തിരുവനന്തപുരം: സംസ്ഥാനത്തെ സ്പാകളിൽ പൊലീസ് നടത്തിയ മിന്നൽ പരിശോധനയിൽ 14 കേസുകൾ രജിസ്റ്റർ ചെയ്തു. അഞ്ച് പേരെ അറസ്റ്റ് ചെയ്തു. ‘ഓപ്പറേഷൻ സ്പാ’ എന്ന പേരിൽ നടത്തിയ പരിശോധനയിൽ സംസ്ഥാനത്തെ 821 സ്ഥാപനങ്ങളിൽ 586 ഇടങ്ങളിലാണ് പരിശോധന പൂർത്തിയാക്കിയത്. ചട്ടങ്ങൾ പാലിക്കാത്ത 44 സ്പാകൾക്ക് പൊലീസ് നോട്ടീസ് നൽകി.
പരിശോധനയിൽ ഏറ്റവും കൂടുതൽ നടപടി ഉണ്ടായത് കോഴിക്കോട് സിറ്റിയിലാണ്. 87 കേന്ദ്രങ്ങളിൽ 70 ഇടങ്ങളിൽ പരിശോധന നടത്തി. നാല് കേസുകൾ രജിസ്റ്റർ ചെയ്യുകയും നാല് പേരെ അറസ്റ്റ് ചെയ്യുകയും ചെയ്തു.
മലപ്പുറം ജില്ലയിൽ 78 കേന്ദ്രങ്ങളിൽ 71 ഇടങ്ങളിൽ പരിശോധന നടത്തി. തൃശ്ശൂർ സിറ്റിയിൽ 58 കേന്ദ്രങ്ങളിൽ 56 ഇടങ്ങളിലും പാലക്കാട് 71 കേന്ദ്രങ്ങളിൽ 55 ഇടങ്ങളിലും പൊലീസ് പരിശോധന നടത്തി.
പത്തനംതിട്ടയിലും ആലപ്പുഴയിലും മൂന്ന് കേസുകൾ വീതം രജിസ്റ്റർ ചെയ്തു. എറണാകുളം റൂറലിൽ രണ്ട് കേസുകളും കോട്ടയം, ഇടുക്കി ജില്ലകളിൽ ഓരോ കേസും രജിസ്റ്റർ ചെയ്തിട്ടുണ്ട്.
നിയമലംഘനങ്ങൾക്കെതിരെ നടപടി തുടരും
സ്പാകളിൽ ചട്ടങ്ങൾ പാലിക്കുന്നുണ്ടോയെന്ന് പരിശോധിക്കുന്നതിന്റെ ഭാഗമായാണ് സംസ്ഥാനവ്യാപകമായി മിന്നൽ പരിശോധന നടത്തിയത്. പരിശോധനയിൽ നിയമലംഘനങ്ങൾ കണ്ടെത്തിയ സ്ഥാപനങ്ങൾക്കെതിരെ നടപടികൾ സ്വീകരിച്ചു. ചട്ടങ്ങൾ പാലിക്കാത്ത 44 സ്ഥാപനങ്ങൾക്ക് നോട്ടീസ് നൽകിയിട്ടുണ്ട്.
നിയമം ലംഘിക്കുന്ന സ്ഥാപനങ്ങൾക്കെതിരെ കർശന നടപടി തുടരുമെന്ന് ക്രമസമാധാന വിഭാഗം എഡിജിപി അറിയിച്ചു.
