ഐപിഎൽ പത്താം സീസണിൽ മികച്ച പ്രകടനം നടത്തിയതിലേറെയും ഇന്ത്യൻ താരങ്ങൾ. ഭുവനേശ്വർ കുമാറും, ജയദേവ് ഉനദ്കട്ടും വിക്കറ്റ് വേട്ടയിൽ മുന്നിലെത്തിയപ്പോൾ ഗൗതം ഗംഭീർ ഏറ്റവും കൂടുതൽ റൺസ് സ്കോർ ചെയ്ത രണ്ടാമത്തെ താരമായി. ഇഷാന്ത് കിഷനും, ഋഷഭ് പന്തും നിതീഷ് റാണയുമടക്കമുള്ള യുവതാരങ്ങളും മിന്നും പ്രകടനവുമായി കളം നിറഞ്ഞു.
ഐപിഎൽ പത്താം സീസണിൽ മുംബൈയും പൂനെയും തമ്മിലുള്ള കലാശപോരാട്ടം ശേഷിക്കെ മിന്നും പ്രകടനവുമായി ശ്രദ്ധേയമായത് ഇന്ത്യൻ താരങ്ങൾ. 14 ഇന്നിംഗ്സുകളിൽ നിന്നും 26 വിക്കറ്റ് നേടിയ സൺറൈസേഴ്സിന്റെ ഭുവനേശ്വർ കുമാർ പർപ്പിൾ ക്യാപ് സ്വന്തമാക്കുമെന്ന് ഏറെക്കുറെ ഉറപ്പായിക്കഴിഞ്ഞു.
11 ഇന്നിംഗ്സുകളിൽ നിന്നും ഒരു ഹാട്രിക് അടക്കം 22 വിക്കറ്റെടുത്ത പൂനെ താരം ജയദേവ് ഉനദ്കട്ടാണ് രണ്ടാം സ്ഥാനത്ത്. 19 വിക്കറ്റെടുത്ത മുംബൈ താരം മഗ് ലാഗനും, 18 വിക്കറ്റെടുത്ത ഇമ്രാൻ താഹീറുമാണ് നിലവിൽ മൂന്നും നാലും സ്ഥാനത്ത്. 18 വിക്കറ്റെടുത്ത ജസ്പ്രീത് ബൂമ്ര പ്രതീക്ഷ നിലനിർത്തുന്നു. സാമുവൽ ബദ്രിയും ആൻഡ്രു ടൈയും ഹാട്രിക് പ്രകടനവുമായി പ്രതീക്ഷ കാത്തു.
റൺവേട്ടയിൽ ഒരു സെഞ്ച്വറി അടക്കം 641 റൺസുമായി ഡേവിഡ് വാർണർ മുന്നിലെത്തിയപ്പോൾ, 498 റൺസ് നേടി ഗൗതം ഗംഭീർ രണ്ടാമതെത്തി. ശിഖർ ധവാൻ, സുരേഷ് റെയ്ന എന്നിവരാണ് മൂന്നും നാലും സ്ഥാനങ്ങളിൽ. സീസണിൽ രണ്ട് സെഞ്ച്വറി നേടിയ ഹാഷിം ആംല തകർത്തടിച്ചെങ്കിലും പഞ്ചാബിന് ഏറെ മുന്നേറാനായില്ല.
ബെൻസ്റ്റോക്സ്, സഞ്ജു വി സാംസൺ എന്നീ താരങ്ങളും സെഞ്ച്വറി നേടി.
ബാറ്റിംഗിൽ വിസ്മയം തീർത്ത ഡൽഹി താരങ്ങളായ ഋഷഭ് പന്തും, ശ്രേയസ് അയ്യരും, പൂനെയുടെ രാഹുൽ ത്രിപാദിയും, മുംബൈയുടെ നിതീഷ് റാണയും,ഗുജറാത്തിന്റെ ഇഷാന്ത് കിഷനും ഇന്ത്യയുടെ ഭാവി താരങ്ങളായി വിലയിരുത്തപ്പെട്ടു കഴിഞ്ഞു.
ഐപിഎല്ലിൽ അവസരം ലഭിച്ചത്4 മലയാളി താരങ്ങൾക്ക്. ഇതിൽ 3 പേരും മികച്ച പ്രകടനം കാഴ്ചവച്ചു. പ്രതീക്ഷയ്ക്കൊത്ത് ഉയരാഞ്ഞത് മൂന്ന് മത്സരങ്ങൾ മാത്രം കളിച്ച റോയൽ ചലഞ്ചേഴ്സ് താരം വിഷ്ണു വിനോദ് മാത്രം. 19 റൺസാണ് ഈ വിക്കറ്റ് കീപ്പർ ബാറ്റ്സ്മാന്റെ സമ്പാദ്യം.
സഹീർ ഖാന്റെ അഭാവത്തിൽ ഡൽഹിയെ നയിച്ച കരുൺ നായർ 14 മത്സരങ്ങളിൽ നിന്ന് ഒരു അർദ്ധ സെഞ്ച്വറി അടക്കം 281 റൺസ് നേടി. സഞ്ജു സാംസൺ ഒരു സെഞ്ച്വറിയും രണ്ട് അർദ്ധസെഞ്വറിയും അടക്കം 386 റൺസ് നേടി.
12 മത്സരങ്ങളിൽ നിന്ന് 11 വിക്കറ്റ് നേടിയ ബേസിൽ തമ്പിയും മികച്ച പ്രകടനം കാഴ്ചവച്ചു.