കാർ പ്രേമികൾക്ക് ഡിസംബർ ഓഫറുകളുടെ കാലമാണ്. പുതു വർഷത്തിൽ കുടുംബത്തിലേക്ക് ഒരു വാഹനം , കേട്ടാൽ ഞെട്ടുന്ന ഓഫറുകളുമായി സ്വന്തമാക്കാൻ ഒരവസരം. ഇത്തവണയും വൻ കിട കാർ നിർമ്മാതാക്കൾ വാഹനപ്രേമികൾക്കായി നിരവധി ഓഫറുകളുമായാണ് എത്തിയിരിക്കുന്നത്.
ഹ്യൂണ്ടായ്,മാരുതി സുസുക്കി തുടങ്ങിയ കമ്പനികൾ ഉപഭോക്താക്കൾക്ക് നിരവധി ഇളവുകളാണ് ഇത്തവണ പ്രഖ്യാപിച്ചിരിക്കുന്നത്.
ആൾട്ടോയുടെ വിലയിൽ 25000 മുതൽ 30000 വരെ കിഴിവാണ് മാരുതി സുസുക്കി പ്രഖ്യാപിച്ചിരിക്കുന്നത്.വാഗണർക്ക് 35000 രൂപയുടെ കിഴിവും പ്രഖ്യാപിച്ചിട്ടുണ്ട്.എർട്ടിഗയുടെ ഡൽഹി,മുംബൈ ഡീലർമാർ 40000 രൂപയാണ് ക്രിസ്മസ് കാല ഇളവായി പ്രഖ്യാപിച്ചിരിക്കുന്നത്.
നേരത്തെ ഹൈബ്രിഡ് മോഡലുകൾക്ക് 12.5% എക്സൈസ് നികുതി ചുമത്തിയിരുന്നു. സാധാരണ നികുതി ഉൾപ്പെടെ 28 ശതമാനം വിലയിൽ പ്രകടമായിരുന്നു. എന്നാൽ ഇപ്പോൾ ജി എസ് ടി ഉൾപ്പെടെ ഇത് 43 ശതമാനമായി മാറി.
എർട്ടിഗയുടെ പെട്രോൾ വേരിയന്റ് മോഡലിന് 10,000 രൂപയാണ് ഇളവ് നൽകിയിരിക്കുന്നത്.എന്നാൽ, അതേ സമയം കമ്പനിയുടെ ഉയർന്ന വിൽപനയുള്ള മോഡലുകളായ ബലെനോ, വിറ്റാര ബ്രെസസ, പുതിയ ഡിസയർ എന്നിവക്ക് ഡിസ്കൗണ്ടുകൾ പ്രഖ്യാപിച്ചിട്ടില്ല.
ഹ്യൂണ്ടായ് ഗ്രാൻഡ് ഐ10 മോഡലിന് 80000 മുതൽ 90000 വരെ ഇളവ് പ്രഖ്യാപിച്ചിട്ടുണ്ട്.എലൈറ്റ് ഐ 20 ന് 40,000 രൂപ മുതൽ 50,000 രൂപ വരെയും വിലക്കുറവ് നൽകും.
ഇരുചക്രവാഹനങ്ങൾക്ക് ഹീറോ മോട്ടോ കോർപ്പ് 1500 രൂപയോളം ഡിസ്കൗണ്ട് നൽകുന്നുണ്ട്. പേയ് ടി എം വഴി പണം നൽകുന്ന ഉപഭോക്താവിന് 3,000 രൂപയുടെ ഡിസ്കൗണ്ട് നൽകുന്നതിന് പുറമേയാണിത്.
അടുത്തയിടെ വിൽപ്പനയ്ക്കെത്തിയ ടാറ്റായുടെ ലൈഫ് സ്റ്റൈൽ കോംപാക്ട് എസ് യു വിയായ ‘നെക്സ’ന് പ്രഖ്യാപിച്ച പ്രാരംഭ വില ഈ മാസത്തോടെ അവസാനിക്കും.
എന്നാൽ പുതുവർഷത്തിൽ കാർ വില വർധിപ്പിക്കുന്ന കമ്പനികളുമുണ്ട്.
ജാപ്പനീസ് നിർമാതാക്കളായ ടൊയോട്ട കിർലോസ്കർ മോട്ടർ പുതുവർഷത്തിൽ വില വർധിക്കുമെന്ന് പ്രഖ്യാപിച്ചിരുന്നു.പുതുവർഷത്തിൽ വാഹന വില വർധിപ്പിക്കാൻ ജാപ്പനീസ് നിർമാതാക്കളായ ഇസൂസു മോട്ടോഴ്സ് ഇന്ത്യയും ഫോക്സ്വാഗൻ ഗ്രൂപ്പിൽ പെട്ട ചെക്ക് ബ്രാൻഡായ സ്കോഡ ഓട്ടോ ഇന്ത്യയും ഒരുങ്ങുന്നുണ്ട്.