ആൾട്ടോയെ കടത്തിവെട്ടി ഡിസയർ: ഇന്നോവയ്‌ക്ക് അടി തെറ്റി : ആഗസ്റ്റിലെ കാർ വിൽപ്പന ഇങ്ങനെ

‌ആഗസ്റ്റിൽ ഏറ്റവും കൂടുതൽ വിൽപ്പന നടന്ന കാറെന്ന ബഹുമതി മാരുതി സുസുകി ഡിസയറിന് . സ്ഥിരമായി ഒന്നാം സ്ഥാനം കയ്യടക്കി വന്നിരുന്ന മാരുതിയുടെ തന്നെ ആൾട്ടോ മോഡലിനെയാണ് ഡിസയർ പിന്നിലാക്കിയത് .

2017 ആഗസ്റ്റിൽ 30,934 ഡിസയറുകളാണ് വിറ്റുപോയത് . ആൾട്ടോ 21,521 എണ്ണമാണ് വിറ്റത് . 2017 ൽ ഇത് രണ്ടാമത്തെ പ്രാവശ്യമാണ് ആൾട്ടോ പിന്നിലാകുന്നത് . കഴിഞ്ഞ ഏപ്രിലിൽ മാരുതിയുടെ തന്നെ സ്വിഫ്റ്റ് ആൾട്ടോയെക്കാൾ നേരിയ മുൻതൂക്കം നേടിയിരുന്നു . എങ്കിലും ഇത്രയും വലിയ വ്യത്യാസത്തിൽ ആൾട്ടോ പിന്നിലാകുന്നത് ഇതാദ്യമായാണ് .

ഏറ്റവും വിൽപ്പനയുള്ള കാറുകളിൽ ആദ്യ പത്തിൽ ഏഴെണ്ണവും മാരുതിയുടെ വാഹനങ്ങളാണ് . ആദ്യ ആറു സ്ഥാനങ്ങളിലും മാരുതിയുടെ കാറുകൾ തന്നെ. മൂന്നാം സ്ഥാനത്ത് ബലെനോയും നാലാം സ്ഥാനത്ത് വിറ്റാറ ബ്രെസയും .അഞ്ചും ആറും സ്ഥാനങ്ങളിൽ വാഗൺ ആറും സ്വിഫ്റ്റും .ഹ്യൂണ്ടായുടെ ഐ ടെൻ ഗ്രാൻഡ് ആണ് ഏഴാം സ്ഥാനത്ത് . ഇലൈറ്റ് ഐ 20 എട്ടാം സ്ഥാനം നേടിയപ്പോൾ ക്രേറ്റ ഒൻപതാമതെത്തി . പത്താമത് വീണ്ടും മാരുതിയുടെ കാർ തന്നെ . സെലേറിയോ .

റെനോയുടെ ജനപ്രിയ വാഹനമായ ക്വിഡ് ആണ് പതിനൊന്നിൽ . ടാറ്റ ടിയാഗോ പതിമൂന്നാം സ്ഥാനത്താണ്. ഇന്നോവയുടെ വിൽപ്പനയിൽ കഴിഞ്ഞ മാസത്തെ അപേക്ഷിച്ച് വലിയ ഇടിവാണുണ്ടായത് . 36 ശതമാനമാണ് ഇന്നോവയുടെ വിൽപ്പന കുറഞ്ഞത് . ജൂലൈയിൽ 9369 യൂണിറ്റുകൾ വിറ്റുപോയപ്പോൾ ആഗസ്റ്റിൽ അത് 5963 ആയി കുറഞ്ഞു.

ഹ്യൂണ്ടായ് വെർനയാണ് ആഗസ്റ്റിൽ വലിയ നേട്ടമുണ്ടാക്കിയത് .ജൂലയിൽ 520 യൂണിറ്റുകൾ മാത്രം വിറ്റുപോയപ്പോൾ ആഗസ്റ്റിൽ 4,779 യൂണിറ്റുകൾ വിറ്റഴിയ്‌ക്കാൻ കമ്പനിക്ക് കഴിഞ്ഞു . പുതിയ മോഡൽ വെർനയാണ് വാഹനപ്രേമികളെ ആകർഷിച്ചത് .

ആഗസ്റ്റിൽ ഇന്ത്യയിൽ പുതുതായി നിരത്തിലിറങ്ങിയ കാറുകളുടെ എണ്ണം 2,90,102 ആണ് . 52.14 ശതമാനം ഷെയറോടെ മാരുതി തന്നെയാണ് മുന്നിൽ . 1,51,270 കാറുകൾ മാരുതി സുസുകി വിറ്റഴിച്ചപ്പോൾ വളരെ പിന്നിൽ രണ്ടാം സ്ഥാനത്താണ് ഹ്യൂണ്ടായ് . 16.24 ശതമാനമാണ് ഹ്യൂണ്ടായുടെ വിഹിതം . വിറ്റഴിച്ചത് 47,103 കാറുകൾ. മൂന്നാം സ്ഥാനത്തുള്ള മഹീന്ദ്ര 17,609 കാറുകൾ വിറ്റു . വിഹിതം 6.07 ശതമാനം. ഏറ്റവും കുറച്ച് കാറുകൾ വിറ്റത് ഷെവർലേയാണ് . 18 എണ്ണം.

പതിവുപോലെ ഹാച്ച് ബാക്ക് കാറുകൾ 46 ശതമാനത്തോടെ ജനപ്രിയമായപ്പോൾ സെഡാൻ വിഭാഗത്തിന് 23 ശതമാനം പിന്തുണ ലഭിച്ചു . എം‌യുവി പതിമൂന്ന് ശതമാനവും എസ്‌യു‌വി 18 ശതമാനവും വിറ്റഴിക്കപ്പെട്ടു. ജൂണിൽ ജിഎസ്ടിയുടെ മുന്നോടിയായി കാർ വിപണി അല്പം പിന്നോട്ട് പോയെങ്കിലും ജൂലൈയിലും ആഗസ്റ്റിലും വലിയ കുതിച്ചു ചാട്ടമാണുണ്ടായത് .