NewsSports

ചാമ്പ്യസ് ട്രോഫി ആദ്യ സെമിയില്‍ ഇംഗ്ലണ്ട് ഇന്ന് പാകിസ്ഥാനെ നേരിടും

കാര്‍ഡിഫ്: ചാമ്പ്യസ് ട്രോഫി ആദ്യ സെമിയില്‍ ഇംഗ്ലണ്ട് ഇന്ന് പാകിസ്ഥാനെ നേരിടും. കരുത്തരായ ഇംഗ്ലണ്ട് ബാറ്റിങ്ങ് നിരയും പാകിസ്ഥാന്റെ ബോളിങ്ങ് നിരയും തമ്മിലാണ് മത്സരം. മല്‍സരം മൂന്നു മുതല്‍ സ്റ്റാര്‍ സ്‌പോര്‍ട്‌സില്‍.

ഗ്രൂപ്പ് എയിലെ മൂന്ന് മത്സരങ്ങളും വിജയിച്ചാണ് ഇംഗ്ലണ്ട് അവസാന നാലില്‍ കയറിയത്. ആദ്യ മത്സരത്തില്‍ ബംഗ്ലാദേശിനെ എട്ട് വിക്കറ്റിനും രണ്ടാം കളിയില്‍ ന്യൂസിലാന്‍ഡിനെ 87 റണ്‍സിനും അവസാന മത്സരത്തില്‍ ഓസ്‌ട്രേലിയയെ മഴ നിയമത്തിന്റെ അടിസ്ഥാനത്തില്‍ 40 റണ്‍സിനും തോല്‍പ്പിച്ചു.

പാകിസ്ഥാന്‍ ഗ്രൂപ്പില്‍ ബിയില്‍ രണ്ടാം സ്ഥാനക്കാരായാണ് സെമിയിലെത്തിയത്. കളിച്ച മൂന്നില്‍ രണ്ട് വിജയവും ഒരു തോല്‍വിയുമായാണ് പാകിസഥാന്‍ സെമി പ്രവേശനം നേടിയത്. ആദ്യ മത്സരത്തില്‍ ഇന്ത്യയോട് മഴനിയമത്തിന്റെ അടിസ്ഥാനത്തില്‍ 124 റണ്‍സിന് തോറ്റു. എന്നാല്‍ രണ്ടാം മത്സരത്തില്‍ മഴനിയമത്തിന്റെ അടിസ്ഥാനത്തില്‍ ദക്ഷിണാഫ്രിക്കയെയും അവസാന മത്സരത്തില്‍ ശ്രീലങ്കയെ മൂന്ന് വിക്കറ്റിനും പരാജയപ്പെടുത്തി.

ജോ റൂട്ടും, ബെന്‍സ്‌റ്റോക്‌സും മോര്‍ഗനും ബട്ടലറും നയിക്കുന്ന ബാറ്റിങ്ങാണ് ഇംഗ്ലണ്ടിന്റെ കരുത്ത്. ഓപ്പണര്‍മാരായ ജാസണ്‍ റോയ്, ആഡം ഹെയ്ല്‍സ് എന്നിവരു കൂടി ഫോമിലേക്കുയര്‍ന്നാല്‍ ഇംഗ്ലണ്ടിനെ പിടിച്ചുകെട്ടുക പ്രയാസമായിരിക്കും. ഈ വര്‍ഷം പാക്കിസ്ഥാനെ ഇംഗ്ലണ്ട് ഏകദിന പരമ്പരയില്‍ 4-1നു തോല്‍പിച്ചിരുന്നു.

അതേ സമയം മുഹമ്മദ് ആമിറും ജുനൈദ് ഖാനും ഹസന്‍ അലിയും അടങ്ങു പേസ് ബൗളിങ്ങിലാണ് പാകിസ്ഥാന്റെ പ്രതീക്ഷ. എന്നാല്‍ അസ്ഹര്‍ അലി, മുഹമ്മദ് ഹഫീസ്, ഷൊഐബ് മാലിക്ക്, സര്‍ഫ്രാസ് അഹമ്മദ്, ബാബര്‍ അസം, എന്നീ ബാറ്റ്‌സ്മാന്മാരുടെ ഫോമില്ലായ്മയാണ് പാകിസ്ഥാനെ കുഴക്കുന്നത്.

ഐസിസിയുടെ മേജര്‍ ഏകദിന കിരീടങ്ങളൊന്നും സ്വന്തമാക്കാന്‍ കഴിയാത്ത ഇംഗ്ലണ്ട് ആദ്യമായി ഒരു കീരീടം തേടി ഇറങ്ങുമ്പോള്‍ തീ പാറുന്ന പോരാട്ടത്തിനാണ് സോഫിയ ഗാര്‍ഡന്‍സ് സാക്ഷ്യം വഹിക്കുക.

നാളെ നടക്കുന്ന രണ്ടാം സെമിയില്‍ ഇന്ത്യയുടെ എതിരാളികള്‍ ബംഗ്ലാദേശാണ്.

Please scroll down for comments

Close
Close