കൊളംബോ : വനിത ലോകകപ്പ് യോഗ്യത മത്സരത്തിൽ ഇന്ത്യ കുതിപ്പ് തുടരുന്നു . തോൽവിയറിയാതെ മുന്നേറുന്ന ഇന്ത്യൻ വനിതകൾ പാകിസ്ഥാനെ ഏഴുവിക്കറ്റിനാണ് തറപറ്റിച്ചത് .
ആദ്യം ബാറ്റ് ചെയ്ത പാകിസ്ഥാൻ 43.4 ഓവറിൽ 67 റൺസിന് എല്ലാവരും പുറത്തായി .ഏകത ബിഷ്ടിന്റെ മാസ്മരിക പ്രകടനമാണ് പാകിസ്ഥാനെ തറപറ്റിച്ചത് . പത്ത് ഓവറിൽ എട്ട് റൺ വഴങ്ങി ബിഷ്ട് 5 വിക്കറ്റെടുത്തു. 9 റൺസിന് രണ്ട് വിക്കറ്റെടുത്ത ശിഖ പാണ്ഡെ ബിഷ്ടിന് പിന്തുണ നൽകി. പാക് നിരയിൽ രണ്ട് പേർക്ക് മാത്രമാണ് ഇരട്ട അക്കത്തിലെത്താൻ കഴിഞ്ഞത്.
മറുപടി ബാറ്റിംഗിനിറങ്ങിയ ഇന്ത്യൻ വനിതകൾ അനായാസം വിജയം കരസ്ഥമാക്കി . 22.3 ഓവറിൽ 3 വിക്കറ്റ് നഷ്ടത്തിൽ ഇന്ത്യ പാക് സ്കോർ മറികടന്നു. 29 റൺസുമായി പുറത്താകാതെ നിന്ന ദീപ്തി ശർമയാണ് ഇന്ത്യൻ നിരയിലെ ടോപ് സ്കോറർ.
