല്ല ഇപ്പോഴത്തെ തര്‍ക്കത്തിന്റെ കേന്ദ്രമെന്നും അധികാരം പിടിച്ചെടുക്കാനുള്ള ശ്രമമാണ് ഇതിനു പിന്നിലെന്നും രാജ്നാഥ് സിങ് ആരോപിച്ചു. ഇന്ത്യയുടെ ഭാവി സംഘര്‍ഷത്തിലല്ല, സംവാദത്തിലും രാഷ്‌ട്രനിര്‍മാണത്തിലുമാണെന്നും അദ്ദേഹം കൂട്ടിച്ചേര്‍ത്തു.