കൊൽക്കത്ത: ഐ.പി.എല്ലിൽ സൺറൈസേഴ്സ് ഹൈദരാബാദിനെതിരെ കൊൽക്കത്ത നൈറ്റ് റൈഡേഴ്സിന് 17 റൺസ് ജയം. 173 റൺസ് വിജയലക്ഷ്യം പിന്തുടർന്ന ഹൈദരാബാദിന് നിശ്ചിത ഓവറിൽ ആറ് വിക്കറ്റ് നഷ്ടത്തിൽ 155 റൺസ് എടുക്കാനെ കഴിഞ്ഞുള്ളു. റോബിൻ ഉത്തപ്പയാണ് കളിയിലെ താരം.
173 റൺസ് വിജയലക്ഷ്യത്തിലേക്ക് ബാറ്റുവീശിയ ഹൈദരാബാദിന് മികച്ച തുടക്കം ലഭിച്ചിട്ടും മുതലാക്കാനായില്ല. രണ്ട് സിക്സും രണ്ട് ബൗണ്ടറികളുമടിച്ച് യുവരാജ് സിംഗ് പ്രതീക്ഷ ഉയർത്തിയെങ്കിലും 26 റൺസിന് പുറത്തായത് ഹൈദരാബാദന് തിരിച്ചടിയായി. ബിപുൽ ശർമ അവസാന ഓവറുകളിൽ ആഞ്ഞടിച്ചെങ്കിലും 17 റൺസ് അകലെ പോരാട്ടം അവസാനിച്ചു.
ആദ്യം ബാറ്റ് ചെയ്ത കൊൽക്കത്ത ആറ് വിക്കറ്റ് നഷ്ടത്തിലാണ് 172 റൺസ് എടുത്തത്. 35 പന്തിൽ അഞ്ച് ബൗണ്ടറികളും നാല് സിക്സുമായി 68 റൺസ് എടുത്ത റോബിൻ ഉത്തപ്പയാണ് ടോപ്പ് സ്കോറർ. മനീഷ് പാണ്ഡെ 46 റൺസ് എടുത്തു. ജയത്തോടെ നാലു മത്സരങ്ങളിൽ നിന്നും ആറു പോയിന്‍റുമായ കൊൽക്കത്ത ഒന്നാമതെത്തി.
