ചാമ്പ്യന്‍സ് ട്രോഫി സെമിഫൈനലില്‍ ഇന്ത്യ ഇന്ന് ബംഗ്ലാദേശിനെ നേരിടുമ്പോള്‍ മധ്യനിര ബാറ്റ്‌സ്മാന്‍ യുവരാജ് സിംഗ് തന്റെ ക്രിക്കറ്റ് ജീവിതത്തിലെ മറ്റൊരു നാഴികകല്ലു കൂടി പിന്നിടും. മുന്നൂറാമത്തെ ഏകദിന മത്സരത്തിനാണ് യുവരാജ് പാഡ്‌കെട്ടുക.
300ലധികം രാജ്യാന്തര ഏകദിന മത്സരങ്ങള്‍ കളിക്കുന്ന അഞ്ചാമത്തെ ഇന്ത്യന്‍ താരമെന്ന നേട്ടം കൂടിയാണ് പ്രിയതാരത്തിനെ കാത്തിരിക്കുന്നത്. 463 ഏകദിനമത്സരങ്ങളില്‍ ഇന്ത്യന്‍ ജെഴ്‌സിയണിഞ്ഞ ക്രിക്കറ്റ് ദൈവം സച്ചിന്‍ ടെന്‍ഡുല്‍ക്കറാണ് പട്ടികയില്‍ മുന്നില്‍.
ഇന്ത്യയുടെ മുന്‍ നായകന്‍ന്മാരായ രാഹുല്‍ ദ്രാവിഡ് (340), മുഹമ്മദ് അസറുദ്ദീന്‍ (334), സൗരവ് ഗാംഗുലി (308) എന്നിവരാണ് 300 ക്ലബിലുള്ള ഇന്ത്യന്‍ താരങ്ങള്‍.
300 മത്സരങ്ങള്‍ കളിക്കുന്ന നായകനാകാത്ത ആദ്യ ഇന്ത്യന്‍ താരമെന്ന ഖ്യാതിയും യുവിക്ക് സ്വന്തം.
രണ്ടായിരത്തില്‍ കെനിയക്കെതിരെ അരങ്ങേറ്റം കുറിച്ച യുവരാജ് ഇതുവരെ 8540 റണ്‍സ് നേടിയിട്ടുണ്ട്.അതില്‍ 14 സെഞ്ച്വറിയും 52 അര്‍ധ സെഞ്ച്വറിയും ഉള്‍പ്പെടുന്നു.
