ചേലക്കര: അനധികൃത കരിങ്കൽ ഖനനത്തിനിടെ സ്ഫോടകവസ്തുക്കൾ പിടികൂടിയ കേസിൽ മുഖ്യമന്ത്രിയുടെ ഓഫീസ് ഇടപെട്ടതായി ആരോപണം. മുഖ്യമന്ത്രിയുടെ പേഴ്സണൽ സ്റ്റാഫ് അംഗം വിനീതിന്റെ സഹോദരൻ വിനോദിനെ രക്ഷിക്കാനാണ് ഇടപെടൽ നടന്നത്. സംഭവത്തിൽ കേസെടുത്ത ചേലക്കര സ്റ്റേഷനിലെ എസ്.ഐ. ഗ്രീഷ്മയെ സ്ഥലംമാറ്റിയതും വിവാദമായിട്ടുണ്ട്.
ചേലക്കര സൂപ്പിപ്പടിക്കുന്നിലാണ് നിയമങ്ങൾ ലംഘിച്ച് കരിങ്കൽ ഖനനം നടത്തിയത്. പ്രദേശത്ത് മണ്ണെടുക്കുന്നതിനുള്ള അനുമതി നേടിയെടുത്തിരുന്ന സ്ഥലം പവർ ഓഫ് അറ്റോർണി പ്രകാരം കൈകാര്യം ചെയ്തിരുന്നത് ചേലക്കര സ്വദേശി വിനോദായിരുന്നു. പാറ പൊട്ടിക്കുന്നതിന് സ്ഫോടകവസ്തുക്കൾ ഉപയോഗിക്കരുതെന്ന നിർദേശം നിലനിൽക്കെ ഇത് ലംഘിച്ച് ഖനനം നടത്തിയത്.
സ്ഫോടകവസ്തുക്കൾ ഉപയോഗിച്ച് പാറ പൊട്ടിക്കുന്നത് ശ്രദ്ധയിൽപ്പെട്ട നാട്ടുകാർ പൊലീസിനെ സമീപിച്ചു. തുടക്കത്തിൽ പൊലീസ് താക്കീത് നൽകിയെങ്കിലും പിന്നീട് സ്ഫോടകവസ്തുക്കൾ ഉപയോഗിച്ചതായി പരാതി ഉയർന്നതോടെ പൊലീസും ബോംബ് സ്ക്വാഡും സംയുക്ത പരിശോധന നടത്തി. പരിശോധനയിൽ ജലാറ്റിൻ സ്റ്റിക്കുകൾ ഉൾപ്പെടെയുള്ള സ്ഫോടകവസ്തുക്കൾ പിടിച്ചെടുത്തു.
തുടർന്ന് വിനോദിനെ ചേലക്കര പൊലീസ് സ്റ്റേഷനിലേക്ക് വിളിച്ചുവരുത്തി. ഈ ഘട്ടത്തിലാണ് മുഖ്യമന്ത്രിയുടെ ഓഫീസ് ഇടപെട്ടത്. ഉന്നത ഇടപെടലിനെ തുടർന്ന് പ്രതിയുടെ പേരുവിവരങ്ങൾ ഉൾപ്പെടുത്താതെയാണ് എഫ്ഐആർ രജിസ്റ്റർ ചെയ്തതെന്നും ആരോപണമുണ്ട്.
ഖനനത്തിന് മറ്റൊരാളെയാണ് ചുമതലപ്പെടുത്തിയതെന്നും സ്ഫോടകവസ്തുക്കൾ ഉപയോഗിച്ച കാര്യം അറിയില്ലെന്നുമാണ് വിനോദിന്റെ വാദം. അധികം വൈകാതെ സ്ഫോടകവസ്തുക്കൾ പിടിച്ചെടുത്ത കേസിൽ നടപടി സ്വീകരിച്ച എസ്.ഐ. ഗ്രീഷ്മയെ ചേലക്കര സ്റ്റേഷനിൽനിന്ന് സ്ഥലംമാറ്റുകയും ചെയ്തു.