ന്യൂഡൽഹി: ഇന്ത്യൻ നിരത്തുകളിൽ പുതിയ വിപ്ലവം സൃഷ്ടിക്കാൻ മഹീന്ദ്ര എത്തുന്നു. രാജ്യത്തെ ആദ്യത്തെ കൺവെർട്ടബിൾ എസ് യുവി മഹീന്ദ്ര അവതരിപ്പിച്ചു. ഡൽഹി ഓട്ടോ എക്സ്പോയിലാണ് പുതിയ വാഹനം മഹീന്ദ്ര അവതരിപ്പിച്ചത്. സ്റ്റിങ്ങർ എന്ന് പേരിട്ടിരിക്കുന്ന വാഹനത്തിന്റെ കൺസെപ്റ്റ് മോഡലാണ് ഇപ്പോൾ പുറത്തിറക്കിയത്.
ടിയുവി 300 നോട് സാമ്യമുള്ള സ്റ്റിങ്ങർ പുറത്തിറങ്ങുന്നതോടെ വാഹന വിപണിയിൽ ചലനങ്ങൾ സൃഷ്ടിക്കാനാകുമെന്നാണ് മഹീന്ദ്ര പ്രതീക്ഷിക്കുന്നത്.
നാല് മീറ്ററിൽ താഴെ നീളമുള്ള സ്റ്റിങ്ങറിന് കരുത്ത് പകരുക മഹീന്ദ്രയുടെ എംഹൗക്ക് കുടുംബത്തില്പ്പെട്ട 140 ബിഎച്ച്പി പവറും 320 എന്എം ടോര്ക്കുമേകുന്ന 1.5 ലിറ്റര് എന്ജിനാണ്.
മുൻഭാഗം പതിവ് മഹീന്ദ്ര കാറുകളോട് ഏറെ സാമ്യമുള്ളതാണ്. മസ്കുലർ ലുക്കാണ് സ്റ്റിങ്ങറിന്റെ മറ്റൊരു പ്രത്യേകത. ഡേ റ്റൈം റണ്ണിംഗ് ലാമ്പുകൾ, എൽഇഡി ഹെഡ് ലൈറ്റ് എന്നിവ സ്റ്റിങ്ങറിനെ കൂടുതൽ ആകർഷകമാക്കുന്നു.
നാലു പേർക്ക് സുഖമായി യാത്രചെയ്യാനാവുന്ന സ്റ്റിങ്ങറിന്റെ വാണിജ്യാടിസ്ഥാനത്തിൽ നിർമ്മാണം എപ്പോൾ ആരംഭിക്കും എന്ന് നിരത്തിലിറങ്ങും തുടങ്ങി വാഹനത്തെ സംബന്ധിക്കുന്ന കൂടുതൽ വിവരങ്ങളൊന്നും കമ്പിനി പുറത്തുവിട്ടിട്ടില്ല.
സ്റ്റിങ്ങറിന് പുറമെ മറ്റ് ഇലക്ട്രിക് വാഹനങ്ങളടക്കം ഒരു പിടി വാഹനങ്ങൾ മഹീന്ദ്ര ഓട്ടോ എക്സ്പോയിൽ അവതരിപ്പിച്ചിട്ടുണ്ട്. ഇതിൽ എടുത്ത് പറയേണ്ടത് പ്രീമിയെ എസ് യുവി വാഹനങ്ങളായ ഫോർച്ചൂണർ, എക്കോസ്പോർട്ട് തുടങ്ങിയവയോട് മത്സരത്തിന് തയ്യാറെടുക്കുന്ന റെക്സ്റ്റൺ ആണ്.
മഹീന്ദ്രയുടെ കൊറിയൻ പങ്കാളികളായ സാങ്യോങ്ങിന്റെ വാഹനമാണ് റെക്സ്റ്റൺ. എന്നാൽ എക്സ് യുവി 700 എന്ന പേരിലാകും റെക്സ്റ്റൺ വിപണിയിലെത്തുക എന്നും വിവരമുണ്ട്.
ഇവയെക്കൂടാതെ കെയുവിയുടെ ഇലക്ട്രിക് വെർഷനായ ഇ-കെയുവി, വെറിറ്റോയുടെ ഇലക്ട്രിക് വെർഷനായ ഇ- വെറിറ്റോ, ഇ-ബസ്, ഇ-സുപ്രോ, ഇലക്ട്രിക് ഓട്ടോ റിക്ഷ, മഹീന്ദ്രയുടെ ആദ്യ ഇലക്ട്രിക് കാറായ ഇടുഒയുടെ പതുക്കിയ മോഡൽ, ഉഡോ, ആറ്റം തുടങ്ങിയ ഇലക്ട്രിക് വാഹനങ്ങളുടെ കൺസെപ്റ്റ് മോഡലുകൾ തുടങ്ങിയവയാണ് ഓട്ടോ എക്സ്പോയിലെ മഹീന്ദ്രയുടെ വാഹനങ്ങൾ.
