റോയൽ എൻഫീൽഡ് തണ്ടർ ബേഡിന്റെ പുതിയ വകഭേദം പുറത്തിറക്കി. തണ്ടർ ബേഡ് എക്സ് എന്ന പേരിൽ 350 , 500 സിസി ഇനങ്ങളിൽ ഇവ ലഭിക്കും. വെള്ള, ചുവപ്പ് എന്നീ നിറങ്ങളാണ് 350 സിസി വേരിയന്റിൽ ഉള്ളത് . 500 സിസിയിൽ നീലയും ഓറഞ്ചും നിറങ്ങൾ ലഭ്യമാകും.
തണ്ടർ ബേഡ് എക്സിന്റെ താഴ്ഭാഗത്ത് മാറ്റ് ബ്ലാക്ക് കൊണ്ടുള്ള ഫിനിഷിംഗാണ് . ഇതുൾപ്പെടെ കാഴ്ചയിൽ നിരവധി മാറ്റങ്ങൾ വരുത്തി സുന്ദരനായിരിക്കുകയാണ് എക്സ്. മുന്നിലെ ഫോർക്കുകളും ഹെഡ്ലാമ്പും മാറ്റ് ഫിനിഷിൽ ഭംഗിയായിട്ടുണ്ട്.
എൽഇഡി ഹെഡ്ലാമ്പും ഫ്യൂവൽ ടാങ്കും മാറ്റങ്ങൾ വരുത്തിയിട്ടില്ല . ശ്രദ്ധേയമായ മാറ്റം വരുത്തിയത് ഹാൻഡിലിനാണ് . തണ്ടർ ബേഡിന്റെ വളഞ്ഞ് കയ്യിലേക്ക് വന്ന ഹാൻഡിലിനു മാറ്റമുണ്ട് . തണ്ടർബേഡ് എക്സിന് സ്ട്രെയിറ്റ് ഹാൻഡിലാണ് എൻഫീൽഡ് ഒരുക്കിയിരിക്കുന്നത്.
അലോയ് വീലുകളാണ് ഉപയോഗിച്ചിരിക്കുന്നത്. 19.8 പിഎസ് ശക്തി തരുന്ന 350 സിസി 28 എൻഎം ടോർക്കും നൽകും. 500 സിസി എഞ്ചിൻ 27.2 പിഎസ് ശക്തിയും 41.3 എൻഎം ടോർക്കും തരും. രണ്ട് ചക്രങ്ങളിലും പഴയ മോഡലിന്റേത് പോലെ ഡിസ്ക് ബ്രേക്കുകളാണ്.
350 സിസിക്ക് 1.57 ലക്ഷം രൂപയാണ് ഡൽഹിയിലെ എക്സ് ഷോറൂം വില. 500 സിസിക്ക് 1.99 ലക്ഷം രൂപ എക്സ് ഷോറൂം വിലയാകും.