മുംബൈ: 2027ലെ ഐപിഎല്‍ സീസണിന് മുന്നോടിയായി ടീമില്‍ വന്‍ മാറ്റങ്ങള്‍ക്ക് ഒരുങ്ങി മുന്‍ ചാമ്പ്യന്മാരായ മുംബൈ ഇന്ത്യന്‍സ്. മുഖ്യപരിശീലക സ്ഥാനത്തുനിന്ന് ശ്രീലങ്കന്‍ ഇതിഹാസം മഹേല ജയവര്‍ധനെ പടിയിറങ്ങുമെന്നാണ് റിപ്പോര്‍ട്ടുകള്‍. പരസ്പര ധാരണയുടെ അടിസ്ഥാനത്തിലായിരിക്കും വേര്‍പിരിയലെന്നാണ് സൂചന. ഈ ആഴ്ച നടന്ന ഫ്രാഞ്ചൈസിയുടെ ഉന്നതതല യോഗത്തിലാണ് ഇതുസംബന്ധിച്ച തീരുമാനമെടുത്തതെന്നാണ് വിവരം. പുതിയ മുഖ്യപരിശീലകനെ കണ്ടെത്താനുള്ള ചര്‍ച്ചകളും അഭിമുഖങ്ങളും വരും ദിവസങ്ങളില്‍ ആരംഭിക്കും. സ്ഥാനത്തേക്ക് പരിഗണിക്കുന്ന ചില പേരുകള്‍ മുംബൈ ഇന്ത്യന്‍സ് ഷോര്‍ട്ട്ലിസ്റ്റ് ചെയ്തതായും റിപ്പോര്‍ട്ടുകളുണ്ട്.
മുഖ്യപരിശീലക സ്ഥാനത്തുനിന്നുള്ള മാറ്റത്തിനപ്പുറം ടീമിലെ മറ്റ് ചുമതലകളില്‍ നിന്നും ജയവര്‍ധനെ മാറിനിന്നേക്കുമെന്നാണ് സൂചന. നേരത്തെ ഫ്രാഞ്ചൈസിയില്‍ വിവിധ ഉത്തരവാദിത്തങ്ങള്‍ വഹിച്ചിരുന്ന ജയവര്‍ധനെയെ പൂര്‍ണമായും ഒഴിവാക്കി ടീമിനെ പുതിയ ദിശയിലേക്ക് നയിക്കാനാണ് മാനേജ്മെന്റ് ലക്ഷ്യമിടുന്നതെന്നാണ് റിപ്പോര്‍ട്ടുകള്‍. 2024ലാണ് മഹേല ജയവര്‍ധനെ രണ്ടാം തവണ മുംബൈ ഇന്ത്യന്‍സിന്റെ മുഖ്യപരിശീലക സ്ഥാനത്തെത്തിയത്. 2025ല്‍ ടീമിന് പ്ലേ ഓഫിലേക്ക് യോഗ്യത നേടാനായി. എന്നാല്‍ 2026 സീസണ്‍ മുംബൈയ്‌ക്ക് നിരാശയുടേതായിരുന്നു. നാല് മത്സരങ്ങളില്‍ മാത്രമാണ് ടീമിന് വിജയിക്കാനായത്. സീസണ്‍ അവസാനിച്ചപ്പോള്‍ ഒന്‍പതാം സ്ഥാനത്തായിരുന്നു മുംബൈ.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പരിക്കുകള്‍, താരങ്ങളുടെ ലഭ്യതക്കുറവ്, ഡ്രസിങ് റൂമിലെ അസ്വാരസ്യങ്ങള്‍ എന്നിവ ടീമിന്റെ പ്രകടനത്തെ ബാധിച്ചെന്നാണ് വിലയിരുത്തല്‍. 2027 സീസണിന് മുന്നോടിയായി പരിശീലക സംഘത്തിലടക്കം മാറ്റങ്ങള്‍ വരുത്തി തിരിച്ചുവരവിനൊരുങ്ങുകയാണ് മുംബൈ ഇന്ത്യന്‍സ് എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.