ന്യൂഡൽഹി: വാഹന പ്രേമികളുടെ ഏറെ നാളത്തെ കാത്തിരിപ്പിനൊടുവിൽ പുതിയ സ്വിഫ്റ്റ് എത്തി. ഡൽഹി ഓട്ടോ എക്സ്പോയിലാണ് മാരുതി സുസുക്കി തങ്ങളുടെ ഏറ്റവും ജനപ്രീതിയുള്ള വാഹനങ്ങളിലൊന്നായ സ്വിഫ്റ്റിന്റെ പരിഷ്കരിച്ച പതിപ്പ് പുറത്തിറക്കിയത്.
രൂപത്തിലും ഭാവത്തിലും പ്രകടമായ ഒട്ടേറെ മാറ്റങ്ങളാണ് പുതിയ സ്വിഫ്റ്റിനുള്ളത്. രൂപത്തിൽ പ്രധാന മാറ്റങ്ങൾ വാഹനത്തിന്റെ മുന്നിലാണ്. ഹെക്സഗണല് ഫ്ലോട്ടിങ് ഗ്രില്ല്, പുതിയ എല്ഇഡി ഹെഡ് ലാമ്പ്-ഫോഗ് ലാമ്പ് എന്നിവ സ്വിഫ്റ്റിന്റെ രൂപത്തെ മൊത്തത്തിൽ മാറ്റുന്നതാണ്.
പിൻഭാഗത്തും മാറ്റങ്ങളുണ്ട്. പിന്നിലെ ഗ്ലാസും ടെയിൽ ലാമ്പിനും മാറ്റമുണ്ട്. ഡാറ്റ്സൺ ഗോയോടെ സാമ്യം തോന്നിക്കുന്നതാണ് പുതിയ സ്വിഫ്റ്റിന്റെ പിൻഭാഗം. ഫ്ലോട്ടിംഗ് റൂഫ് പുതിയ സ്വിഫ്റ്റിന് ക്ലാസിക് സ്റ്റൈൽ നൽകുന്നു.
വാഹനത്തിന്റെ അകവും പുതിയ ലുക്കിലാണ്. പുതുക്കിപ്പണിത ഡാഷ്ബോര്ഡ്, ത്രീ സ്പോക്ക് സ്റ്റിയറിങ് വീല്, ഇന്സ്ട്രുമെന്റ് പാനല് സെന്റര് കണ്സോള്, ഇന്ഫോടെയ്ന്മെന്റ് സിസ്റ്റം. തുടങ്ങിയവയാണ് പുതിയ മാറ്റങ്ങൾ.
https://www.facebook.com/MSArenaOfficial/videos/1589911177771628/
3840 എംഎം നീളം, 1735 എംഎം വീതി, 1530 എംഎം ഉയരവും വാഹനത്തിനുണ്ട്. 268 ലിറ്ററാണ് ബൂട്ട് സ്പേസ്.
നിലവിലെ സ്വിഫ്റ്റിനെ അപേക്ഷിച്ച് മികച്ച ഇന്ധന ക്ഷമത പുതിയ സ്വിഫ്റ്റിനുണ്ടെന്ന് കമ്പനി അവകാശപ്പെടുന്നുണ്ട്. ഡീസൽ മോഡലിന് ലിറ്ററിന് 28.4 കിലോമീറ്ററും പെട്രോളിന് ലിറ്ററിന് 22 കിലോമീറ്ററും ലഭിക്കുമെന്ന് കമ്പനി പറയുന്നു. നിലവിലുള്ളതിനേക്കാൾ 7% അധികമാണ് ഇത്.
പെട്രോളിലും ഡീസലിലുമായി 12 വേരിയന്റുകളിൽ പുറത്തിറങ്ങുന്ന സ്വിഫ്റ്റിന്റെ പെട്രോൾ വേരിയന്റന്റെ വില 4.99 ലക്ഷം മുതലും ഡീസൽ വേരിയന്റിന് 5.99 ലക്ഷം മുതലുമാണ് വില.
മാരുതി സുസുക്കിയുടെ പ്രീമിയം ഹാഷ്ബാക്കായ സ്വിഫ്റ്റ് 2005 ൽ ആണ് വിപണിയിലെത്തുന്നത്. പത്തുവർഷം കൊണ്ട് ഏകദേശം 13 ലക്ഷം സ്വിഫ്റ്റുകൾ മാരുതി വിറ്റിട്ടുണ്ട്.