എളമക്കരയില്‍ റെയില്‍വേ ട്രാക്കില്‍ യുവാവിന്റെ മൃതദേഹം; കൊലപാതകമെന്ന് കണ്ടെത്തല്‍, ഭാര്യയും മകളും അറസ്റ്റില്‍

കൊച്ചി: എളമക്കരയില്‍ റെയില്‍വേ ട്രാക്കില്‍ ഒഡിഷ സ്വദേശിയായ 32കാരനെ മരിച്ചനിലയില്‍ കണ്ടെത്തിയ സംഭവം കൊലപാതകമെന്ന് തെളിഞ്ഞു. സംഭവത്തില്‍ യുവാവിന്റെ 40കാരിയായ ഭാര്യയെയും ഇവരുടെ ആദ്യ ഭര്‍ത്താവിലുള്ള 16കാരിയായ മകളെയും പൊലീസ് അറസ്റ്റ് ചെയ്തു. മദ്യപിച്ച് അവശനായി കിടന്ന യുവാവിനെ ചവിട്ടിക്കൊലപ്പെടുത്തിയ ശേഷം മൃതദേഹം റെയില്‍വേ ട്രാക്കില്‍ ഉപേക്ഷിക്കുകയായിരുന്നുവെന്നാണ് പൊലീസിന്റെ കണ്ടെത്തല്‍. ശനിയാഴ്ച പുലര്‍ച്ചെയാണ് എളമക്കര ഭാഗത്തെ റെയില്‍വേ ട്രാക്കില്‍ ഒരാള്‍ കിടക്കുന്നതായി തിരുവനന്തപുരം ഭാഗത്തുനിന്ന് തൃശൂര്‍ ഭാഗത്തേക്ക് പോയ ട്രെയിനിന്റെ ലോക്കോ പൈലറ്റ് റെയില്‍വേയെയും പൊലീസിനെയും അറിയിച്ചത്. തുടര്‍ന്ന് ട്രാക്കിലൂടെ വരികയായിരുന്ന ട്രെയിന്‍ അധികൃതര്‍ നിര്‍ത്തിച്ചു. സ്ഥലത്തെത്തിയ പൊലീസ് നടത്തിയ പരിശോധനയിലാണ് യുവാവിനെ മരിച്ചനിലയില്‍ കണ്ടെത്തിയത്.

മദ്യക്കുപ്പിയും ഗ്ലാസും ഉള്‍പ്പെടെയുള്ളവ മൃതദേഹത്തിന് സമീപത്തുനിന്ന് കണ്ടെത്തിയിരുന്നു. മദ്യപിച്ച് വീണതിനെത്തുടര്‍ന്ന് ഹൃദയസ്തംഭനമുണ്ടായതാകാമെന്നോ ജീവനൊടുക്കിയതാകാമെന്നോ ആയിരുന്നു പൊലീസിന്റെ ആദ്യ നിഗമനം. എന്നാല്‍ മൃതദേഹം കിടന്നിരുന്ന രീതിയില്‍ സംശയം തോന്നിയതോടെ കൊലപാതക സാധ്യതയും കണക്കിലെടുത്ത് അന്വേഷണം വ്യാപിപ്പിച്ചു. മരിച്ച യുവാവ് കുടുംബത്തോടൊപ്പം റെയില്‍വേ ട്രാക്കിന് സമീപമാണ് താമസിച്ചിരുന്നതെന്ന് അന്വേഷണത്തില്‍ പൊലീസിന് വിവരം ലഭിച്ചു. എന്നാല്‍ സംഭവദിവസം രാവിലെ വീട്ടിലെത്തിയപ്പോള്‍ യുവാവിന്റെ ഭാര്യയെയും മകളെയും കണ്ടെത്താനായില്ല. ഇതോടെ ഇരുവരും ഒഡിഷയിലേക്ക് കടക്കാന്‍ സാധ്യതയുണ്ടെന്ന് പൊലീസ് സംശയിച്ചു.

തുടര്‍ന്ന് റെയില്‍വേ സ്റ്റേഷനുകള്‍ കേന്ദ്രീകരിച്ച് അന്വേഷണം നടത്തി. ഇതിനിടെ ബന്ധുവില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ ഭാര്യയെയും മകളെയും പൊലീസ് കസ്റ്റഡിയിലെടുക്കുകയായിരുന്നു. ചോദ്യം ചെയ്യലിലാണ് കൊലപാതകത്തിന്റെ വിവരങ്ങള്‍ പുറത്തുവന്നതെന്നാണ് റിപ്പോര്‍ട്ട്. മരിച്ച യുവാവിനേക്കാള്‍ പത്ത് വയസ് പ്രായക്കുറവുള്ളയാളാണ് ഭാര്യ. ആദ്യ ഭര്‍ത്താവിലുള്ള മകളുമായി യുവാവിനൊപ്പം നാടുവിട്ടാണ് ഇവര്‍ കേരളത്തിലെത്തിയതെന്നാണ് വിവരം. രണ്ടാം ഭര്‍ത്താവ് തന്റെ മകളെ ലൈംഗികമായി ഉപദ്രവിച്ചെന്നും ഇതേത്തുടര്‍ന്ന് മകള്‍ മാനസികമായി തകര്‍ന്നെന്നും യുവതി പൊലീസിന് മൊഴി നല്‍കിയതായാണ് വിവരം. ഇതാണ് കൊലപാതകത്തിലേക്ക് നയിച്ചതെന്നാണ് യുവതിയുടെ മൊഴി.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

മദ്യപിച്ച് അവശനായി കിടന്ന യുവാവിന്റെ കഴുത്തിലും നെഞ്ചിലും ചവിട്ടി കൊലപ്പെടുത്തിയ ശേഷം മൃതദേഹം റെയില്‍വേ ട്രാക്കില്‍ കൊണ്ടിടുകയായിരുന്നുവെന്നാണ് പൊലീസിന്റെ കണ്ടെത്തല്‍.
സംഭവത്തില്‍ പൊലീസ് തുടര്‍നടപടികള്‍ സ്വീകരിച്ചുവരികയാണ്. യുവതിക്കെതിരായ ആരോപണങ്ങളും മൊഴിയിലെ വിവരങ്ങളും അന്വേഷണത്തിന്റെ ഭാഗമായുള്ള കണ്ടെത്തലുകളാണ്.