കൊളംബോ: ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റില് ഇന്ത്യക്ക് ഇന്നിംഗ്സ് വിജയം. ഇന്നിംഗ്സിനും 53 റണ്സിനുമാണ് ഇന്ത്യ ശ്രീലങ്കയെ പരാജയപ്പെടുത്തിയത്. ഇതോടെ മൂന്ന് മത്സരങ്ങളുള്ള പരമ്പര ഇന്ത്യ സ്വന്തമാക്കി. ബൗളിങിലും ബാറ്റിംഗിലും ഒരു പോലെ തിളങ്ങിയ ഇന്ത്യ കളിയിലുട നീളം ആധിപത്യം പുലര്ത്തി. രണ്ടാമിന്നിംഗ്സില് ആറ് വിക്കറ്റ് വീഴ്ത്തിയ രവീന്ദ്ര ജഡേജയാണ് ശ്രീലങ്കയെ തകര്ത്തത്.
രണ്ടാമിന്നിംഗ്സിലെ രണ്ട് സെഞ്ച്വറികളാണ് ശ്രീലങ്കയെ ഭേദപ്പെട്ട സ്കോറിലെത്തിച്ചത്. ഇന്നലെ സെഞ്ച്വറി നേടിയ കുശാല് മെന്ഡിസി(110)നെ കൂടാതെ ഓപ്പണര് കരുണരത്നെ(144)യും സെഞ്ച്വറി നേടി. രണ്ട് വിക്കറ്റ് നഷ്ടത്തില് മത്സരം പുനരാരംഭിച്ച ശ്രീലങ്കയ്ക്ക് പുഷ്പ കുമാര(16)യെയും ക്യാപ്റ്റന് ചാന്ദിമാല്(2)നെയും ആദ്യം തന്നെ നഷ്ടമായി.
പിന്നീട് വന്ന ആഞ്ജലോ മാത്യൂസും സെഞ്ച്വറി നേടിയ കരുണരത്നെയെും ടീമിനെ 300 കടത്തിയെങ്കിലും സ്കോര് 310 ല് നില്ക്കേ കരുണരതനെ പുറത്തായി. അഞ്ച് റണ്സ് കൂട്ടി ചേര്ക്കുന്നതിനിടെ മാത്യൂസും പുറത്തായത് ശ്രീലങ്കയ്ക്ക് തിരിച്ചടിയായി. പിന്നീട് വന്ന പേരെരയ്ക്ക് നാലു റണ്സു മാത്രമെ എടുക്കാനായുള്ളു.
ഇന്ത്യയ്ക്ക് വേണ്ടി ജഡേജ അഞ്ചും അശ്വിന്, പാണ്ഡ്യ എന്നിവര് രണ്ടും ഉമേഷ് യാദവ് ഒരു വിക്കറ്റും വീഴ്ത്തി.
ഒന്നാമിന്നിംഗ്സില് ഇന്ത്യന് സ്കോറായ 622 റണ്സ് പിന്തുടര്ന്ന ശ്രീലങ്ക 183 റണ്സില് എല്ലാവരും പുറത്തായി. അഞ്ച് വിക്കറ്റടുത്ത അശ്വിനും രണ്ട് വിക്കറ്റ് വീതം വീഴ്ത്തിയ ജഡേജയും ഷാമിയുമാണ് ലങ്കയെ തകര്ത്തത്. നേരത്തെ ഒന്നാമിന്നിംഗ്സില് ചേതേശ്വര് പൂജാരയുടെയും (133), അജിങ്ക്യ രഹാനെയുടെയും (132) സെഞ്ച്വറികളും ഓപ്പണര് ലോകേഷ് രാഹുല് (57), ആര്.അശ്വിന് (54), വൃദ്ധിമാന് സാഹ (67), രവീന്ദ്ര ജഡേജ (പുറത്താകാതെ 70) എന്നിവരുടെ അര്ദ്ധസെഞ്ച്വറികളുമാണ് ഇന്ത്യക്ക് കൂറ്റന് സ്കോര് സമ്മാനിച്ചത്.