കൊച്ചി: കേരള ബ്ലാസ്റ്റേഴ്‌സിന്റെ പുതിയ താരങ്ങളുടെ തെരഞ്ഞെടുപ്പ് സംബന്ധിച്ച് തീരുമാനമൊന്നുമായിട്ടില്ലെന്ന് ടീം സിഇഒ വരുണ്‍ ത്രിപുരനേനി. ഇതുമായി ബന്ധപ്പെട്ട് നിരവധി ചര്‍ച്ചകള്‍ പുരോഗമിക്കുകയാണ്. പുതിയ കോച്ചിനെ തെരഞ്ഞെടുക്കുന്ന കാര്യത്തിലും ചര്‍ച്ചകള്‍ മാത്രമാണ് ഉണ്ടായിട്ടുള്ളതെന്നും വരുണ്‍ ത്രിപുരനേനി കൊച്ചിയില്‍ പറഞ്ഞു.
പുതിയ സീസണിന് മുന്നോടിയായി പ്രമുഖരായ വിദേശതാരങ്ങളുമായി ടീം ധാരണയുണ്ടാക്കിയിട്ടുണ്ടെന്ന് അഭ്യൂഹങ്ങളുണ്ടായിരുന്നു. ഇതിന്റെ പശ്ചാത്തലത്തിലാണ് ടീം സെലക്ഷനില്‍ ചര്‍ച്ചകള്‍ മാത്രമാണ് നടക്കുന്നതെന്ന് കേരള ബ്ലാസ്റ്റേഴ്‌സ് സിഇഒ വരുണ്‍ ത്രിപുരനേനി വ്യക്തമാക്കിയത്. ടീമിലേക്ക് വിദേശ താരങ്ങളെ പലരെയും പരിഗണിക്കുന്നുണ്ട്.
എന്നാല്‍ ടൂര്‍ണമെന്റ് കാലാവധി സംബന്ധിച്ച് സംശയങ്ങളുള്ളതിനാല്‍ വിദേശ താരങ്ങളുമായുള്ള ചര്‍ച്ചകള്‍ തുടരുന്നതേയുള്ളു. ആരെയൊക്കെ ടീമില്‍ നിലനിര്‍ത്തണമെന്ന കാര്യത്തിലും തീരുമാനമായിട്ടില്ലെന്നും വരുണ്‍ ത്രിപുരനേനി പറഞ്ഞു.
സികെ വിനീത് കഴിഞ്ഞ സീസണില്‍ ടീമിനായി മികച്ച കളി പുറത്തെടുത്തിട്ടുണ്ട്. എന്നാല്‍ വിനീതിന്റെ കാര്യത്തിലും ഉറപ്പ് പറയാനാകില്ലെന്നും ത്രിപുരനേനി വ്യക്തമാക്കി.
കേരള ബ്ലാസ്റ്റേഴ്‌സും കെഎഫ്എയും സംയുക്തമായി ആരംഭിക്കുന്ന ഫുട്‌ബോള്‍ സ്‌കൂളിന്റെ ലോഗോപ്രകാശനം ചടങ്ങില്‍ കെഎഫ്എ പ്രസിഡന്റ് കെഎംഎ മേത്തറും വരുണ്‍ തൃപുരനേനിയും ചേര്‍ന്ന് നിര്‍വ്വഹിച്ചു.
കേരളത്തിലെ 14 ജില്ലകളിലായി 25 ഫുഡ്‌ബോള്‍ സ്‌കൂളുകളാണ് ഇതിന്റെ ഭാഗമായി തുടങ്ങുക. കേരള ബ്ലാസ്റ്റേഴ്‌സിന്റെ ടെക്‌നിക്കല്‍ ഡയറക്ടറായി ചുമതലയേറ്റ താംങ്‌ബോയ് സിങ്‌തോയുടെ മേല്‍നോട്ടത്തിലാണ് പുതിയ താരങ്ങളെ വാര്‍ത്തെടുക്കുന്നതിനായി സ്കൂളുകള്‍ ആരംഭിക്കുന്നത്.
