വിപണിയിൽ പുതു തരംഗം സൃഷ്ടിക്കാൻ ഇരുചക്രവാഹന പ്രേമികളുടെ ഇഷ്ടകമ്പനിയായ റോയൽ എൻഫീൽഡ്. മിലിറ്ററി ബുള്ളറ്റ് എന്ന വിളിപ്പേരിലുള്ള ക്ലാസിക് 500 പെഗാസസ് എഡിഷനാണ് ഇപ്പോൾ വിപണിയിലിറക്കിയിരിക്കുന്നത്. ലിമിറ്റഡ് എഡിഷനായ 500 പെഗാസസിന് 2.49 ലക്ഷം രൂപയാണ് മുംബൈയിലെ എക്സ് ഷോറൂം വില.
രണ്ടാം ലോക മഹായുദ്ധ കാലങ്ങളിലെ സ്മരണകൾ ഉൾക്കൊണ്ടാണ് എൻഫീൽഡ് പുതിയ പതിപ്പ് ഇറക്കിയിരിക്കുന്നത്. യുദ്ധകാലത്ത് ബ്രിട്ടീഷ് പാരാട്രൂപ്പർമാർ ഉപയോഗിച്ചിരുന്ന ഫ്ലൈയിംഗ് ഫ്ലീയാണ് പെഗാസസിന് പ്രചോദനമായത്. ആകെ 1000 ബുള്ളറ്റുകൾ മാത്രമാണ് കമ്പിനി പുറത്തിറക്കിയത്. ഇതിൽ 250 എണ്ണം ഇന്ത്യക്കായി മാറ്റിവച്ചിട്ടുണ്ട്.
സർവീസ് ബ്രൗൺ, ഒലിവ് ഡ്രാബ് ഗ്രീൻ എന്നീ നിറങ്ങളിലാണ് എൻഫീൽഡ് പെഗാസസ് പുറത്തിറക്കിയിരിക്കുന്നത്. എന്നാൽ ഒലിവ് ഗ്രീൻ ഇന്ത്യൻ സൈന്യത്തിന് മാത്രേമേ ഉപയോഗിയ്ക്കാനാവൂ. അതിനാൽ സർവീസ് ബ്രൗൺ മാത്രമേ രാജ്യത്ത് വിൽപ്പനയ്ക്കെത്തൂ.
റോയൽ എൻഫീൽഡിന്റെ ഷോറൂമുകൾ വഴി പെഗാസിസ് വാങ്ങാനാവില്ല എന്ന പ്രത്യേകതയുമുണ്ട് ഈ ലിമിറ്റഡ് എഡിഷൻ ബുള്ളറ്റിന്. ഓൺലൈനിലൂടെ മാത്രമേ വാഹനം സ്വന്തമാക്കാനാവൂ. ഫോർ സ്രോക്ക് എയർ കൂൾഡ് സിംഗിൾ സിലിണ്ടർ എഞ്ചിനാണ് 500 പെഗാസിസിന് ഉപയോഗിച്ചിരിക്കുന്നത്.
രണ്ടാം ലോക മഹായുദ്ധകാലത്ത് ഫ്ലൈയിഗ് ഫ്ലീയിൽ ഉപയോഗിച്ചിരുന്ന അതേ രീതിയിൽ പെട്രോൾ ടാങ്കിൽ സ്റ്റെൻസിൽ എഴുത്തുണ്ട്. 1000 ബുള്ളറ്റുകൾ മാത്രമുള്ളതിനാൽ ഓരോന്നിനും യുണീക് നമ്പറുകളാണ് ഉള്ളത്.