നെടുമ്പാശേരി മിനി കൂപ്പര്‍ അപകടം: നാല് പ്രതികളുടെയും ജാമ്യാപേക്ഷ തള്ളി

അങ്കമാലി: നെടുമ്പാശേരി എയര്‍പോര്‍ട്ട് റോഡില്‍ മിനി കൂപ്പര്‍ കാറിടിച്ച് മൂന്ന് പേര്‍ മരിച്ച കേസില്‍ നാല് പ്രതികളുടെയും ജാമ്യാപേക്ഷ കോടതി തള്ളി. ഒന്നുമുതല്‍ നാലുവരെ പ്രതികളായ സുഹൈല്‍, നിനവ്, ജോയല്‍, അമീന്‍ എന്നിവരുടെ ജാമ്യാപേക്ഷയാണ് അങ്കമാലി കോടതി തള്ളിയത്. കേസില്‍ അന്വേഷണം തുടരുകയാണെന്നും ഈ ഘട്ടത്തില്‍ ജാമ്യം അനുവദിക്കരുതെന്നും പ്രോസിക്യൂഷന്‍ വാദിച്ചു. ഒന്നാം പ്രതി സുഹൈല്‍ മദ്യപിച്ചിരുന്നതായും വാഹനം ഓടിക്കുമ്പോള്‍ അമിതവേഗത്തിലായിരുന്നുവെന്നും പ്രോസിക്യൂഷന്‍ കോടതിയില്‍ വാദിച്ചു. കാറിലുണ്ടായിരുന്ന മറ്റ് പ്രതികള്‍ക്ക് സുഹൈല്‍ മദ്യപിച്ചിരുന്നുവെന്ന് അറിയാമായിരുന്നിട്ടും വാഹനം ഓടിക്കുന്നതില്‍നിന്ന് പിന്തിരിപ്പിച്ചില്ലെന്നും ആരോപിച്ചു.

ഒന്നാം പ്രതിയുടെ രക്തസാമ്പിളില്‍ 161 മില്ലിഗ്രാമും മൂത്രസാമ്പിളില്‍ 230 മില്ലിഗ്രാമും ആല്‍ക്കഹോളിന്റെ അംശം കണ്ടെത്തിയെന്നാണ് പരിശോധനാ ഫലം ചൂണ്ടിക്കാട്ടി പ്രോസിക്യൂഷന്‍ അറിയിച്ചത്. മദ്യപിച്ച് വാഹനമോടിക്കുന്നത് മനുഷ്യജീവന് അപകടമുണ്ടാക്കുമെന്ന് പ്രതികള്‍ക്ക് അറിയാമായിരുന്നുവെന്നും അവരുടെ പ്രായം പരിഗണിക്കുന്നതിനൊപ്പം മരിച്ച മൂന്ന് പേരുടെയും പ്രായം കണക്കിലെടുക്കണമെന്നും പ്രോസിക്യൂഷന്‍ വാദിച്ചു. സിസിടിവി ദൃശ്യങ്ങള്‍ ഉള്‍പ്പെടെയുള്ള ഡിജിറ്റല്‍ തെളിവുകള്‍ ഉടന്‍ കോടതിയില്‍ ഹാജരാക്കുമെന്നും പ്രോസിക്യൂട്ടര്‍ അറിയിച്ചു.

ഭാരതീയ ന്യായ സംഹിതയിലെ 105-ാം വകുപ്പ് പ്രകാരം ചുമത്തിയ കുറ്റകരമായ നരഹത്യാക്കുറ്റം നിലനില്‍ക്കില്ലെന്നായിരുന്നു പ്രതിഭാഗത്തിന്റെ വാദം. ദൃക്‌സാക്ഷികളില്ലാതെയാണ് എഫ്‌ഐആര്‍ രജിസ്റ്റര്‍ ചെയ്തതെന്നും അപകടസമയത്ത് വാഹനത്തിന്റെ വേഗം തെളിയിക്കുന്ന രേഖകള്‍ പൊലീസ് ഹാജരാക്കിയിട്ടില്ലെന്നും പ്രതിഭാഗം ചൂണ്ടിക്കാട്ടി. മൂന്ന് പേര്‍ ഒരു സ്‌കൂട്ടറില്‍ സഞ്ചരിച്ചതില്‍ ദുരൂഹതയുണ്ടെന്നും സ്‌കൂട്ടറിന്റെ നിയന്ത്രണം നഷ്ടപ്പെടാനുള്ള സാധ്യത പരിശോധിക്കണമെന്നും പ്രതിഭാഗം ആവശ്യപ്പെട്ടു. ഒന്നാം പ്രതിക്കെതിരെ മുന്‍പ് ചെറിയ പരാതിപോലും ഉണ്ടായിരുന്നില്ലെന്നും തുടര്‍ച്ചയായി കുറ്റകൃത്യങ്ങളില്‍ ഏര്‍പ്പെടുന്നയാളെന്ന രീതിയില്‍ ചിത്രീകരിക്കുന്നത് ശരിയല്ലെന്നും വാദിച്ചു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

അപകടത്തിനുശേഷം പ്രതികള്‍ സംഭവസ്ഥലത്തുനിന്ന് ഓടിപ്പോയിട്ടില്ലെന്നും ഒന്നാം പ്രതിയുടെ കുടുംബത്തിനെതിരെ വലിയ തോതില്‍ ആക്രമണം നടക്കുന്നുണ്ടെന്നും പ്രതിഭാഗം കോടതിയില്‍ പറഞ്ഞു. അപകടത്തിനുശേഷം കാറിലുണ്ടായിരുന്നവര്‍ നാട്ടുകാരോട് തര്‍ക്കിച്ചതായുള്ള ദൃക്‌സാക്ഷി മൊഴികളും കേസില്‍ ചര്‍ച്ചയായിട്ടുണ്ട്. എയര്‍പോര്‍ട്ട് റോഡില്‍ വേഗത്തില്‍ വാഹനമോടിച്ചതിനെ ചോദ്യം ചെയ്തപ്പോള്‍ പിതാവ് നോക്കിക്കൊള്ളുമെന്ന രീതിയില്‍ പ്രതി പ്രതികരിച്ചതായാണ് നേരത്തേ പുറത്തുവന്ന വിവരം. പ്രതിഭാഗത്തിന്റെയും പ്രോസിക്യൂഷന്റെയും വാദങ്ങള്‍ പരിഗണിച്ച ശേഷമാണ് കോടതി ജാമ്യാപേക്ഷകള്‍ തള്ളിയത്.