ന്യൂഡൽഹി : പ്രതിരോധ രംഗത്ത് ആധുനിക വിദ്യാഭ്യാസവും സാങ്കേതികതയും ലക്ഷ്യമാക്കി ഭാരതം സർവകലാശാല സ്ഥാപിക്കാൻ ഒരുങ്ങുന്നു. പ്രതിരോധ ഗവേഷണവും നയതന്ത്ര പഠനവുമുൾപ്പെടെ വിവിധ വിഷയങ്ങൾ ഗുഡ്ഗാവിലെ ബിമോളയിൽ ആരംഭിക്കുന്ന സർവകലാശാലയിൽ ഉണ്ടാകും .
ഇന്ത്യൻ നാഷണൽ ഡിഫൻസ് യൂണിവേഴ്സിറ്റി എന്ന പേരിലാണ് സർവകലാശാല ആരംഭിക്കുക. ഇത് സംബന്ധിച്ച പേപ്പറുകൾ മന്ത്രിസഭയുടെ മുൻപാകെ എത്തിക്കഴിഞ്ഞു. അടുത്ത മന്ത്രിസഭാ യോഗത്തിൽ അനുവാദം നൽകുമെന്നാണ് സൂചന. 2015 ലാണ് പ്രതിരോധ മന്ത്രാലയം ഇത്തരമൊരു ശുപാർശ മന്ത്രിസഭയ്ക്ക് മുന്നിൽ സമർപ്പിച്ചത്.
ബിരുദ , ബിരുദാനന്തര ബിരുദ തലത്തിൽ പ്രതിരോധ രംഗത്ത് പഠനം നടത്താനാണ് ലക്ഷ്യമിടുന്നത് . എന്തൊക്കെ കോഴ്സുകൾ വേണമെന്ന കാര്യത്തിൽ അന്തിമ തീരുമാനം ആയിട്ടില്ല . ഇന്ത്യയിലെ ആദ്യത്തെ പ്രതിരോധ സർവകലാശാലയായിരിക്കും ഇത്. തന്ത്രവും വിശകലനവും നയപരമായ തീരുമാനങ്ങളും ആസൂത്രണവും പഠന വിഷയമാകുമെന്നാണ് നിരീക്ഷണം.
