ന്യൂഡല്ഹി: പ്രതിരോധ സാങ്കേതികവിദ്യയില് നിര്ണായക മുന്നേറ്റവുമായി ഇന്ത്യ. ശബ്ദത്തേക്കാള് അഞ്ചിരട്ടിയിലധികം വേഗത്തില് സഞ്ചരിക്കാന് ശേഷിയുള്ള ഹൈപ്പര്സോണിക് മിസൈലുകള്ക്കായുള്ള സ്ക്രാംജെറ്റ് എന്ജിന് സാങ്കേതികവിദ്യയില് വിജയകരമായ പരീക്ഷണം പൂര്ത്തിയാക്കി പ്രതിരോധ ഗവേഷണ വികസന സംഘടനയായ ഡിആര്ഡിഒ. ഇതോടെ അത്യാധുനിക മിസൈല് സാങ്കേതികവിദ്യയുടെ വികസനത്തില് ഇന്ത്യയുടെ മുന്നേറ്റം കൂടുതല് ശക്തമായിരിക്കുകയാണ്. ഹൈപ്പര്സോണിക് വേഗതയെന്നത് ശബ്ദത്തിന്റെ വേഗതയേക്കാള് അഞ്ചിരട്ടിയോ അതിലധികമോ വേഗത്തില് സഞ്ചരിക്കുന്നതിനെയാണ് സൂചിപ്പിക്കുന്നത്.
മണിക്കൂറില് ഏകദേശം 6,100 കിലോമീറ്ററിലധികം വേഗത കൈവരിക്കാന് ഈ സാങ്കേതികവിദ്യയിലൂടെ സാധിക്കും. അതിവേഗത്തില് സഞ്ചരിക്കുന്നതിനൊപ്പം സഞ്ചാരപാതയില് മാറ്റം വരുത്താനും ശേഷിയുള്ള ഇത്തരം മിസൈലുകളെ നിലവിലുള്ള വ്യോമപ്രതിരോധ സംവിധാനങ്ങള് ഉപയോഗിച്ച് തടയുന്നത് വലിയ വെല്ലുവിളിയാണ്. ഹൈദരാബാദിലെ ഡിഫന്സ് റിസര്ച്ച് ആന്ഡ് ഡെവലപ്മെന്റ് ലബോറട്ടറിയിലാണ് (ഡിആര്ഡിഎല്) നിര്ണായക പരീക്ഷണം നടന്നത്. ഹൈപ്പര്സോണിക് ക്രൂയിസ് മിസൈലുകള്ക്ക് ആവശ്യമായ സാങ്കേതികവിദ്യ വികസിപ്പിക്കുന്നതില് ഈ പരീക്ഷണം പ്രധാന ചുവടുവയ്പ്പായാണ് വിലയിരുത്തപ്പെടുന്നത്. സാധാരണ ജെറ്റ് എന്ജിനുകളില്നിന്ന് വ്യത്യസ്തമായ പ്രവര്ത്തനരീതിയാണ് സ്ക്രാംജെറ്റിനുള്ളത്.
സുപര്സോണിക് കംബഷന് റാംജെറ്റ് എന്നതിന്റെ ചുരുക്കപ്പേരാണ് സ്ക്രാംജെറ്റ്. അന്തരീക്ഷത്തില്നിന്ന് നേരിട്ട് വായു സ്വീകരിച്ച് അതുപയോഗിച്ച് ഇന്ധനം കത്തിച്ചാണ് എന്ജിന് പ്രവര്ത്തിക്കുന്നത്. വായു ഉള്ളിലേക്ക് വലിച്ചെടുക്കാന് സാധാരണ എന്ജിനുകളിലേതുപോലെ കറങ്ങുന്ന ഫാനുകളോ കംപ്രസ്സറുകളോ ഇതിന് ആവശ്യമില്ല. പകരം, മിസൈല് അതിവേഗത്തില് മുന്നോട്ടു കുതിക്കുമ്പോള് എന്ജിനിലേക്ക് ഇരച്ചെത്തുന്ന വായുവാണ് ഇന്ധനജ്വലനത്തിന് ഉപയോഗിക്കുന്നത്. ഇതിലൂടെ അതിവേഗത്തിലുള്ള സഞ്ചാരം സാധ്യമാക്കുന്നു. അമേരിക്ക, റഷ്യ, ചൈന തുടങ്ങിയ രാജ്യങ്ങള്ക്കൊപ്പം ഹൈപ്പര്സോണിക് ആയുധ സാങ്കേതികവിദ്യയില് ഇന്ത്യയും വലിയ മുന്നേറ്റമാണ് ലക്ഷ്യമിടുന്നത്. വിവിധ തരത്തിലുള്ള ഹൈപ്പര്സോണിക് ആയുധങ്ങള് വികസിപ്പിക്കുന്നതിനുള്ള പ്രവര്ത്തനങ്ങള് ഡിആര്ഡിഒയുടെ നേതൃത്വത്തില് പുരോഗമിക്കുകയാണ്.
അഞ്ചിരട്ടിയിലധികം വേഗത്തില് സഞ്ചരിക്കുന്ന മിസൈലുകളെ കണ്ടെത്തുന്നതും അവയുടെ സഞ്ചാരപാത കൃത്യമായി പ്രവചിക്കുന്നതും പ്രതിരോധ സംവിധാനങ്ങള്ക്ക് കടുത്ത വെല്ലുവിളിയാണ്. അതിനാല് സ്ക്രാംജെറ്റ് സാങ്കേതികവിദ്യയിലെ മുന്നേറ്റം ഇന്ത്യയുടെ പ്രതിരോധ ശേഷിക്ക് കൂടുതല് കരുത്തുപകരുമെന്നാണ് വിലയിരുത്തല്.















