കൊച്ചി: അണ്ടര് 17 ലോകകപ്പിന് മുന്നോടിയായി പ്രത്യേക അവലോകനയോഗം കൊച്ചിയില് ചേര്ന്നു. നേരത്തെ രൂപീകരിച്ച വിവിധ സബ് കമ്മിറ്റികളുടെ പ്രവര്ത്തനങ്ങള് യോഗത്തില് ചര്ച്ച ചെയ്തു. ലോകകപ്പിന്റെ കൊച്ചിയിലെ മത്സരങ്ങളുടെ ഓപ്പണിംഗ് സെറിമണി കലൂര് ജവഹര്ലാല് നെഹ്രു സ്റ്റേഡിയത്തിന് പുറത്ത് നടത്താനാണ് തീരുമാനം. പരിശീലന ഗ്രൗണ്ടുകള്ക്ക് കൂടുതല് സുരക്ഷയേര്പ്പെടുത്താനും യോഗത്തില് തീരുമാനമായി.
കഴിഞ്ഞ യോഗത്തില് രൂപീകരിച്ച വിവിധ സബ്കമ്മിറ്റികളുടെ പ്രവര്ത്തനം വിലയിരുത്തുന്നതിനാണ് ഇന്ന് മന്ത്രി എസി മൊയ്തീന്റെ നേതൃത്വത്തില് പ്രത്യേക യോഗം ചേര്ന്നത്. സബ്ബ് കമ്മിറ്റി ഭാരവാഹികളും ഫിഫ പ്രതിനിധികളുമാണ് യോഗത്തില് പങ്കെടുത്തത്. ഒക്ടോബര് ഏഴിന് കൊച്ചിയിലെ ആദ്യ മത്സരത്തിന് മുന്നോടിയായി നടക്കുന്ന ആഘോഷപരിപാടികള് സ്റ്റേഡിയത്തിന് പുറത്ത് നടത്താന് യോഗം തീരുമാനിച്ചു.
സുരക്ഷ മുന്കരുതലുകളുടെ ഭാഗമായാണ് പരിപാടി സ്റ്റേഡിയത്തിന് പുറത്ത് നടത്തണമെന്ന നിലപാട് ഫിഫ സ്വീകരിച്ചത്. അംബേദ്കര് സ്റ്റേഡിയത്തിനായിരിക്കും ഇക്കാര്യത്തില് പ്രഥമ പരിഗണന നല്കുക. ലോകകപ്പ് കാണാനെത്തുന്ന വിദേശികള്ക്കായി കൊച്ചിയിലെ ഹോട്ടലുകളില് പ്രത്യേക താമസ സൗകര്യമൊരുക്കുന്നതിനുള്ള നടപടികള് പൂര്ത്തിയായതായി പിടി തോമസ് എംഎല്എ അറിയിച്ചു.
മത്സരങ്ങളോടനുബന്ധിച്ച് ഇവിടങ്ങളില് ബിയറിന്റെ ലഭ്യത ഉറപ്പാക്കണമെന്ന ആവശ്യവും യോഗത്തിലുയര്ന്നു. വേളി പരേഡ് ഗ്രൗണ്ടുള്പ്പെടെയുള്ള പരിശീലന മൈതാനങ്ങള്ക്ക് കൂടുതല് സുരക്ഷയേര്പ്പെടുത്താനും തീരുമാനമായി. നഗരത്തിലെയും മറ്റിടങ്ങളിലെയും മാലിന്യ നിര്മാര്ജ്ജനം കാര്യക്ഷമമാക്കുന്നതിന് കൊച്ചി കോര്പ്പറേഷനും ജില്ലാ കളക്ടറും പ്രത്യേക യോഗങ്ങളും വിളിക്കും. കൊച്ചിക്ക് വേണ്ടി സോംഗ് ഫോര് ഫുട്ബോളെന്ന പേരില് ഗാനം പുറത്തിറക്കാനും തീരുമാനമായിട്ടുണ്ട്.